2. २. संसारमा पापक पैठना

परमेश्वर आदम ओ हव्वाक लग् सुग्घर फुलरिया बनैलाँ,उहे पुलरियामे खुशी साठ ओईने बैठल् रहिंत। डुनु जाने झुलुवा नै घालिंट , ऐसिन रहलेसे फेन ओईन्मे कौनो लाज नै रहिन्। काकरेकि उबेलामे संसारमे कौने किसिमके पाप नैरहे। ओईने फुलरियामे एहोंर ओहोर मजासे घुमघाम करिट् ओ परमेश्वरसे बाटचित् करिंट।

करिंट तर उहे फुलरियामे एकठे महा चलाख सँपोवा रहे। उहे सप्पोवा जन्नी मनैन्से पुँछल्, “ का फुरन्डे परमेश्वर टुह््रिन्हे कहले बटाँ, यहाँ रहलक् मन्से कौनो रुखवा मनिक् फल टुरके नखायो ?

जन्नी मनै ऐसिक जवाफ डेलाँ, “यहाँ रहलक् सक्कु रुखवा मनिक् फल हम्रे खाई सेक्बी, केवल असल ओ खराब ज्ञान डेना रुखवा मनिक् फल टुहुरे जिन खायो कहिके परमेश्वर हम्रहिन कहले बटाँ। यदि टुहरे यी रुखवाक् फल खैबो अथवा छुबो टे फेन् टुहरे मुंंजैबो कहिके परमेश्वर हम्रहिन्हे कहलेबटाँ।”

सँप्वा, जन्नी मनैन् ऐसिक जवाफ डेहल् , यी सत्य बाट नैहो। वा यी सत्य बाट नैहो कहिके, सप्वा जन्नी मनैन्हे जवाफ डेहल्।

जन्नी मनैहे हेर्टिमे लोभलग्टिक् सुग्घर फल खाँऊँ खाँऊँ डेख्लिन्। हँुकहिन्हे फेन् बुद्धिमान हुईना चाह कैलिन् , उहेकमारे पुलरियामनिक् ठन्चे फल टुरके खैनिन्। तब ठन्चे फल अपन ठर्वाहे फेन डैडेलिन्, ओ उ फेन उ फल खाईल् ।

अचानक्,ओईन्के आँख् उघर्गैलिन् , ओईने अप्नेहें चाल पैलाँ कि हम्रे टे नङ्गटे बटी । ओईने पटियाक् झुलुवा बनाके अपन् आङ्गहे छोप्लाँ।

तब मनैया ओ ओकर जन्नी पुलरियामे परमेश्वर नेङ्गटी कैलक अवाज सुन्ला। परमेश्वरसे डराके ओईने डुनुजाने नुक्लाँ। उहे बेला परमेश्वर बलैलाँ। “ टै कहाँ बटे ?” आदम जवाफ डेहठ् , “मै अपनिन् हे फुलरियामे नेंङ्गलक् अवाज सुन्लँु , मै डरा गैलुँ, कामरे कि मै नङ्गटे रहुँ। उहेक् मारे मै नुक्लुँ,

तब परमेश्वर पुच्छ्ला, “ टै नङ्गटे बटे कहिके टुहिंहे के कहल् ? का मै टुहिंहे जिनखाईस् कलक् फल खालेले ? ” मनैयाँ कहल, अप्निन्के डेहलके जन्नी महिंहे फल डेली। ” तब परमेश्वर जन्नी मनैहे पुच्छ्लाँ, “टै यी का कैले ?” जन्नी मनै कलिन् महिंहे सप्वा लभारल्।”

परमेश्वर सप्वाहे कहलाँ, “ टै श्रापित होगैले।

तब परमेश्वर जन्नी मनैहे कहलाँ, मै टोरिक सुत्केरी हुई लग्बे टे धेर बठैनाहा कैडबुँ। एैसिन् हुईलेसे फेन् टोरिक मन ठरुवा ओर रहि ओ टुहिहे टोर उप्पर अधिकार करी।”

मनैहे परमेश्वर कहलाँ, “टै अपन् वनेवाँक बाट नै मन्लक् ओर यी धर्टि टोरीक कारणसे श्रापिट हुईल बा। खैनाके लग् टुहिहे महा धेर परिश्रम करेपरि। फेनपाछे टै मुंएँ परि, ओ टोर डेंह माटीमे मिली।” तब मनैया अपन् जनेवाँक् नाऊँ हव्वा ढैल एकर अर्थ हो “ जीवन डेना,” काकरेकी सारा जाटिक् मनैन्के डाई बन्गैलिन्। तब जाके परमेश्वर आदम ओ हव्वाहे पशुक् छालाक् झुलुवाक् घलाडेलाँ।

तब परमेश्वर कहलाँ, “आब मनै हम्रहिन्हस् बढियाँ ओ नैमज्जा जन्नाह हुईल बटाँ,” उहेक मारे आब ओइृनहे जीवनके रुखवाक् फल खाके ओईने अजम्मरी जीवन रहे नपाए कहिके परमेश्वर आदम ओ हव्वाहे उहे सुग्घर फुलरिया मन्से बाहर खडेरडेलाँ। परमेश्वर जीवनके रुखवा हेरचाह करक् लग् शक्तिशाली स्वर्गदुत फुलरियाक् मुल डवारमे पहरा डेहक्लग् चौकिडार खटैलाँ।