50. यीशु वापिस घुइर आयला

करिबन 2,000 बछर लेक, संसार मेहेन सउब जायगाय बेसी लेक बेसी लोग गिला मसीह यीशु केर बारे बेस खबर के सुनोतहयँ। कलीसिया बाढ़ोतेहे। यीशु वादा कइर आहे कि ऊ संसार केर आखरी मेहेन वापिस घुइर आइ। ऊ एखन वापिस नाइ आय आहे, तेउ ऊ आपन वादा के पूरा करी।

जखन कि हामरे यीशु केर वापिस घुइर आय केर इन्तजार करिला, परमेश्‍वर हामरे लेक एसन किसिम केर जीबन जीये केर इंछा करेला जेटा पबितर आहे आर जे उकर आदर करेला। जखन यीशु पिरथिबी मेहेन रहत रहे तखन ऊ कइह रहे, “मर चेला गिला गोटा संसार मेहेन सउब जायगाय लोग गिला के परमेश्‍वर केर राइज केर बारे बेस खबर परचार करबयँ, आर तखन संसार केर आखरी आय जाइ।”

ढेइरे जाइत केर लोग गिला एखन तक यीशु केर बारे नाइ सुइन आहयँ। सरग घुइर जायेक लेक पहिले, यीशु बिसासी गिला के उ लोग गिला के बेस खबर सुनायेक कहलक जे गिला इटा के कबउ नाइ सुइन आहयँ। ऊ कहलक, “जावा, आर सउब जाइत केर लोग गिला के चेला बनावा!” आर “काटेक तेहें खेत पाइक चुइक आहे!”

यीशु इटाउ कहलक, “कनअए लोग केर धाँगर आपन मालिक लेक बड़े नाइ हयला। इ संसार केर खास लोग गिला मर लेक दुस्मनी करलयँ, आर मर चलते तोहरे कउ सताबयँ आर मराय देबयँ। इ संसार मेहेन तोहरे पीड़ित हबा, किन्तु मजबूत बना, काहेकि मयँ सयतान के हराय दे आहँ जे संसार मेहेन राइज करेला। जदि तोहरे आखरी समइ तक मर तेहें बिसास लाइक बनल रहबा, हले परमेश्‍वर तोहरे के बाँचाइ!”

यीशु आपन चेला गिला के इटा समझायेक तेहें एकटा कहनी सुनालक कि जखन संसार केर आखरी हयला तो लोग गिलाक संगे का होइ। ऊ कहलक, “कनअए लोग आपन खेत मेहेन बेस बिहिन के बुनलक। जखन ऊ निदात रहे तो उकर दुस्मन आलक आर गहम केर बिहिन गिलाक उपरे पसड़ा बिहिन गिला के बुइन देलक, आर फिन ऊ चइल गेलक।”

“जखन बिहिन अंकुर हलक तो धाँगर गिला उ लोग टाके कहलयँ, ‘ए मालिक, तयँ तो आपन खेत मेहेन बेस बिहिन बुइन रहिस! तो फिन इटाय पसड़ा काहे आहे?’ उ लोग टा जबाब देलक, ‘इटा मर कनअ दुस्मन केर कामेइ हेके। मर कोनो दुस्मन आहे जे एसन कइर आहे

“उ धाँगर गिला आपन मालिक के जबाब देलयँ, ‘का हामरे पसड़ा गिला के उखनाय देबिक?’ उ मालिक टा कहलक, ‘नाहीं। जदि तोहरे एसन करबा हले थोड़ेक गहम गिला कउ उखनाय देबा। काटेक समइ तक इन्तजार करा। तखन पसड़ा गिला के बिड़ा बाँइद कहन जामा करा ताकि तोहरे उटा के डुँड़काय पारा। किन्तु गहम गिला के मर घर मेहेन ले कहन आना।

चेला गिला इ कहनी केर माने के नाइ बुझलयँ, सेतेहें उमन यीशु के उमन के समझायेक तेहें अर्जी करलयँ। यीशु कहलक, “बेस बिहिन बुनोइया लोग टा मसीह केर प्रतिनिधित्व करेला। खेत संसार केर प्रतिनिधित्व करेला। बेस बिहिन परमेश्‍वर केर राइज केर लोग गिलाक प्रतिनिधित्व करेला।”

