49. परमेश्वरको नयाँ करार

एक स्वर्गदुत मरियम नाउँ करी एक कन्यासे कही, कि बो परमेश्वरको लौणाके जन्म देबैगी। तबहि जब बो हबए एक कन्यए रहए, बो एक लौणा जन्मइ और बाको नाउँ येशु रखि। त्ओ येशु परमेश्वर और आदमी दोनए रहए।

येशु बहुत अचम्मोको काम करी, जौन प्रमाणित करत् हए कि बा परमेश्वर हए। बा पानि उपर नेगी, आंधीके शान्त करी बहुत रोगी आदमीनके अच्छो करी,दुष्टात्मा निकारी, मरे आदमीनके जीवित करी, और पाँच रोटी दुइ मछ्रीसे ५,००० से फिर जद्धा आदमीनके प्रशस्त कर्के खान पुगन जैसो खबायके अपनयके प्रमाणित करी।

येशू महान् शिक्षक फिर रहए, फिर बा अधिकारको साथ मस्कत रहए काहेकी बा परमेश्वरको लौणा रहए। बा सिकाई कि तुम आदमिनके उइसी नए प्रेम करन पडैगो जैसे तुम अपनयके प्रेम करत हओ।

बा जा फिर सिकाई कि तुम परमेश्वरके और सबसे जद्धा प्रेम करन पडैगो, तुमहर धन-सम्पतिनके फिर जद्धा।

येशू कही कि परमेश्वरको राज्य संसारमे भओ कोई फिर बातसे जद्धा मूल्यवान हए। कोइकी ताहीं सबसे जद्धा महत्वपूर्ण बात कहेसे परमेश्वरको राज्यको हकदार होन हए। परमेश्वरको राज्यमे प्रवेश करन, तुम अपन पापसे उद्धार पान पडैगो।

येशू सिकाई कि कुछ आदमी बाके पामंगे और बचामंगे, पर और ना पामंगे। बा कही कि कोई आदमी अच्छो जमिन जैसे हँए। बे येशूको सु-समाचार प्राप्त करत् हँए और बचात हँए। और आदमी चाहीँ डगरको कर्रो जमिन जैसे हँए, जहाँ परमेश्वरको वचनको बिऊ छिर्कत हँए और कुछ फसल ना होतहँए। बे आदमी येशूको बारेमे संदेशके इन्कार करत् हँए और बाको राज्य भितर घुसन ना पामंगे।

येशू सिकाई कि परमेश्वर पापीनके गजब प्रेम करत् हए। बा बिनए सबके छेमा देन चाहँत हए और बिनके सन्तान बनान चाहँत हए।

येशू जा फिर कही कि परमेश्वर पापके घृणा करत हँए। जब आदम और हव्वा पाप करीं, जासे बिनको सब सन्तानके असर पडो। फलस्वरुप, संसारमे सब आदमी पाप करत हँए और परमेश्वरसे अलग भयहँए। तसर्थ, सब जनै परमेश्वरसे दुर भयहँए।

पर परमेश्वर संसारमे भओ सबके इत्तो प्रेम करत हए कि बा अपन इकल्लो एक लौणा दै, ताकी येशू उपर विश्वास करन बाले कोईके फिर बिनको पापको सजाय भूगतन ना पडए, पर परमेश्वर संग सदा-सर्वदा बचे रहाँए।

तुम्हार पापकीसे, तुम्हार दोषी और मारन योग्यको हए। परमेश्वर तुम्हार संग क्रोधित होनके हए, पर बा अपन गुस्सा तुम्हार सट्टा येशू उपर उतार दै। जब येशू क्रुसमे मरो, बा तुम्हार सजाय भोगी।

येशू कभु पाप ना करी, पर बा सजाय भुक्तन और तुम्हार और संसारके सब आदमीनको पाप उठाई लैजान सिद्ध बलिको रुपमे मरन चाही। येशू अपनए समर्पण करी तही, परमेश्वर कोई फिर पापके छेमा करन सकैगो।

अच्छो काम तुमके बचाई ना पयहए। परमेश्वर संग सम्बन्ध धरन तुम्हर करन सिकन बाको कोई चिज ना हए। येशू खाली तुम्हर पाप धोई पयहए। तुम जा विश्वास करओ कि येशू नए परमेश्वरको लौणा हए, कि तुम्हर सट्टा बा क्रुसमे मरो, और परमेश्वर फिर जिन्दा कर्के उठाई।

येशूमे विश्वास करन बाले और बाके अपन मुक्तिदाता कहीके ग्रहण करन बाले सबके परमेश्वर बचाबैगो। पर बाको उपर विश्वास ना करन बाले कोइके फिर बा ना बचाबैगो। तुम धनी होबओ वा गरिब, लौणा वा लौणिया, बुड्ढा वा जवान, अथवा तुम काहाँ बैठत हओ, कुछ फरक ना पडैगो। परमेश्वर तुम्के प्रेम करत् हए और तुम येशूमे विश्वास करओ कहीके चाहँत हए, ताकि तुम्हर संग बाको घनिष्ठ सम्बन्ध होबए।

येशू तुमके बामे विश्वास करन और बप्तिस्मा लेन निउतो देतहए। का तुम येशू नए मसिह, परमेश्वरको खालि एक लौणा हए कहीके विश्वास करत हओ? का तुम अपनयके पापी और परमेश्वरको दण्डको भागीदार हओ कहीके विश्वास करत हओ। तुम्हए पा उठान येशू क्रुसमे मरो कहीके तुम विश्वास करत हओ?

अगर तुम येशूमे और बा तुम्हर ताहीं का करी कहीके विश्वास करत हओ कहेसे, तुम एक खिष्टियन हओ

अगर तुम एक खिरष्टियन हओ कहेसे, येशू करो कामसे परमेश्वर तुम्हर पाप छेमा कर्दै हए। परमेश्वर अब तुम्के एक शत्रु नाहओ, बरु एक घनिष्ठ संगी मानत हए।

अगर तुम परमेश्वरके संगी हओ और येशू प्रभुको दास हओ कहेसे, तुम अब येशूको सिकाओ भओ बातके आज्ञापालन करन चाहाबैगो। तुम एक खिष्टियन हओ बो फिर, और तुम पाप करन परीक्षामे पारैगे। पर परमेश्वर विश्वासयोग्य हए फिर कहात हए कि अगर तुम अपन पापको प्रयाश्चित करत हओ कहेसे, बा तुम्के छेमा करैगो। पापको विरुद्ध सामना करन बा तुम्के शक्ति देबैगो।

परमेश्वर तुम्के प्रार्थना करन, बाको वचन पढन, दुसरे ख्रीष्टियन संग आराधना करन, फिर बा तुम्हर ताहीं का करी हए दुसरेके बतान कहात हए। जे सब बातसे तुमके बाको संग और घनिष्ठ सम्बन्ध करन मदत करत हए।