50. ५०. येशू फेन्से अइहिँ

करिब २,००० वर्ष से, संसारभरके धेर से फेन् धेर मनैनके येशूक महिमाके बारेमे सु–समाचार सुन्टि अईटि बटाँ। मण्डलीके वृद्धि हुईटी बा। येशू प्रतिज्ञा कैले बटाँ कि संसारके अन्त्यमे ओँहाँ फेन्से यहाँ अइहिँ। ओँहाँ अभिन यहाँ टे नै आईल हुँइँट्, तर ओँहाँ अपन प्रतिज्ञा पुरा कैहिँ।

हम्रे जब येशूके आगमने प्रतिक्षा कैबी, हाम्रे पवित्रताके डग्गरमे जीवन जिई कहिके परमेश्वर चहठाँ, जे ओँहाँक आदर करी। हम्रे आकुर जनहन्हे फेन् ओँहाँक राज्यक बारेमे बटाई कहिके ओँहाँ चहठाँ। संसारमे जब येशू रहिँट्, ओँहाँ कहलाँ, “मोरीक चेलानके परमेश्वरके राज्यके बारेमे सारा संसारके मनैनहे सु–समाचार प्रचार कैहिँ, तब ओकर पाछे संसारके अन्त्यके दिन आई।”

धेर जातिक मनैनके अभिन फेन् येशूके बारेमे सुन्ले नैहुँइँट्। स्वर्गमे जैनासे आघे ओँहाँ ख्रीष्टियानहे उ सक्कु मनैनहे सु–समाचार घोषणा करे कहलाँ, जे एकार बारेमे कबो फेन् सुन्ले नैहुँइँट्, ओँहाँ कहलाँ “जाई ओ सक्कु जातिनके मनैनहे चेला बनाई

येशू यी फेन, “कौनो दास अपन मालिकवासे भारी हुई नैसेकी। जैसिक यी संसारके अधिकारी महिहे घृणा कैलाँ, ओईने मोरीक खातिर टुहरिनहे कष्ट डिहिँ ओ मरहिँ। यी संसारमे टुहरिन कष्ट भोगे परि तथापी उत्साहित हुईहो, काकरे कि मै यी संसारके शासन कैना शैतानहे हरैले बटुँ। यदि टुहरे अन्तिम टक् विश्वास योग्य हुईबो कलेसे, परमेश्वर टुहरिनके उद्धार कैहिँ।

येशू ओँहाँ अपन चेलानहे संसारके अन्त्य हुईलेसे कैसिन रहि कहिके सम्झाईक् लग् एकठो कठा कहलाँ। ओँहाँ कहलाँ, “एकठो मनैयाा अपन खेटवामे बढीया बिया लगाईल। तब उ जाके घरेमे सुट्गैल्, ओकर शत्रु आके गोहुँक् बिच्चेमे सामाके बिया बोडेहल्, ओ ओँहाँसे चलागैल।”

“जब बिया जामल, उ मनैयाँके दास आके कहल्, ‘मलिकवा, अपनि टे उ खेटवामे बजा बिया बोईले रहि। तर कहाँसे ओँहाँमे सामा आईल् टे ?’ उ मालिकवा जवाफ डेहल, “कौनो शत्रु आके लगाईल हुई।”

“उ दास अपन मलिकवाहे कहलाँ, ‘का हम्रे जाके सामाहे उँखारडी ?” मलिकवा कहलाँ, ‘नाहिँ। टुहरे अइसिन कैबो कलेसे, टुहरे ओकरसँगे गोहुँ फेन् उँखारलेबो। कटनीके समयसम्मेके लग् रुको तब पाछे सामाहे जम्मा कैके जराईक् लग् बोझा–बोझ बाँढो, तर गोहुँचाहिँ मोरी ढुकुटीमे लानो।”

चेलानके यी कठाके अर्थ नैबुझ्लाँ, उहेकमारे ओईने येशूनहे बुझाडी कहिके आग्रह कैलाँ। येशू कहलाँ, “बढीयाँ बिया बोईना कलक् मनैनहे मसिहके प्रतिनिधित्व करथ। खेटवा संसारहे जनाईठ्। बढीया बिया परमेश्वरके राज्यके मनैनहे प्रतिनिधित्वा करठ्।”

