28. धनीमान जुवान सासक

एक दिन, एकटा धनीमान जुवान सासक यीशु तहाँ आय कहन उके पुछलक, “ए श्रेष्ठ गुरु, अनन्त जीबन पायेक तेहें मके का करेक चाही?” यीशु उके कहलक, “तयँ मके श्रेष्ठ काहे कहतिहिस? केबल एकेटाइ श्रेष्ठ आहे आर ऊ परमेश्‍वर हेके। किन्तु जदि तयँ अनन्त जीबन पायेक चाहोतिहिस हले परमेश्‍वर केर बेबस्था केर पालन करिन।”

“मके कन्-कन् आग्या गिला केर पालन करेक केर दरकार आहे?” ऊ पुछलक। यीशु जबाब देलक, “हत्या ना करबे। ब्यभिचार ना करबे। चोरी ना करबे। झूठ ना कहिन। आपन बाप आर माँय केर आदर करिन, आर आपन पड़ोसी ले आपन समान प्रेम करिन।”

किन्तु उ जुवान पुरुस टा कहलक, “मयँ आपन छुवा समइ लेकेइ इ सउब आग्या गिला केर पालन करते आतहँ। मके सदा केर तेहें जीयँत रहे केर एखनअ का करे केर दरकार आहे?” यीशु उकर उपरे नजइर उठालक आर उकर लेक प्रेम करलक।

यीशु जबाब देलक, “जदि तयँ सिद्ध हयेक चाहोतिहिस हले जाय कहन आपन सउब कुछ के बेंच कहन आर उ धन टाके गरीब गिलाक मइधे बाँइट देहिन, आर तके सरग मेहेन धन मिली। तखन आय कहन मर पेछु गुड़ियाय लेहिन।”

जेटा यीशु कहलक सेटा के जखन उ जुवान पुरुस सुनलक तो ऊ बेजाइन उदास हय गेलक, काहेकि ऊ बेजाइन धनीमान रहे आर ऊ आपन सउब सम्पत्ति के देक नाइ चाहत रहे। ऊ पेछुवाय कहन यीशु केर पास लेक चइल गेलक।

तखन यीशु आपन चेला गिला के कहलक, “परमेश्‍वर केर राइज मेहेन धनीमान लोग गिला केर समायेक बेजाइन कठिन आहे! हँ, एकटा धनीमान पुरुस के परमेश्‍वर केर राइज मेहेन समायेक तुलना मेहेन कनअ ऊँट केर सूई केर छेंदा लेक हय कहन निकइल जायेक आसान आहे।”

जेटा यीशु कहलक जखन चेला गिला सुनलयँ तो उमन चकित रहयँ। उमन कहलक, “जदि इटा एसन आहे हले परमेश्‍वर केके बाँचाइ?”

यीशु चेला गिला केर उपरे नजइर उठालक आर कहलक, “लोग गिलाक तेहें खुद केर उद्धार करेक असम्भव आहे। किन्तु परमेश्‍वर केर तेहें कनअए करेक असम्भव नेखे।”

पतरस यीशु के कहलक, “हामरे चेला गिला आपन सभे टाके छोइड़ कहन तर पेछु हय ले आही। तो हामरे केर प्रतिफल का हइ।”

यीशु जबाब देलक, “हर एक झन जे मर चलते घर, भाई, बहिन, बाप, माँय, छुवा गिला, चाहे सम्पत्ति के छोइड़ आहा, ऊ उटा लेक सअ गुना बेसी पाइ आर अनन्त जीबन कउ पाइ। किन्तु ढेइरे गिला लेक जे पहिले आहयँ उमन पेछुवे हबयँ, आर ढेइरे लोग लेक जे पेछुवे आहयँ उमन पहिले हबयँ।”