28. २८. धनी जवान मनइया

एकदिन, एकजाने धनी मनइया येशूहे पुछल, “हे असल गुरु, अनन्त जीवनलग् महिन का करेक् परि?” येशू उहिन कहनै, “काहे तुँ महिन ‘असल’ कहतो? असल तो परमेश्वर किल बाटैँ। मने तुँ अनन्त जीवन पइना चहाथो कलेसे, परमेश्वरके कहल बात मानो।”

धनी जवन मनइया पुछल, “कोन कोन बात माने परि?” येशू कहनै, “हत्या नाइ करोहो। व्यभिचार नाइ करोहो। चोरी नाइ करोहो। झुठ नाय बोलोहो। आपन दाई–बाबाक् आदर करोहो, ओ आपन छिमेकीहे अपने जस्ते पे्रम करोहो।”

तब् ऊ जवान मनइया कहल, “मई तो यी सब बात छोट्टेसे मनती आइल बाटुँ। सदा जीयेक लग् अभिन महिन का करेक परि?” येशू उहिन हेर्नै ओ ओकरमे दया लग्निन्।

येशू कहनै, “यदि तुँ सिद्ध हुयना चाहाथो कलेसे, तोहार थन् रहल धनसम्पत्ति बेचके गरीबहुक्रहन बाँतदेऊ, ओ स्वर्गमे तुँ धन पैबो। तब् आऊ ओ मोरपाछे लागो।”

जब् ऊ धनी जवान मनइया येशूक बात सुनल, ऊ बरे दुखी हुइगील, काहेकी ऊ ज्यादै धनी रहे ओ आपन धन देहे नाइ चहले रहे। तब् वहाँसे चलगिल।

येशू आपन चेलाहुक्रहन कहनै, “धनी मनइहुँक्रे परमेश्वके राज्यमे छिर्ना बहुत कर्रा बा।”

जब् चेलाहुँक्रे येशूक् कहल यी बात सुन्नै, वैने अचम पर्नै ओ पुछ्नै, “तो के मुक्ति पाई?”

येशू चेलन्ओर हेरके कहनै, “मनइाके लग् यी असम्भव बा, मने परमेश्वरके लग् सब समभव बा।”

पत्रुस येशूहे कहनै, “हमे्र सब चीज छोरके तुहिन पछ्रयइले बाटी। हमार लग् का इनाम रही?”

येशू जवाफमे कहनै, “जे मोर नाउँके लग् आपन घर, दादाभाइ, बाबा, दाई, छाईछावा, ओ धनसम्पत्ति छोर्ले बा, वैने सय गुणा धेउर पैहीँ ओ वैने अनन्त जीवन फे पैहीँ। मने अब्बे जे आगे बाटैँ, वैने पाछे हुइजिहीँ ओ जे अब्बे पाछे बा, वैने आगे हुइजिहीँ।”