49. ४९. परमेश्वरके लावा करार

एक स्वर्गदुत मरियम नाउँ कैलक् एक कन्याहे कहलाँ, कि उ परमेश्वरके पुत्रहे जलम डिँहिँ। उहेकमारे जब उ अभिन एक कन्या किल रहिन्, उ एकठो छावा पैलिन् ओ उँहँकार नाउँ येशू ढैलाँ तसर्थः, येशू परमेश्वर ओ मनै दुनु हुँइँट्।

येशू धेर आश्चर्यकर्म कैलाँ, जैसिन यी प्रमाणीत करठ् कि ओँहाँ परमेश्वर हुँइँट्। ओँहाँ पानीक उप्पर नेँग्लाँ, आँधीहे शान्त कैना, धेर रागी मनैनहे निको कैना, दुष्ट आत्मानहे निकरना, मुँअँल मनैनहे जीवित कैना ओ पाँच ठो रोटीसे ओ दुई मछरियासे ५,०००० से फेन् ज्यादा मनैनहे प्रशस्त कैके पेट भरके खवाके प्रमाणित कैलाँ

येशू महान् शिक्षक् फेन् रहिँट्, ओ ओँहाँ अधिकारके साथ बोलिँट् काकरे कि ओँहाँ परमेश्वरके पुत्र रहिँट् । ओँहाँ सिखैले रहिँट् कि अपनिनके आउर मनैनहे ओस्टके जो प्रेम करे परथ जैसिके अपनिनके अपन आपहे प्रेम कैठी।

ओँहाँ यी फेन सिखैलाँ कि अपनिनके परमेश्वरहे आकुर चिजसे फेन् ज्यादा प्रेम करे परठ्। अपनिनके धन–सम्पतिसे फेने ज्यादा।

येशू कहलाँ कि परमेश्वरके राज्य संसारमे हुइलक् कौनो चिजसे फेने ज्यादा मुल्यवान बा। केक्रो लग् सकसे ज्यादा महत्वपुर्ण कलक् चिज परमेश्वरके राज्यके हकदार हुइना हो। परमेश्वरके राज्यमे प्रवेश कैना, अपनिनके अपन पापसे उद्धार पैना हो।

येशू सिखैलाँ कि कौनो –कौनो मनैनके ओँहाँहे पाईसेकहिँ ओ बचा जैहिँ, तर आकुर जाने पाई नैसेकहिँ। ओँहाँ कहलाँ क्यौ–क्यौ मनै असल भुमि हस बटाँ। ओइने येशूके सु–समाचार प्रप्त कैलाँ ओ बाँच् गैलाँ। आकुर मनैनके चाहिँ डग्ग्रके आँखर भुमि हस बटाँ, जहाँ परमेश्वरके वचनके बिया नै छिरठ् ओ कुछु फसल नै हुईठ्। ओसिन मनैनके येशुके बारेक् सन्देशहे इनकार कैठाँ ओ ओँहाँक् राज्यभित्तर पैँठे नै पैँहिँ।

येशू सिखैलाँ कि परमेश्वर पापीनहे धेर प्रेम कैठाँ। ओँहाँ ओइन् सक्कु जनहनहे क्षेमा डेना चहठाँ ओ ओइनहे अपन सन्तान बनाइ चहठाँ।

येशू यी फेन् सिखैलाँ कि परमेश्वर पापहे घृणा कैठाँ। जब आदम ओ हव्वा पाप कैलाँ, एकर सक्कु ओइनके सक्कु सन्तानहे असर परलिन्। फलस्वरुप, संसारमे सक्कु मनैनके पाप कैठाँ ओ परमेश्वरसे अलग कैल बटाँ। तसर्थ, सक्कु जाने परमेश्वर से डुस हुइल् बटाँ।

तर परमेश्वर संसारमे हुइलक् सक्कु जनहन् अट्ना धेर प्रेम कैलाँ कि ओँहाँ अपन् ठन् रहलक् एक्कठो छावा फेन डैडेलाँ, ताकि येशूमे विश्वास कैना क्यौ फेन् ओइनके पापके सजय भोगे नापरे। तर परमेश्वरमे सदा–सर्वदा जीवन पाइँट्।

