42. ४२. येशू स्वर्ग लौट्नै

येशू मूके जीई उठल दिनमे, हुँकार दुईथो चेलाहुँक्रे लग्गेक् गाउँओर जाइतहैँ। वैनै नेङ्ति नेङ्ति येशूक् बारेमे बात बतावाइतहैँ। वैने आशा कर्ले रहैँ कि येशू मसिह हुइतै कैके, मने ऊ तो मारागैनै। अब जन्नीहुँक्रे कहतै कि येशू फिनसे जीई उठगिल बाटैँ। वैन केकरमे विश्वास करि कैके पतै नाइ पाइतहैँ।

तब् येशू वैनथे आइगिनै ओ वैनसँग नेङ्गे लग्नै,मने वैने येशूहे चिहिन नाइ पैनै। येशू वैनहे केकर बोमे बात बतवाइतो कैके पुछ्नै, वैने येशूक् बारेमे बात करति कैके सब बात बतैनै। वैने यि सोच्ले रहैँ कि वैने परदेशी मनइयासे बात करति जे यरुशलेममे का हुइल कैके नाइ जन्ले हो।

तब् येशू वैनहे प्मेश्वरके वचनमे मसिहके बारेमे का कहल बा कैके मजासे बतादेनै। येशू वैनहे अगमवत्ताक् कहल बात सम्झना करवैनै कि मसिह दुख भोगि ओ माराजाई मने तिसर दिनमे फे जीई उठजाइ। वैने जौन गाउँजाइतहै उहे गाउँपुग्नै, जहाँ वैने बैथ्ना योजन बनैले रहैँ, ओ साँझ हुइगिल रहे।

ऊ दुई मनइ येशूहे आपनसँग वहैँ बैथे कहनै, तबे येशू वैनसँग बैथ्नै। जब् वैने बेरि खाइ बैथ्नै, येशू रोटीक् टुक्रा लेनै, परमेश्वरहे धन्यवाद चह्रैनै, ओ रोटी टुर्नै। अचानक वैने यि मनइया येशू हुइतै कैके चिहिन्नै। मने तब्बेहि, येशू ओथ्थिसे हेराइगिनै।

ऊ दुई मनइ एक–दोसरहे कहनै कि यि तो येशू रहैँ।

जब् चेलाहुँक्रे बात बतवाइतहैँ, अचानकसे येशू वैने रहल कोठामे वैनथे देखा पर्नै ओ कहनै, “तोहोनहे शान्ति

येशू कहनै, “मई तोहोन कहल ेरहुँ कि मोर बारेमे परमेश्वरके वचनमे लिखल सब बात पूरा हुइहिक् परि।” तब् येशू वैनके समझ खोलदैनै ताकि वैने परमेश्वरके वचन बुझेसेकैँ। येशू कहनै, “यि बात तो पहिलेही लिखल रहे कि मसिह दुख भोगि, मूई ओ तिसरि दिनमे जीई उठी।”

“वरमेश्वरके वचनमे यैसिक फे लिखल बा कि मोर चेलाहुँक्रे घोषणा करिहि कि सक्कुजाने पापसे क्षमा पाइक लग् पश्चताप करेक परि। वैने यि बातके घोषणा कर्ना सुरु यरुशलेमसे करिहिँ, ओ तब् सारा जातके मनइनथे जैहिँ। तुह्रे यि बातके साक्षी बन्बो।”

तब् चालिस दिनसम्, येशू आपन चेलाहुँक्रहनथे धेरे चोट देखा पर्नै। एकचो, येशू ५०० से धेर मनइनथे देखा पर्नै। येशू आपन चेलाहुँक्रहन मई जीत्ती बाटुँ कैके प्रमाणित कर्नै ओ परमेश्वरके राज्यके बारेमे सिखैनै।

येशू हुँकार चेलाहुँक्रहन कहनै, “स्वर्ग ओ पृथ्वीमे रहल सक्कु चीजमे महिन अधिकार दियागिल बा। उहेमारे जाऊ, सक्कु जातिक् मनइन बाबा, छावा ओ पवित्र आत्माके नाउँमे बप्तिसमा दैके चेला बलाऊ ओ वैनहे मोर कहल बात माने सिखाऊ। याद राखो, मई तोहानके सँगे रहम।”

येशू जीई उठ्लेक चालीस दिनपाछे, आपन चेलाहुँक्रहन कहनै, “मोर बाबाक् प्रतिज्ञा, पवित्र हात्मा मई तोहोनथे पठैम, मने जब्सम् तुह्रे शक्ति नाइ पैबो तुह्रे यरुशलेममे बैथल रहहो।” तब् येशू उप्पर स्वर्गमे गइनै, ओ बदरी उहिन चेलाहुँक्रहनके नजरसे छोपदेहेल। येशू सक्कु चीजमे राज्य करे परमेश्वरके दाहिन पँजार बैतल बाटैँ।