27. दयालू सामरी केर कहनी

एक दिन, यहूदी बेबस्था केर एकटा जानोइया यीशु केर तहाँ आलक। ऊ सउब के इटा देखायेक चाहत रहे कि यीशु गलत रीति लेक सिछा देत रहे। सेतेहें ऊ कहलक, “हे गुरु, अनन्त जीबन पायेक तेहें मयँ का करमु?” यीशु जबाब देलक, “परमेश्‍वर बेबस्था मेहेन का लिखल आहे?”

उ लोग टा कहलक, “उटा कहेला कि आपन परमेश्‍वर लेक आपन सम्पूर्न मन, परान, सामर्थ, आर बुद्धि लेक प्रेम राखिन। आर आपन पड़ोसी लेक आपन समान प्रेम राखिन।” यीशु जबाब देलक, “तयँ एकदम ठीक आहिस! जदि तयँ एसन करबे, हले तके अनन्त जीबन पावाइ।”

किन्तु उ बेबस्था केर जानोइया टा लोग गिला के देखाय चाहत रहे कि उकर जीबन जीये केर तरीका सही रहे। सेतेहें ऊ यीशु के पूछलक, “ठीक आहे, हले मर पड़ोसी के हेके?”

यीशु उ बेबस्था केर जानोइया टाके एकटा कहनी कइह देक दाराय जबाब देलक। “एकटा यहूदी अदमी रहे जे एकटा डहर लेक हय कहन यरुशलेम लेक यरीहौ केर यात्रा करत रहे।”

“किन्तु थोड़ेक डाकू गिला उके देखलयँ आर उकर उपरे हमला कइर देलयँ। उमन उकर सउब कुछ के ले लेलयँ आर उके करिबन मरेक तक मारलयँ-पिटलयँ। तखन उमन चइल गेलयँ।”

“उकर तुरुत बादे, एकटा यहूदी याजक ओहे डहर लेक हय कहन जात रहे। उ याजक टा उ अदमी के डहर धारे पड़ल देखलक। जखन ऊ उके देखलक तो ऊ डहर केर दसर धार बाटे लेक आघु चइल गेलक। ऊ उ अदमी टाके एकदमे अनदेखा कइर देलक।”

“इकर बादे तनिके समइ बितल बादे, एकटा लेवी ओहे डहर लेक आलक। (लेवी यहूदी गिला केर एकटा गोत्र रहे जे मन्दिर मेहेन याजक गिला केर साहेता कइर रहयँ।) ऊ लेवी टाउ डहर केर दसर धार लेक निकइल गेलक। उहउ उ अदमी के अनदेखा कइर देलक।”

“दसर अदमी जे उ डहरे आलक ऊ सामरिया केर एकटा पुरुस रहे। (सामरी आर यहूदी एक दसर लेक नफरत करत रहयँ।) उ सामरी टा डहरे उ अदमी के देखलक। ऊ देखलक कि ऊ अदमी टा यहूदी रहे, किन्तु तेउ ऊ उकर उपरे बेजाइन तरस खालक। सेतेहें ऊ उकर पासे गेलक आर उकर घाव गिलाय पट्टी बाँधलक।”

“फिन उ सामरी उ अदंमी टाके आपन गधा उपरे बइसालक आर उके उ डहर लेक एकटा सराय मेहेन ले गेलक। जहाँ ऊ उकर देखभाल करेक जारी राखलक।”

आघु दिन, उ सामरी टाके आपन यात्रा के जारी राखेक दरकार रहे। ऊ उ सराय केर प्रभारी अदमी के कुछ धन देलक, ऊ उके कहलक, “इ अदमी केर देखभाल करबे। जदि इ धन केर अलावा तर कनअ आरो धन खर्चा हइ हले वापस आमु सेखन मयँ तर उ खर्चा गिला के दे देमु।”

फिन यीशु उ बेबस्था केर जानोइया टाके पुछलक, “तयँ का सोचिसला? इ तीन झन मइध लेक के उ अदमी केर पड़ोसी हेके जेके लुटलयँ आर पिटल जाय रहे?” ऊ जबाब देलक, “ओहे जे उकर उपरे कृपालू रहे।” यीशु उके कहलक, “तयँ जाहिन आर एसनेइ करिन।”