23. येशुकी जनम

योसेफ नाम काहान बालो एक धर्मी आदमी संग नगनी भओ रहए। जब मरियम गर्भवती भओ पता पाई, बाको गर्भमे रहान बालो बच्चा मिर ना हए कहीके पता रहए। योसेफ मरियमके सरम करनके ना चाहत रहए, तही बा गोप्पे रुपमे मरियमके छोडन योजना बनाई। पर बा अइसे करनसे अग्गु, बाको सपनामे एक स्वर्गदुत बाकी ठिन आओ।

बाके स्वर्गदुत कही, “ योसेफ, मरियमके अपनी बैयरके रुपमे स्वीकारन मत दराए। काहीकी बाकि भितर राहान बालो बच्चा पवित्र-आत्मासे आओहाए। बा एक लौणा जन्माबैगी। बाको नाम यशु धरिए(जाको अर्थ हए, ‘याहोवे बचाबैगो’), काहेकी बा आद्मिनके बिनकी पापसे बचाबैगो।”

तही योसेफ मरियमसंग बिहा करी और बाके अपनी बैयरके रुपमे अपन घरमे लैगओ, पर बच्चाकि जनम नाभओ समले योसेफ मरियमसंग नासोई।

मरियम बच्चा जन्मनकी समय डीगई आन बेला, रोमी सरकार सब जनैके जनगणनाकि ताही अपन पुर्खा राहान बालो शहरमे जानके आदेश जारी करी। योसेफ और मरियम बे राहान बालो ठाउ नासरतसे बेथलेहेम समले लम्बो यात्रा कारनके रहए, कहीकी बिनकी पुर्खा दाऊदकी शहर बेथलेहेम रहए।

जब बे बेथलेहेममे पुगे, हुना रहानकी कोइ ठाउ नारहए। बे एक ठाउँ खाली डुद्पाई रहए बो जनावरकी राहान बालो सार रहए। बच्चा हुनै जनमो और मरियम बाके डोणामे धरी, काहेकी बच्चाके धरन ताही कोइ ठाउँ नारहए। बे बच्चाकी नाउ येशु धरी।

बो रात, डीगईकी खेतमे कुछ गोठाला अपन सारकी लख्बारी करत रहए। अचानक, चमकत एक जनै स्वर्गदुत बिनकी ठिन देखा परो, और जा देखके बे डराई गए। स्वर्गदुत कही, “ मत डराओ, काहीकी मिर ठिन तुम्हर ताही खुशीकी सामाचार हए। तुम्हर मसिह बेथ्लेहेममे जनमो हए

“बच्चाके डुडन जाबओ, और तुम बाके कपडामे बिडो और डोणामे सोत पाबैगे।” अचानक, आकाश परमेश्वरकी प्रसंशा करत स्वर्गदुतद्वारा अइसे कहात भरो “सर्वोच्चमे परमेश्वरकी महिमा, और पृथ्वीमे जौन आद्मिनकी संग बा प्रसन्न हए, बिनके शान्ति

कुछ देरमे, गोठाला येशु जन्मन बालो ठाउँमे पुगे और स्वर्गदुत कही जैसो बाके डोणा सोत पाबैगे। बे गजब उत्साहित रहए। मरियम फिर गजब खुशी रहए। गोठाला, बे देखे-सुने सब बातकी ताही परमेश्वरके प्रसंशा चडात् अपनी भेडा भओ खेतमे घुमगए।

कुछ देरमे, दुर अगारके ज्ञानी आदमी आकाशमे अनौठो तारा देखि। बाको अर्थ यहुदीनकी एक जनै नया राजाकी जनमो हए कहीके बे पता पाई। तही बो राजाके देखन ताही लम्बो यात्रा करी। बे बेथलेहेममे आए येशु और बाकी अइया-दौवा रहान बालो ठाउँ पता लगाई।

जब बे ज्ञानी आदमी येशुकी अइया संग देखि, बे घुप्टा करके दण्डवत करी और बाको आराधना करी। बे येशुके बहुमुल्य उपाहार चडाई। तओ फिर बे अपन अपन घर घुमगए।