44. ४४. नाङ्गर मनइया निक हुइल

एकदिन पत्रुस ओ यूहन्ना मन्दिर जाइतहैँ। मन्दिरके दुवारमे पुग्नै तो एकथो नाङ्ग् मनइयनहे देख्नै जे भीख मागतेहे।

पत्रुस ऊ नाङ्गर मनइयाक्ओर हेरके कहनै, “तुहिन देहेक लग् मोरथे पैसा तो नाइ हँ। मने मोरथे ज्या बा उहे मई तुहिन देम। येशूके नाउँमे, उठो ओ नेङ्गो।”

तरुन्ते, परमेशवर ऊ नाङ्गर मनइयाहे निक पर्नै, ओ ऊ नेङ्ग्ति ओ उल्रति परमेश्वरके प्रशंसा करे लागल। मन्दिरके चौकमे रहल मनइ यि देखके अचम पर्नै।

एक्केघचिमे मनइनके भीर ऊ निक हुइल मनइयाहे हेरे आइगिल। पत्रुस वैनहे कहनै, “यि मनइया निक हुइगिल कैके काहे तुह्रे अचम बाटो? हम्रे उहिन आपन शक्तिसे निक नाइ पर्लि, यि तो येशूके शक्तिसे, उहाँ मे रहल विश्वाससे निक हुइल।”

“तुह्रेहि हुइतो जे रोमी राज्यपालहे येशूहिन् मारे कहलो। हमाहन बनूइयाहे तुह्रे मर्लो मने परमेश्वर उहिन जीई उठैनै। का करति कैके तोहोन पता नाइ रहे, मने परमेश्वर अगमवाणी पूरा हुइक लग् तोहोनहे चलैनै, कि मसिह दुख भोगिहिँ ओ मूहीँ। उहेमारे अब्, पाप स्वीकार करो ओ परमेश्वरकेओ् लौटो, तोहोनके पाप धोयाजाइ।”

पत्रुस ओ यूहन्नाक् बातसे मन्दिरके अगुवाहुँक्रे रिसेनै। तबे अगुवाहुँक्रे वैन पकरनै ओ झ्यालखानामे दारदेनै। मने धेउरे मनइ पत्रुसके बातमे विश्वास कर्नै, ओ येशूमे विश्वास करुइया मनइन लग्भग् ५००० हुइगिल।

दोसर दिन, यहूदी अगुवाहुँक्रे पत्रुस ओ यूहन्नाहे मूख्य पूजाहारी ओ धर्म अगुवाहुक्रहनथे लैगिनै। वैने पत्रुस ओ यूहन्नाहे पुछ्नै, “कोन शक्तिसे तुह्रे यि नाङ्ग्राहे निक पर्लो?”

पत्रुुस जवाफ देनै, “तोहानके आघे ठरह्याइल मनइया येशू मसिहके शक्तिसे निक हुइल। तुह्रे येशूहे कु्रसमे टँग्लो, मने परमेश्वर उहिन फिन्से जीत्ती पर्नै।”

पत्रुस ओ यूहन्ना यैसिके साहसके साथ बोलत देखके ऊ अगुवाहुँक्रे अचम पर्नै काहेकि वैने साधारण मछुवारा ओ नाइ पह्रल– लिखल रहैँ। मने ऊ अगुवाहुक्रहन याद अइनिन कि यैने येशूक्सँग रहैँ। तब् पत्रुस ओ यूहन्नाहे धम्की दैके छोरदेनै।