41. ४१. परमेश्वर यशूहे मूवलमन्से जीई उठैनै

सिपाहीहुँक्रे येशूहे क्रुसमे टाँङ्ग्के सेक्लेक पाछे, यहूदी अगुवाहुँक्रे पिलातसहे कहनै, “ऊ झठा येशू तीन दिनपाछे फे जीई उठजिम कहले रहे। ओक् चेलाहुँक्रे ओकर लास तोरके लैजाइ सेकिहि ओ तीन दिनपाछे जीई उठगिल कैके मनइन बताइ लगिहिँ। तबे चिहानके आगे पहरा लगाइक् लग् हुकुम देऊ।”

पिलातस कहनै, “एक–दुई सिपाहीहुँक्रे लैजाऊ ओ चिहानहे सुरक्षित रखहो।” उहेमारे वैने चिहानके दुवार बनाइल पथ्रामे एकथो छाप लगैनै ओ कोई फे शरीर नाइ चोरे सेकैँ कैके सिपाहीहुँक्रहन वहाँ धर्नै।

येशूहे गर्लेक दोसर दिन शबाथ दिन रहे, यि दिनमे यहूदीह्“क्रे चिहानमे जइना मनाही रहे। उहेमारे शबाथ दिनके दोसर दिन बिहान्ने मरियम मग्दलिनि ओ दोसर वला मरियम चिहानमे येशूक् शरीरमे अत्तर लगाइ गैइनै।

अचानकसे, एकथो स्वर्गदुत चिहान वहाँ देखा पर्नै तबे वहाँ भारी भूकम्प अइलस, स्वर्गदूत चिहानहे बन्द करल पथ्राहिन् हटादेनै ओ आकर उप्पर बैथगिनै। चिहानके पहरा करुइया सिपाहीहुँक्रे डरैनै ओ मूवल मनइन जस्ते भुँइयामे गिरगिनै।

जब् दुनु मरियम चिहान वहाँ पुग्नै, स्वर्गदूत वैनहे कहनै, “नाइ डराऊ। येशू यहाँ नाइ होईँ। ऊ जस्ते कहले रहैँ कि फिनसे जीई उठम आस्तेक् मूवलमन्से जीई उठल बाटैँ।”

तब् स्वर्गदूत ऊ जन्नीहुँक्रहन कहनै, “जाऊ ओ चेलाहुँक्रहन यि बात बतादेऊ, कि येशू मूवलमन्से जीई उठल बाटैँ। ओ ऊ तोहोनसे आघे गालीलमे पुगल रहिहीँ।

ऊ जन्नीहुक्रे डराइल फे रहै ओ बरे खुशी फे रहै। यि खबर सुनाइक् लग् दौड्ति चेलाहुक्रहनथे गइनै।

जब् ऊ जन्नीहुँक्रे चेलाहुँक्रहन यि खबर सुनाइ जैति रहैँ, अचानकसे येशू वैनके आघे देखा पर्नै, तब् वैने हुँकार आराधना कर्नै। येशू कहनै, “नाइ डराऊ। जाऊ ओ मोर चलाहुँक्रहन गालीलमे जाइ कहो। वैने महिन गालीलमे देखिहिँ।”