34. ३४. येशू आउर कथा फे बतैनै

परमेश्वरके राज्यके बारेमे येशू आउर फे धेउरे कथा बतैनै। उदाहरणके लग्, ऊ कहनै, “परमेश्वरके राज्य एकथो लाहीक् बिया जस्ते हो, जौन कोइ मनइया आपन खेतवामे लगाइल। तोहोनहे पतै बा, कि लाहीक् बिया सबसे छोट बिया रहथ।”

“मने जब् लाहीक् बिया जामथ, तब् ऊ बगैँचामे रहल सक्कु बोँटहुँक्रहनमन्से सबसे चारी रहथ, अत्ना भारी कि चिरईँहुँक्रे फे आके ओकर दहिँयामे आराम कर्थै।”

येशू अउरे कथा कहनै, “परमेश्वरके राज्य खमिर जस्ते हो जौन एकथो जन्नी रोटी बनाइक लग् पिठामे मिलाइल, ओ खमिरल ऊ पिठाहे खमिरी बनादेहेल।”

“परमेश्वरके राज्य एक गारल धन जस्ते हो, जिहिन कौनो मनइया माटीक भित्तर नुकाके धरले रहे। कौनो अउरे मनइया ऊ गारल धनहे भेटायल ओ फेन उहिन गारदेहेल। तब् ऊ मनइया बरे खुशी हुइल,कि ऊ गइल ओ आपनथे हल सक्कु चीज बेचल ओ बृचके आइल पैसासे धन गारल वला खेतवा किनल।”

“परमेश्वरके राज्य मूल्यवान मोती जस्ते हो। जब् कौनो एक मोतीके व्यापारी ऊ मोतीहे भेटायल, व्यापारी माइया आपनथे रहल सक्कु चीज बेचल ओ बेचके आइल पैसासे मोती किनल।”

तब् येशू एकथो कथा ऊ मनइहुँक्रहन सुनैनै जे आपन काममे भरोा करैँ और अउरे मनइनहे घृण करैँ। येशू कहनै, “दुईथो मनइ मन्दिरमे प्रार्थना करे गइनै। एकथो कर उठुइया रहे ओ एकथो धार्मिक अगुवा रहे।”

“धार्मिक अगुवा यैसिके प्रार्थना करल, ‘धन्यवाद,परमेश्वर, मई अउरे मनइहुँक्रहन जस्ते पापी नाइ हुँ (जस्ते:लुटेराहुँक्रे, अन्यायी मनइहुँक्रे, व्यभिचारीहुँक्रे वा कर उठुइया मनइया जस्ते)।’”

“मई हरेक हप्ता दुईचोट उपवास बैथ्थु ओ मई दशांस फे देथुँ।”

“मने कर उठुइया मनइया ऊ धार्मिक अगुवासे दुरे बैथल, ओ स्वर्गओर आपन आँखी फे नाइ उठाइल। बरु, ऊ आपन छाती पिटके यैसिके प्रार्थना करल, ‘परमेश्वर, मोरमे दया करो काहेकि मई एक पापी हुँ।’”

ओकरपाछे येशू कहनै, “जात्तिसे मई तोहोन कहतु, परमेश्वर ऊ कर उठुइया मनइयाके प्रार्थना सुन्नै ओ उहिन धर्मी ठहरैनै। मने परमेश्वरहे ऊ धर्मि मनइयाके प्रार्थना मन नाइ पर्निन्। हरेक जे अपने आपहे भारी ठानी, परमेश्वर उहिन होच्यइहि, मने जे अपने आपहे होच्याइ ऊ भारी पाराजाइ।”