23. २३. येशूके जनम

योसेफ नाउँके एकजने धर्मी मनइयाक्सँग मरियमके मंगनी हुइल रहिन्। जब् योसेफ मरियमहे गर्भवती हुइल पता पैनै तब् मरियमहे लाजमे नाइ परेदेहेक लग् चुप्पेसे छोरदेना विचार कर्नै। मने यैसिन कनौसे पहिले, हुँकार सपनामे स्वर्गदूत अइनै।

स्वर्गदूत उहिन कहनै, “योसेफ, मरियमहे अपन जन्नी स्वीकार कर्नासे नाय डराऊ। काहेकी हुँकार पेटेक् भित्तर रहल लर्का पवित्र आत्मासे आइल हुइतै। ऊ एकथो छावा जन्मैहीन्। लर्काक् नाउँ येशू धरहो – जेकर अर्थ हो, परमेश्वर बचैहीँ), काहेकी ऊ मनइन वैनके पापसे बचैहीँ।”

तबे योसेफ मरियमहे नाइ छोरनै ओ उहिनसे भोज कर्नै। जब्सम् लर्का नाइ हुइल तब्सम् योसेफ मरियमकेसँग नाइ सुत्नै।

मरियमके लर्का जन्मइना समय लग्गे आइगिल रहे, उहे समयमे रोमी सरकार सक्कु जहान जनगणनाके लग् आपन आपन पूर्खन्के देश जइना आदेश जारी करल। योसेफ ओ मरियम आपन पुर्खन्के सहर बेथलेहेम गइनै।

जब् वैने बेथेलेहेम पुग्नै बहाँ वैनके रहेक लग् ठाउँ नाइ भेटैनै। तब् गैयनके गोठमे जाके बैथ्नै। वहैँ मरियम लर्काहे जन्मैनिन् ओ लर्काहे डो“रवामे धर्निन्। काहेकी लर्काहे धारेक लग् औरे कौनो ठाउँ नाइ रहे। लर्काक् नाउँ ‘येशू' धर्नै।

उहे रात, ओथहि लग्गे खेत्वामे गोठालाहुँक्रे आपन भेँरिन् हेरतहैँ। अचानक स्वर्गदूतवैनकेथे देखा पर्ने, यी देखके गोठालाहुँक्रे डरैनै। तब् स्वर्गदूत कहनै, “नाइ डराऊ, काहेकी मई तोहोन बरे खुशीके खबर सुनाइ आयल बाटुँ। तोहोनके मसिह बेथलेहेममे जनम लैसेक्ले बाटैँ।”

जन्मल लर्काहे खोजे जाऊ, ओ तुह्रे उहिन लुग्गासे बेह्रल ओ डोरवामे सुताइल भेटैबो। तब् अचानकसे स्वर्गदूतहुक्रनसँग स्वर्गीय सेना देखा पर्नै। ओ वैने सबजे परमेशवरके प्रशंसा यैसिक कर्ने, “सर्वोच्चमे परमेश्वरहे महिमा ओ पृथवीमे जौन मनइनसे ऊ खुशी बाटैँ, वैनहे शान्ति।”

कुछ घचिपाछे, गोठालाहुँक्रे येशू जन्मल ठाउँमे आयपुग्नै ओ स्वर्गदूत जस्तेक कहले रहैँ ओस्तेक भेटैनै। वैने यी सब देखके बरे खुशी हुइनै। ओ परमेश्वरहे धन्यवाद चहै्रति आपन भेँरिन्थे लौट्नै।

कुछ समयपाछे, बरे दुरके पूरुबके ज्ञानी जयोतिषिहुँक्रे बद्रीमे एकथो यैसिन तोरैँया देख्नै। जेकर मतलब राजाहुक्रहनके राजा जन्मना कैके संकेत रहे। उहेमारे उहे राजाहे हेरेक लग् वैने बरे दुरसे बेथलेहेम अइनै। ओ येशू ओ हुँकार दाई–बाबा रहल ठाउँ पत्ता लगैनै।

जब् ऊ ज्ञानी जयोतिषिहुँक्रे येशूहे हुँकार दाईक्सँग देख्नै, वैने घोपत्या होके दण्डवत कर्नै ओ येशूक् आराधना कर्नै। वैने येशूहे सोन, धुप ओ मूर्रके भेटी चहै्रनै। तब् आपन घर लौट्नै।