“पसड़ा उ दुस्ट लोग गिला, सयतान केर लोग गिला केर प्रतिनिधित्व करयँला। उ मानुस केर दुस्मन सयतान केर प्रतिनिधित्व करेला, जे पसड़ा बिहिन गिला के दे रहे। कटनी इ संसार केर आखरी केर प्रतिनिधित्व करेला, काटोइया गिला परमेश्‍वर केर सरगदूत गिला केर प्रतिनिधित्व करयँला।”

“जखन संसार केर आखरी हइ तखन सरगदूत गिला उ सउब लोग गिला के एके संगे जामा करबँय जे सयतान केर हेकयँ। उ सरगदूत गिला उमन के एकटा बेजाइन गरम आइग मेहेन फेंइक देबयँ। हुआँ उ लोग गिला भयंकर सताव मेहेन काँदबयँ आर आपन दाँत किटकिटाबयँ। किन्तु जे गिला धर्मी हेकयँ, जे यीशु केर पेछुवे चइल आहयँ, उमन उमनेक परमेश्‍वर बाप केर राइज मेहेन सूरुज केर समान चमकबयँ।”

यीशु इटाउ कहलक कि ऊ संसार केर आखरी होयेक लेक पहिले पिरथिबी मेहेन घुइर आइ। ऊ ओहे निहारे वापिस घुइर आइ जेसन ऊ जाय रहे। यानीकि उकर पासे बास्तबिक गात होइ, आर आकाश मेहेन बादइर मेहेन सवार हय कहन आइ। जखन यीशु घुइर आइ, तो हर एक बिसासी गिला जे मइर चुइक आहयँ मरल मइध लेक जीयँत हय घुरबयँ आर उकर संगे आकाश मेहेन भेंट करबयँ।

तखन जे बिसासी गिला एखनउ जीयँत आहयँ उमन आकाश मेहेन उठाल जाबयँ आर उ दसर बिसासी गिला संगे सामिल हय जाबयँ जे मरल मइध लेक जीयँत हय घुरबयँ। उ सउब हुआँ यीशु केर संगे हबयँ। उकर बादे, यीशु आपन लोग गिला संगे रही। जखन उमन एके संगे रहयँला हले उमनेक पासे सदा केर तेहें पूरा शान्ति हइ।

यीशु उकर उपरे बिसास करइया हर एक झन के एक टा मुकुट दे केर परतिंगा कइर आहे। उमन हमेसा केर तेहें परमेश्‍वर केर संगे हर एक जिनिस उपरे शासन करबयँ। उमनेक पासे सिद्ध शान्ति हइ।

किन्तु परमेश्‍वर उ सउब केर फयसला करी जे यीशु उपरे बिसास नाइ करयँला। ऊ उमन के नरक मेहेन डाइल देइ। हुआँ उमन कान्दबयँ आर आपन दाँत किटकिटाबयँ, आर उमन हमेसा तड़पते रहबयँ। कबउ नाइ निंझइया आइग उमन के लगातार पड़ाते रही, आर पोका उमन के खायेक हका नाइ करबयँ।

जखन यीशु घुइर आयला, हले ऊ पूरी रीति लेक सयतान के आर उकर राइज के नास कइर देइ। ऊ सयतान के नरक मेहेने डाइल देइ। हुआँ सयतान हमेसा केर तेहें जरते रही, उ सउब केर संगे जे गिला परमेश्‍वर केर कथा गिला के मानेक बदली सयतान केर पेछुवे चले केर चुनाव कइर रहयँ।

काहेकि आदम आर हव्वा परमेश्‍वर केर आग्या के नाइ माइन रहयँ आर पाप के इ संसार मेहेन ले कहन आइन रहयँ, परमेश्‍वर उमन के स्राप देलक आर उटाके नास करे केर निर्नय करलक। किन्तु कनअए दिन परमेश्‍वर एकटा नावा सरग आर नावा पिरथिबी केर रचना करी जेटा सिद्ध हइ।

यीशु आर उकर लोग गिला उ नावा पिरथिबी उपरे रहबयँ, आर ऊ हमेसा केर तेहें सउब जिनिस गिलाय शासन करी। ऊ लोग गिला केर आँइख लेक हर एक लर पानी के पोंइछ देइ। एधाँव केअउ पीड़ित चाहे दुखी नाइ हबयँ। उमन कान्दबयँ नाहीं। उमन रोगी नाइ हबयँ चाहे मरबयँ नाहीं। आर हुआँ कनअए बुराई नाइ हइ। यीशु आपन राइज मेहेन न्यायपूर्वक, आर शान्ति लेक शासन करी। ऊ हमेसा केर तेहें आपन लोग गिला केर संगे रही।