सामा उ दुष्ट मनैनके प्रतिनिधित्व करठ्। सामा बोडेना उ शत्रु दुष्टके प्रतिनिधित्व करठ्। कटनीके समय अन्त्यके दिन प्रतिनिधित्व करठ्, ओ कटनी कैना परमेश्परके स्वर्गदुतनके प्रतिनिधित्व करठ्।”

“जब संसारके अन्त्य हुई, स्वर्गदुतनके अधर्मि मनैनहे जम्मा कैहिँ ओ ओइनहे डन्कल् आगीमे फेँकहिँ, जहाँ ओईने रुईहिँ ओ भयानक् कष्टमे अपन बँगारा कैँट्–कैट् परहिँ। तब धर्मि जनके चाहिँ ओईनके पिता परमेश्वरके राज्यमे सुर्यहस चम्किहिँ।”

येशू यी फेन् कहलाँ कि संसारके अन्त्य हुईनासे ठीक आघे ओँहाँ पृथ्वीमे अईसहिँ। ओँहाँ छोररलक् अवस्थामे जो ओँहाँ घुम्के अईहिँ, जौन ओँहाँक शरीर भौतिक रुपमे रहि ओ आकाशमे बड्रिक उप्पर अईहिँ। जब येशू घुमके अईहिँ, तब मुँलक् सक्कु ख्रीष्टियान मृत्युसे बौरी उठ्हीँ ओ ओँहाँहे आकाशमे भेट्हिँ।

तब उ बेलामे बँच्लक् ख्रीष्टियानके आकाशमे उँप्पर उठ्हिँ ओ आकुर मृत्युसे बौरके उठ्लक् ख्रीष्टियानसँगे भेट ओके मिल् जैहिँ। सक्कु जाने ओइनके येशूसँगे रहिँहिँ। तब पाछे, येशू ओँहाँ अपन मनैनसँगे सदाकालके लग् शान्ति ओ एकतामे रहिके बैठ्हिँ।

येशू ओँहाँमे विश्वास कैना सक्कु जनहनहे जीवनके मुकुट डेना प्रतिज्ञा कैले बटाँ। ओइने परमेश्वरसँगे शान्तिमे रहिँहिँ ओ राज्य कैहिँ।

तर परमेश्वरमे येशूमे विश्वास नै कैना सक्कु मनैनके न्याय कैहिँ। ओँहाँ ओइनहे नरकमे फँकाडिहिँ, जहाँ ओइने सँदाके लग् रोइहिँ ओ कष्टमे बँगारा पिस्हिँ। कबो फेन नै बुट्ना आगीमे सँडाके लग् ओईने जरैहिन्, ओ बज्जर–बज्जर किरुवानके खाई नैछोरहिँन्।

जब येशू संसारमे घुम्के अइहिँ, ओँहाँ शैतान ओ ओकर राज्यहे पुर्णरुपमे परास्त कैहिँ। ओँहाँ शैतानहे नरमके बेगा डिहिँ जहाँ ओइने सदाके लग् जर्हिँ ओ ओइनसँगे ओइने फेन् रहिँहिँ, जे चाहिँ परमेश्वरके आज्ञापालन कैनाके सट्टा उ दुष्टहे पुजना मन परैलाँ।

आदम ओ हव्वा परमेश्वरके आज्ञापालन नै कैलाँ आृ यी संसारमे पाप प्रवेश करवाई लग् कारणसे, परमेश्वर यी संसारहे श्राप डेलाँ ओ यीहिहे नाश कैना निर्णय कैलाँ। तर कौनो दिन, परमेश्वर एक लावा स्वर्ग ओ लावा पृथ्वी कैहिँ जौनचाहिँ सिद्ध रहि।

येशू ओ ओँहाँक् मनैनके लावा पृथ्वीमे बैठ्हीँ, तब ओँहाँ सदाके लग् अस्तित्वमे रलक् सक्कु चिजमे राज्य कैहिँ। ओँहाँ सक्कु जनहनके आँस् पोँछ्डिहिँ तब ओँहाँमे फेन्से कौनो कष्ट, दुख्, रुवाई, दुष्टता, वेडना वा मृत्यु नै रहि। येशू शान्ति ओ न्यायके साथ अपन राज्य शासन कैहिँ। ओ ओँहाँ सदाके लग् अपन मनैनकेसँगे रहिँहिँ।