अपनिनके पाप कारण, अपनि दोषी ओ मुँना योग्य बटि। परमेश्वर अपनिनसँगे क्रोधित हुइना रहे, तर ओँहाँ अपन क्रोध अपनिनके बदला येशूमे खन्याडेलाँ। जब येशू क्रुसमे मुँलाँ, ओँहाँ अपनिनके लग् सँवय भोग्लाँ।

येशू कबो फेन पाप नैकैलाँ, तर ओँहाँ सँजाय भोग्लाँ ओ अपनिक ओ संसारके हरेक मनैनके पाप बोक्के लै जैना सिद्ध बलिके रुपमे मुँना पर्ना रहे। येशू अपनेँहेँ अर्पण कैलाके ओरसे, परमेश्वर कौनो पापीनहे क्षेमा करे सेकहिँ।

बढीयाँ काम कैलेसे अपनिनहे बचाई नैसेक्जाई। परमेश्वरसे सम्बन्ध ढारक लग् अपनिनके कैना सेक्ना कुछु बाट् नै हो। सिरिफ येशू किल अपनिनके पाप धोई सेकहिँ। अपनिनके यी बाट् विश्वास कैहि परी कि येशू किल परमेश्वरके पुत्र हुँईट्, कि अपनिक बडलामे ओँहाँ क्रुसमे मुँलाँ, ओ परमेश्वर फेनसे ओँहाँहे जीवित बनाके उठैलाँ।

येशूमे विश्वास कैना ओ ओँहाँहे अपन मुक्तिदाता कहिके ग्रहण कैना सक्कु जनहनहे परमेश्वर बचैहिँ। तर ओँहाँ विश्वास नैकैना चाहिँ केहुहे फेन नै बचैँहिँ। अपनि धनवान हो वा गरीव, पुरुष वा स्त्री, वृद्ध वा जवान,अथवा अपनिनके जहाँ बैठुईया हुई कौनो फरक नैपरी। परमेश्वर अपनिनहे प्रेम कैठाँ ओ अपनिनके येशूमे विश्वास करी कहिके ओँहाँ चहठाँ, ताकि अपनिनसे ओँहाँसे घनिष्ठ सम्बन्ध रहे।

येशू अपनिनहे ओँहाँमे विश्वास कैना ओ बप्तिस्मा लेहक् लग निम्ता डेहटटाँ। का अपनिनके येशू किल मसिह, परमेश्वरके एक मात्र छावा हुईट् कहिके बिश्वास नै कैबी ? का अपनिनके मै पापी बटुँ ओ परमेश्वरके दण्डके भागीदार बटुँ कहिके विश्वास नै कर्ठी ? अपनिनके पापके भार उठाके लै जैना येशु क्रुसमे मुँलाँ कहिके का अपनिनके विश्वास नै करबी ?

यदि अपनिनहे येशूमे ओ ओँहाँ अपनिनके लग् कैलाँ कहिके विश्वास कैबी कलेसे, अपनि एक ख्रीष्टियान हुई।

यदी अपनि एक ख्रीष्टियान हुई कलेसे,येशूके कैलक् काम परमेश्वर अपनिनके पाप क्षेमा कैडेले बटाँ। आब परमेश्वर अपनिनहे एक शत्रुके रुपमे नैहोके बरटुन् एक घनिष्ठ मित्रुके रुपमे हेरठाँ।

यदी अपनि परमेश्वरके मित्र हुई ओ येशू प्रभुके दास हुई कलेसे, आबसे अपनि येशू ख्रीष्टके सिखैलक् बाटके आज्ञापालन करी। अपनि एक ख्रीष्टियान हुइले से फेन्, अभिन अपनि पाप करे सेक्ना परिक्षामे परेसेक्बी। तर परमेश्वर विश्वास योग्य बटाँ ओ कहठाँ कि यदि अपनिनके अपन पाप प्रयाश्चित कैबी कलेसे, ओँहाँ अपनिनहे क्षेमा कै डिहिँ। पापके बिरुद्धमे सामना करके लग् ओँहाँ अपनिनहे शक्ति डैडिहिँ।

परमेश्वर अपनिनहे प्रार्थना कैना, ओँहाँक वचन पढक् लग्, आकुर ख्रीष्टियानसे आराधना करक् लग्, तब ओँहाँ अपनिक लग् का कैलाँ कहिके आउर जनहन् बटाई कहिँहिँ। यी सक्कु बाट्से अपनिनहे ओँहाँसे आकुर घनिष्ठ सम्बन्ध बह्रैनामे मदत मिली।