48. येशू प्रतिज्ञा करो मसिह हए

जब परमेश्वर संसारको सृष्टि करी, सब बात सफा रहए। हुना कोई पाप ना रहए। आदम और हव्वा एक दुस्रेक प्रेम करत् रहंए, फिर बे परमेश्वरके प्रेम करत रहंए। हुना कोई रोग वा मृत्यु ना रहंए। सो परमेश्वरको चाहो संसार रहए।

बगियामे हव्वाके झुक्कानके ताहीं शैतान साँपद्वारा मस्की। फिर हव्वा और आदम परमेश्वरको विरुद्धमे पाप करीं। बेनको करो पापको कारणसे, मृत्यु, रोग और पिडा, जे सब संसारके पुरा आदमीको जीवनको एक हेस्सा बनिगओ।

आदम और हव्वा पाप करके कारणसे कुछ बात और बढी भयानक होनके गओ। बे परमेश्वरके शत्रु हुइगए। फलस्वरुप, बो समय पश्चात सब आदमी जन्मी खिनक पाप-स्वभावके हएं और बे फिर परमेश्वरके शत्रु हएं। परमेश्वर और आदमीनको बीचमे सम्बन्ध पापको कारणसे टुटगओ। पर बो सम्बन्धके पुनस्थापित करन परमेश्वरसंग एक योजना रहए।

परमेश्वर प्रतिज्ञा करी रहए कि हव्वाको एक जनै सन्तानको शिर कुलच्याबैगो, और शैतान बाको कुर्कुच्चा काटैगो। जाको अर्थ जा रहए, कि शैतान मसिहके मारैगो, पर परमेश्वर बाके फिर जीवित तुल्याबैगो, आर मसिह शैतानको शक्तिके सदाको ताहीं कुल्च्याबैगो। गजब वर्ष पिच्छु, परमेश्वर येशू नए मसिह हए कहीके प्रकट कर्दै।

जब परमेश्वर पुरा पृथ्वीके जलप्रलयसे नाश करी, बाको उपर विश्वास करन बाले आदमीनके ताहीं जाहज प्रदान कर्दै। ठिक बहे ढंगसे, सब जनै अपन पापको कारण नाश करन योग्यके हँए, पर परपरमेश्वर बाको उपर विश्वास करन बाले सबके उद्धार करन ताहीं येशू प्रदान कर्दै हए।

सयौँ वर्षसम, पूजाहारी आदमीनके ताहींबिनको पापको खातिर बिनको पानबालो दण्डको सट्टा परमेश्वरके निरन्तर रुपमे बली चढाई दै। पर बे बलि बिनको पाप ना उठापाई। येशू चाहीं प्रधान-पूजाहारी हए। और पूजाहारीनको अग्गु, बा आपनो एकमात्र बलिको रुपमे सुम्पदै जौन संसारको सबए आदमीनको पाप उठाई लाबैगो। येशू सिद्ध प्रधान-पूजाहारी रहए काहेकी सबए आदमी करो सब पापको ताहीं बाको दण्ड भोगी।

परमेश्वर अब्राहमसे कही, “पृथ्वीके सब आदमी जाति तोसे आशिषत होमंगे।” येशु अब्रहामको एक सन्तान होबैगो। सब आदमी जाति बोसे आशिषत् होमंगे, काहेकी सब जनै जौन येशूमे विश्वास करत् हएं, बे पापसे उध्दार पामंगे , और अब्राहमके आत्मिक सन्तान बनंगे।

जब परमेश्वर अब्राहमके बो लौणा, इसहाकके एक बलि स्वरूप चढान कही, परमेश्वर बलिके ताहि बोको लौणा इसहाकको सट्टामे थुमा प्रदान करी। हम सब जनै हमरो पापके खातिर मरन योग्य हएं

जब परमेश्वर मिश्रदेशमे अन्तिम बिपती पठाई, बा हरेक इस्राएली परिवारके एक सिदध थुमाके मर्न और बोको रगत बिनको घरको फाटकके चौखटमे दोनए घेनके खम्मामे और उपरके भागमे लगानके कही। जब परमेश्वर बो रगत देखी, बा बिनके घरके छोडके गओ और बिनके जेठो सन्ताननके मरी नाए जा घटनाके निस्तार तेवहार कहात हएं।

येशु हमरे ताहीं निस्तारको थुमा हए। बा सिध्द और पाप रहित हए और निस्तार तेवहारको उत्सवको समय मरो रहए। जब कोहि येशुमे विश्वास करत हए, येशुको रगत बो आदमीको पापको मोल तिरदेत हए, त्ओ परमेश्वरको दण्ड बो आदमीके छोडके जात हए।

परमेश्वर इस्राएलीनके संग एक करार बाँधी, बे बाके चुने आदमी रहएं। पर अब परमेश्वर एक नयाँ करार बनाइ हए, जौन चाहिं सबके ताहीं उपलब्ध हए। जा नयाँ करारके कारणसे, कोइ फिर आदमी येशुमे विश्वास करके परमेश्वरको सन्तान बनन सिक्त हए।

मोशा महान अगमवक्ता रहए जौन परमेश्वरको वचन घोषणा करी। पर येशु चाहिं सबसे महान अगमवक्ता हए। बा परमेश्वर हए, तबहि बा करेभए और कही भइ सब चीज परमेश्वरको वचनको काम रहए। जहेमारे येशुके परमेश्वरको वचन कहात हएं।

परमेश्वर दाउद राजाके प्रतिज्ञा करी रहए कि बिनको सन्तान मैसे एक जनै राजाके रुपमे सदासर्बदाके ताहीं परमेश्वरके आदमीनके उपर राज्य करैगो। काहेकी येशु परमेश्वरको लौणा और मसिह हए बा दाउदको बो बिशेष सन्तान हए जौन सदा-सर्बदा राज्य करन सिक्त हए।

दाऊद इस्राएलको राजा रहए, पर येशूचाहिँ सारा संसारको राजा हए