48. ४८. येशू प्रतिज्ञा कैलक् मसिह हुँइँछट्

जब परमेश्वर संसारके सृष्टि कैलाँ, सक्कु चिज सिद्ध रहे। ओँहाँमे कौनो पाप नैरहे। आदम ओ हव्वा एक–डोसरहे प्रेम करिँट्, ओ ओईने परमेश्वरहे प्रेम करिँट्। ओँहाँमे कौनो रोग वा मृत्यु नैरहे। उहे किसिमके संसार परमेश्वर चाह कैले रहिँट्।

फुलरियामे हव्वाहे झुक्काईक् लग् सँपवाद्धारा शैतान बोलल्। तब हव्वा ओ आदम परमेश्वरके विरुद्धमे पाप कैलाँ। ओईनके कैलक पापके कारण, मृत्यु, रोग तथा पीडा, यी सक्कु संसारके सारा मनैनके जीवनके हिस्सा बनल्।

आदम ओ हव्वा पाप कैलक ओरसे झन आउर ज्यादा भयानक हो गैल। ओइने परमेश्वरके शत्रु हो गैलाँ। फलस्वरुप, उहे समय पश्चात् सक्कु मनैनके जल्मटि जो पापी स्वभाव बटाँ, ओ ओईने फेन परमेश्वरके शत्रु हुँइट्। परमेश्वर ओ मनैनके बिचके सम्बन्ध पापके कारण टुटल्। तर टुटले सम्बन्धहे पुनस्थापन करक् लग् परमेश्वरसँगे एकठो योजना रहे।

परमेश्वर प्रतिज्ञा कैलाँ रहिँट् कि हव्वाके एकजाने सन्तानसे शैतानके शिर किच्लैहिँ, ओ शैतान ओकर लेँरिमे डसडिहिस्। एकर अर्थ यी रहे, कि शैतान मसिहहे मँुअँइना। तर परमेश्वर ओँहाँहे फेन् से जीवित तुल्याईना ओ मसिहहे शैतानके शक्तिक हे सदाके लग् किच् लैना, धेर वर्षके पाछे परमेश्वर येशूनहे पसिह हुईट् कहिके प्रकट कैलाँ।

जब परमेश्वर सारा पृथ्वीहे जलप्रलयद्धारा नाश कैलाँ, ओँहाँमे विश्वास कैना मनैनके लग् ओँहाँ जहाज प्रदाज कैलाँ। ठीक ओस्टे प्रकारसे, सक्कु जाने अपन पापके कारणसे नाश मे जैना योग्य रठाँ, तर परमेश्वर ओँहाँमे विश्वास कैना सक्कु जाने उद्धारके लग् येशूनहे प्रदान कैडेलाँ।

सयौं वर्षटक, पुजहारीनके मनैनके लग् ओइनके पापके खातिर ओइने पैना डण्डके बड्ला परमेश्वरहे निरन्तर रुपमे बलि डेलाँ। तर उ बल ीओइनके पाप उठाके लैजै नैसेकल्। येशू चाहिँ प्रधान –पुजाहारी हुँइँट्। आउर पुजाहारीनके आघे, ओँहाँ अपन आपहे एक मात्र किल बलिके रुपमे सौंप्लाँ जे संसारके सक्कु मनैनके पाप उठाके लै जैहिँ। येशू सिद्ध प्रधान–पुजाहारी रहिँईँट् काकरे कि हरेक मनैनके कैलक पाप के लग ओँहाँ डण्ड भोग्लाँ।

परमेश्वर अब्राहामहे कहलाँ, “पृथ्वीके सारा मनैनके जाति टैं द्धारा आशिष हुइहिँ।” येशू अब्राहामके एकठो सन्तान रहिन्। सक्कु मनैनके जाति ओँहाँद्धारा आशिषत् हुईहिँ, काकरे कि सक्कु जाने येशूनहे विश्वास कैहिँ, ओइने पापसे उद्धार पैैहिँ, ओ आत्मिक सन्तान बन्हिँ।

जब परमेश्वर अब्राहामहे ओँहँकार छावा, इसहाकहे, एक बलि स्वरुप चढाई कहलाँ, परमेश्वर बलिदानके लग् ओँहँकार छावा इसहाकके बदलामे एकठो थुमा प्रदान कैलाँ। हम्रे सक्कु जाने हमारीक पापके खातिर मुँना योग्य बटी।

जब परमेश्वर मिश्रदेशमे अन्तिम बिपत्ती पठैलाँ, ओँहाँ हरेक इस्राएलिन परिवारकहे एकठो सिद्ध ठुमाहे मारके ओ ओकर लहु ओइनके घरके डवारक् चौकोसमे डुनुपाँजर ओ उँपरका भट्ठी चौकोसमे लगाई कहलाँ। जब परमेश्वर उ रगत लागल् डेख्लाँ, ओँहाँ ओईनके घर छोरके गैलाँ ओ ओइनके बरकवा सन्तानहे नै मुँअँईलाँ। यी हे घटनाहे निस्तार चाड कहठाँ।

येशू हमारिक लग् निस्तारके चाडके ठुमा हुँइँट्। ओँहाँ सिद्ध ओ पाप रहिट रहिँट् निस्तारचाडके उत्सवके समयमे मनैनके मरलेरहिँट्। जब क्यौ येशूमे विश्वास करठ् , येशूके रगतसे उ मनैयाँक पापके मोल तिरजाइठ्, तब परमेश्वरके दण्ड उ मनैयाकमनसे छोरके जाईठ्।

परमेश्वर इस्राएलीनसे एकठो करार बन्धलाँ, ओइने ओँहाँक रोजलक् मनै रहिँट्। तर आब परमेश्वर एकठो लावा करार बनैले रहिँट्, जौ चाहिँ सकहुुनके लग उपलब्ध बा। यी लावा करारके कारण ओरसे, कौनो फेन मनैनके येशूमे विश्वास कैके परमेश्परके सन्तान बने सेकहिँ।

मोशा महान् अगमवक्ता रहिँट् जे परमेश्वरके वचनके घोषणा कैलाँ। तर येशू चाहिँ सबसे महान अगमवक्ता हुँइँट्। ओँहाँ परमेश्वर हुइँट्, उहेकमारे ओँहाँ कैलक् ओँहाँ कहलक् सबथोक् परमेश्वरके वचनके काम रहे। उहेकमारे येशुनहे परमेश्वरके वचन कहजाइठ्।

परमेश्वर दाउद रजवाहे प्रतिज्ञा कैले रहिँट् कि ओँहँकार सन्तान मनसे एकजाने रजवाके रुपमे सदा–सर्वदाके लग परमेश्वरके मनैनमे राज्य कैहिँ। काकरे कि येशू परमेश्वरके पुत्र ओ मसिह हुँइँट्, केवल ओँहाँ दाउदके विशेष सन्तान हुँइँट् जे सदा–सर्वदा राज्य करे सेक्ठाँ।

दाउद इस्राएलके रजवा रहिँट्, तर येशू चाहिँ सारा संसारके रजवा रहिँट्