50. येशू फिर आबैगो

करिब २,००० वर्षसे, संसार भरके गजबसे गजब आदमी येशू मसिहको बारेमे सु-समाचार सनतए आत हँए। मण्डलीको वृद्धि होत हए। येशू प्रतिज्ञा करी रहए कि संसारको अन्त्यमे बा घुमके आबैगो। बा हबे सम त ना घुमो हए, पर बा अपन प्रतिज्ञा पूरा करैगो।

जब हम येशूको आग्मानको प्रतिक्षा करंगे, हम पवित्रताकी डगरमे जीवन जिमए कहीके परमेश्वर चाहँत हए, जौन आदर कर हए। हम दुसरेके फिर बाको राज्यको बारेमे बतामंए कहीके बा चाहत हए। जब येशू संसारमे रहए, बा कही, “मिर चेला परमेश्वरको राज्यको बारेमे पुरा संसारके आदमीनके सु-समाचार प्रचार करंगे, फिर तही खाली अन्त्यको दिन आबैगो।”

गजब आदमी जाति हबे फिर येशूको बारेमे ना सुनी हँए। स्वर्गमे घुमनसे अग्गु बा खिष्टियनके बे आदमीनके सु-समाचारकी घोषणा करन कही, जौन कभु जाको बारेमे सुनी ना रहए। बा कही, “जाओ और सब जातिके आदमीनके चेला बनाबओ

येशू जा फिर कहीकी, “कोई दास अपन मालिकसे बडो ना होबैगो। जैसे जा संसारके आदमी मुक घृणा करीं, बे मिर खातिर तुम्के कष्ट देमंगे और मारंगे। जा संसारमे तुम कष्ट भोगैगे फिर भी, उत्साहीन होबओ, काहेकी मए जा संसारको शासन करन बालो शैतानके हराओ हँओ। अगर तुम अन्त्य सम विश्वासयोग्य भए कहेसे, परमेश्वर तुमके उद्धार करैगो

येशु बाको चेलानके संसारको अन्त्य हुइहए तओ कैसो हुइहए कहीके बुझानके ताहीं एक कथा कही। बा कही, “एक जनै आदमी अपन खेतमे अच्छो बिज लगाई। जब बो सोत रहए, बुक शत्रु आयके गेहुँको बीचमे ऊवा जओको बिज छर दैँ, और हुनासे गओ।”

“जब बिज जमो, बो आदमीको दास कहीं, ‘मालिक, तुम त बो खेतमे अच्छो बिज लगाए रहओ। पर कहाँसे बोमे ऊवा जओ आइगए?’ बो मालिक जवाफ दै, “कोई शत्रु बो लगाई होबैगो।”

“बे दास बिनको मालिकसे कही, ‘का हम बो ऊवा जओके निकारए?’ मालिक कही, ‘नाए। तु अइसे करैगे कहेसे, तुम बहे संग कुछ गेहुँ फिर निकार देहओ। कटानीको समयसमके ताहीं रुकओ फिर तओ फिर ऊवा जओनके जम्मा कर्के जलान ताहीं बिटा-बिटा बनाओ, पर गेहुँ चाहीं मिर ढुकुटमे लाओ।”

चेला बो कथाको अर्थ ना बुझी, तही बे येशूके सो बुझानके आग्रह करी। येशू कही, “अच्छो बिज आदमी मसिहको प्रतिनिधित्व करत् हए। खेत संसारके जनात हए। अच्छो बिज परमेश्वरको राज्यके आदमीनके प्रतिनिधित्व करत हए।”

ऊवा जओ बे दुष्ट आदमीनके परिनिधित्व करत हए। उवा जओ छिर्कन बालो बो शत्रु दुष्टको प्रतिनिधित्व करत हए। कटनीको समय अन्त्यको दिनके प्रतिनिधित्व करत हए और कटनी करन बालो परमेश्वरके स्वर्गदूतको प्रतिनिधित्व करत हए।”

“जब संसारको अन्त्य होबैगो, स्वर्गदूत अधर्मी आदमीनके जम्मा करैगो और बिनके दनक बालो आगीमे फेक देबैगो। फिर धर्मी जनके चाहीं बिनको दौवा परमेश्वरको राज्यमे दिन जैसो चम्काबैगो।”

येशू जा फिर कही कि संसारक अन्त्य होनसे अग्गु ठिक अग्गु बा पृथ्वीमे घुमके आबैगो। बा छोडो भओ अवस्थामे बा घुमक आबैगो, जो चाहीं, बाको शरीर भौतिक बोगैगो फिर आकाशमे बादर उपर आबैगो। जब येशू घुमैगो, मरे भए सब ख्रीष्टियान मृत्युसे बौरी उठंगे फिर बाके आकाशमे भेटँगे।

फिर बो समयमे बचे ख्रीष्टियानकी उपर आकाशमे उचालंगे और दुसरे मृत्युसे बौरी उठे ख्रीष्टियान संग मिलैगो। बे सब जनै येशू संग होमंगे। तओ फिर, येशू बाके आदमी संग सदाके ताहीं शान्ति और एकतामे बैठैगो।

येशू बाके उपर विश्वास करन बाले सब जनैके जीवनको मुकुट देन प्रतिज्ञा करी हए। बे परमेश्वर संगए शान्तिमे रहामंगे और राज्य करंगे।

पर परमेश्वर येशू उपर विश्वास ना करन बाले सबयको न्याय करैगो। बा बिनके नरकमे फेक देहए, जाहाँ बे सदाके ताहींरोमंगे और कष्टमे दाह्रा किटंगे। कभु ना बुतन बालो आगिमे सदामान बिनके जलाबैगो, फिर किरा बिनके खानके ना छोडैगो।

जब येशू घुमैगो, बा शैतान और बाको राज्यके पुरा खतम कर्देहए। बा शैतानके नरकमे फेक देबैगो जहाँ बे सदाके ताहीं जलंगे और बिनके संग बे फिर होमंगे, जौम परमेश्वरको आज्ञापालन करन सट्टामे दुष्टके पिच्छु लागे।

आदम और हव्वा परमेश्वरको आज्ञापालन ना करीं और जा संसारमे पापके प्रेव्श कराई तही, परमेश्वर जा संसारके श्राप दै और जाके नाश करन निर्णय करी। पर कोई दिन, परमेश्वर एक नयाँ स्वर्ग और नयाँ पृथ्वीको सृष्टि करैगो जौन चाहीं सिद्ध होबैगो।

येशू और बाके आदमी नयाँ पृथ्वीमे राहामंगे, फिर बा सदाके ताहीं अस्तित्वमे रहान बाले सब बातकी उपर राज्य करैगो। बा सब आँसु पुछदेबैगो फिर हुना कोई फिर कष्ट, दु:ख, रुवाई,दुष्टता, वेदना, वा मृत्यु ना होबैगो। येशु शान्ति और न्यायके साथ अपन राज्यको शासन करैगो, फिर बा सदाके ताहीं अपन आदमी संग रहाबैगो।