28. २८. धनी जवान शासक

एकदिन, एकजाने धनी जवान शासक येशुक् ठन् आईल ओ पँुछल्, “असल गुरु, अनन्त जीवन पाईक् लग् मै काकरे परी ?” तब येशू उहिहे कहलाँ, “काकरे टुँ महिहे ‘असल’ कहटो ? केवल एक जाने किल असल बटाँ ओ हसल रहिँहिँ, ओँहाँ चाहिँ परमेश्वर हुँईँट्। तर टुँ अनन्त जीवन चाहा टो कलेसे, परमेश्वरके आज्ञा पालन करो।”

“उ मध्उे कौन–कौन चाहिँ मै पालन करु ?” उ पुँछल्। येशू कहलाँ, “हत्या जिनकर्यौ। व्यभिचार जिनकर्यौ। झुँठ जिन बोल्हो। अपन् डाई–बाबाक् आदर कर्यौ, ओ अपन छिमेकीनहे टुँ आपन ् आप जैसिन प्रेम कर्यौ।”

तर उ जवान मनै अपन आपहे ठिक प्रमाणित करक् लग् कहल, “मै टे यी सक्कु आज्ञा जब मै छुटुनक् लओण्डा रहुँ तब्बेहेँ से पालन् कैटी अईटी बटुँ। महिँहे आकुर का करे परी ता की मै सँदाके लग् बाँचे सेकुँ ?”येशू उ मनैयाँ हे हेरलाँ ओ टिठैलाँ।

येशू जवाफ डेलाँ, “यदि टुँ सिद्ध हुईना चाहाटो कलेसे, जाऊ टोहारसँगे रलक् सक्कु चिज बेँचो ओँहाँसे अईलक् पैसा गरीबन्हे डेऊ, ओ टुँहिन हे स्वर्गमे धन मिली। तब आऊ ओ मोरीक् पाछे लागो।”

तब उ जवान मनैयाँ येशूक् कहल बाट् सुनल्, उ धेर दुःखित हुईल्, काकरे कि उ धेर धनी रहे उहेक मारे अपन अधिकार जमैलक् सारा थोक डेना मन नैरहिस् उ ओँहाँ से घुमके चला गैईल्।

तब येशू ओँहाँक् चेलानहे कहलाँ, “धनी मनैनहे परमेश्वरके राज्यमे पैँठ्ना महा कठिने बा।

जब चेलान्के येशू कहलक् बाट् सुन्लाँ, ओईने छक्क परलाँ ओ कहलाँ, “तबटे कौन चाहिँ मुक्ति पाई से कि टे ?”

येशू चेलान् हे हेरलाँ ओ कहलाँ, “मनैनके लग् यी सब असम्भव बा, तर परमेश्वरके लग् सक्कु चिज सम्भव बा।”

पत्रुस येशुन्हे कहल, “हम्रे सक्कु चिज छोरके अप्पनीनके पाछे लागल् बटी। हमार लग् इनाम का चिज रहि।”

येशू जवाफ डेलाँ, “जे मोरीक नाउँके खाटिर अपन् घर, डाडुभैया, डिडीबाबु, बाबा, डाई, छावाछाईन, अथवा धनसम्पित्ति छोरले बटाँ, ओईने सक्कु जाने सय गुना धेर पैहिँ ओ ओईने अनन्त जीवन फेन पैहिँ। तर धेर जाने जे आघे बटाँ, ओईने पाछे हुँइँहिँ ओ पाछे हुईना चाहिँ आघे हुँइँहिँ।