42. ४२. यिसुके स्वरगरके ओरी लवट गेल

उहे दिन,जवन दिन यिसु मरलमेसे जि उठल रहे,ओकर चेलासबमेसे दुजना नजिकके गाओमे जाइत रहे । जब ओकनिके जाएते रहे,तब ओकनिके यिसुके जिबनमे कथी भेल रहे से,उ बिसयमे बातचित करैत रहे । ओकनिके असा कैले रहे कि,यिसु हि मसिह रहे,लेकिन यिसुके मुयादेलख । माने जनानिसब आके चेलासबसे कहलख कि,यिसु मरलमेसे जि उठलबा । ओकनिके नजनैत रहे कि,हमनिके कथिमे आ कैसे बिसबास करु

यिसु ओकनिसबके सङे बुलैत गेल,लेकिन ओकनिके यिसुके न चिन्हलख । जब यिसु ओकनिसे पुसलख कि,तोहनिके केकर बारेमे बात-चित कर रहल बारे । तब ओकनिके बिगतके समयमे यिसुके जिबनमे घटल घटनासबके बारेमे सभे बात यिसुके बतादेलख ।ओकनिके सोचैत रहेकि,ओकनिके कवनो परदेसिसे बातचित कर रहल बारी कहके ओकनिके ओकरा यरुसलेममे कथी भेलसे ओकरा मालुम नहोइ कहके बिचार करैत रहे ।

सेकरबाद यिसु ओकनिके परमेस्वरके बचन मसिहके बारेमे कथी कहले रहे से ब्यख्या कदेलख । सेकरबाद यिसु ओकनिके यियाद दिलैलख कि,अगमबक्तासब ओकर बिसयमे कथी कहले रहे,“मसिह कस्ट भोगी,आ मारल जाइ माने फेरु उ तिसरका दिनमे जि उठजाइ । जब उ गाओके पास पहुचलख तब ओकनिके दुनजना उहबे रहगेल,काहेकी साझ होगेल रहे ।

ओहिसे यि दुनुजना यिसुके भी सङे रहेके लेल अनुरोध कैलख,तब यिसु ओकनियसबके सङे उहबे रहगेल । जब ओकनिके रातके खाना खएकेलेल तयार भेल,तब यिसु रोटी लेके,परमेस्वरके धन्यबाद देलख आ रोटिके तुरके एक-एक टुकरा ओकनिके देलख । तब ओकनिके झटसे याद अएलख कि,यि त यिसु हि बा कहके ओकनिके चिन्हलेलख । तब यिसु उहे घरी ओकनिके नजरसे अलोपित होगेल ।

तब यि दुनुजना एक-आपसमे कहेलगलख कि, उ त यिसु रहे ! जब यिसु परमेस्वरके बचनसे हमनिके सम्झाइत रहे,त कथी हमनिसबके मनमे उतेजना आ उतसाह न मिल्ल रहे ? तब ओकनिके तखुनिय यरुसलेसे लवट गेल ।जब ओकनिके लवटके अएलख,तब ओकनिके चेलाबसे कहलख कि,“यिसु सचमुचमे जि उठल बा । हमनिके ओकरा देखली ।”

जब चेलासब एक आपसमे बातचित करते रहेकी,अचानक यिसु ओकनिसबके बिचमे आके खरा होगेल आ कनिसे कहलख,“ तोहनिसबके सान्ति मिले ।”लेकिन चेलासब सोचे लहलख कि,उ कवनो भुत बा । तब यिसु ओकनिसे कहलख,“तोहनिके काहेला डेराइत बारे,हमरा उपरी संखा करैत बारे ?” हमर हाथ आ गोर देख काहेकी अतमाके हडी आ मास न होइसै,जइसन कि,हमरामे देखैत बारे । तब यिसु ओकनिसे पुसलख कि, यिहा तोहनिके पास किसियो खाए बला चिज बा ?” तब ओकनिके यिसुके आगिमे पकाएल मसरीके एगो टुकरा देलख तब यिसु लेलख आ ओकनिके समनेमे खागेल ।

यिसु अपन चेलासबसे कहलख कि,“हमे तोहनिसबसे कहले रहली कि,हमर बारेमे परमेस्वरके बचनमे लिखल सभे बात पुरा होहिके रहे ।” तब यिसु ओकनिसबके समझ खोलदेलख,ताकी ओकनिके परमेस्वरके बचन बुझ सके । यिसु ओकनिसे कहलख,“यि त बहुत पहिलेही हमर बारेमे लिखल रहे कि,मसिह कस्ट भोगी,आ मारल जाइ,फिरभी तिसरका दि उ मरलमेसे जिके उठजाइ ।”

“धरमसास्तरमे अइसे भि लिखल रहे कि,हमर चेलासब परचार करी कि,हरेक अदमिसब अपन पापसे माफी पाएके लेल पसताप करेके परी । ओकनिके यि बात यरुसलेमसे सुरु करी,फिरभी हरक जगहमे आ हरेक जातमे परचार होजाइ ।तोहनिके यि बातसबके साक्सी होएबे ।”

चालिस दिनतक,यिसु अपन चेलासबके लगे बहुत बार देखाइ देलख । एकबार यिसु ५०० सय जनासे भि बहुत अदमिसबके लगे एकेबार देखाइ देलख । यिसु अपन चेलासबके बहुत किसिमसे हम जिते बारी कहके परमानित कैलख,आ यिसु ओकनिके परमेस्वरके राज्यके बारेमे सिखैलख ।

यिसु अपन चेलासबसे कहलख,“स्वरग आ पिरथिबिमे भेल सरा अधिकार हमरा देलेबा । ओहिसे जोअ,सभे जातके अदमिसबके बाप,बेटा आ पबितर अतमाके नाममे बपतिस्मा देअ आ चेला बना । तोहनिके हम जवन अग्या करब उ सभे बात पालन करेके लेल ओकनिके सिखा । यियाद कर कि,हम सभे दिन तोहनिसबके सङे सदाकेलेल रहब ।”

यिसु मरलामेसे जि उठला चालिस दिनके बाद,यिसु अपन चेलासबसे कहलख,“हम बाबु तोहनिके जब सक्ती दिइ,तब तोहनिमे पबितर अतमा आइ,जबतक पबितर अतमा न पैबे तबतक तोहनिके यरुसले छोरके केनहरो नजैहे ।“यरुसलेममे हि रहिहे” तब चेलासबके छोरके यिसु स्वरगमे चलगेल आ बादल यिसुके तोपदेलख तब चेलासबके नजरसे अलोपित होगेल । यिसु सभे चिज उपरी राज करके लेल परमेस्वर पिताके दहिना हाथके ओरी बैठलबा ।