10. दौश आफौत हौरी।

परमात्मा ए मूसा सी हारुन ला चेतायाऊन्दौ कि फिरौन हूसु फिरैस। जैतरै हौतैनै फिरौन गाछै नाठै तै हौतैनोरिए बौलौ, “इस्राएल रौ परमात्मा हौयौ बौलैनस, ‘मैरौ मानुषा ला नाशनौ बैज!’” पौर फिरौन ऐ हौतैन रौ नुशुनी आई इस्राएल रौ मानुषा ला नाशमै ला आजाद कौरनौ रौ बजाए हौतिनै हौतेन ला आई काठौ काम खौटमै ला मजबूर कौरुन्दौ।

फिरौन हौसौ मानुषा ला छारानौ का सौदा मौना कौरैन थाकुन्दौ, हौतिर रौ तैईए परमात्मा ऐ मिस्र गाश दौश कौचरौ आफौत हौरी भैजुन्दौ। हौई आफौत हौरी रौ जरिया ऐ, परमात्मा ऐ फिरौन ला दैखाऊन्दौ कि हौसौ फिरौन सी मिस्र रौ देव हौर का बौदी सोतस्या स ।

परमात्मा ऐ नील गार ला खून कै बौदल्याई बैजुन्दौ, पौर फिरौन ऐ ईम्बरी बी इस्राएल रौ मानुषा ला नाछाराऊन्दौ।

परमात्मा ऐ पूरा मिस्र कै मिडकु भैजुन्दौ। फिरौन ऐ मिडकु हौरला दूर कौरनौ तैईए मूसा का अर्जी कौरुन्दौ। पौर सैब मिडकु हौरी मोऱी पिछु, फिरौन ऐ आपरौ जीवा ला काठौ जुरयाऊन्दौ आई इस्राएल रौ मानुषा ला मिस्र का नाशमै नैदैऊन्दौ।

हौतिर रौ तैईए परमात्मा ऐ खानदौ स्या माखी हौररौ आफौत भैजुन्दौ। हौतिज पिछु परमात्मा ऐ खून चुसदौ स्या माखी हौरऱौ आफौत भैजुन्दौ। फिरौन ऐ मूसा सी हारुन ला बेदुन्दौ आई हौतैन ला बौलुन्दौ कि आगर हौतैने हौई आफौत ला रौक्याता तै इस्राएल रौ मानुषा मिस्र ला शौठयाई नाशी बौल्सा। जैतरै मूसा ऐ प्रार्थना कौरौ तै परमात्मा ऐ मिस्र गाश का खून चुसदौ स्या माखी हौरला हटायाऊन्दौ। पौर फिरौन ऐ आपरौ जीवा ला काठौ जुरयाऊन्दौ आई हौसौ मानुषा ला आजाद फिरी नाशमै नैदैऊन्दौ।

हौजका पिछु, परमात्माए मिस्र रौ मानुषा रौ सैब पाल्याऊन्दौ पौशु हौरला ब्याज लागी मौरनौ बैजुन्दौ। पौर फिरौन रौ जीवा काठौ फिरुन्दौ थयौ आई हौतिनै इस्राएल रौ मानुषा ला नाशमै नैदैऊन्दौ।

तै परमात्मा ऐ मूसा ला फिरौन रौ मुखुंमाए बागुर कै छार फिकाए बौली। जैतरै हौतिनै हौयौ कौरौ तै मिस्र रौ मानुषा रौ डे कै दुखदौस्या दुखनौ निकलुन्दौ, पौर इस्राएल रौ मानुषा ला केछे निफरुन्दौ। परमात्मा ऐ फिरौन रौ जीवा ला काठौ जुरयाऊन्दौ, आई फिरौन ऐ इस्राएल रौ मानुषा ला नाशमै नैदैऊन्दौ।

हौजका पिछु, परमात्मा ऐ शौरू लागाऊन्दौ आई मिस्र रौ बौदीभाग नाज हौरला खौत्म कौरून्दौ आई जून बी बाए निकलौ हौतिन ला मारी बैजुन्दौ। फिरौन ऐ मूसा सी हारून ला बेदुन्दौ आई हौतैन ला बौलुन्दौ, “मैईए पाप खौटुन्दौस। तोमोरी नाशौ।” तै मूसा ऐ प्रार्थना कौरुन्दौ, आई आसमान का शौरू लागनौ रूक्युन्दौ।

पौर फिरौनए फिरी पाप खौटुन्दौ आई आपरौ जीवा ला काठौ जुरयाऊन्दौ। हौतिनै इस्राएल रौ मानुषा ला आजाद फिरी नाशमै नैदैऊन्दौ।

तै परमात्माए मिस्र गाश टिडडी हौररौ टौलांग ला आछनौ बैजुन्दौ। हौई टिडडी हौरीए हौसौ सैब नाज हौरला खाऊन्दौ जिल्ला शौरू हौरिए खौत्म नौकौरी थयौ।

तै परमात्माए मिस्त्र दैश कै आंयारौ जुरयाऊन्दौ जून त्रौन दयार सेग हौयौए थयौ। हौई हौतैग आयांरौ थयौ कि मिस्र रौ मानुषा आपरौ गौरै हौरका निकली नौबौलुन्दै। पौर जिन्चै इस्राएल रौ मानुषा थाकदै थै हौतिनचै प्यांशौ थयौ।

हौई नौऊ आफौत हौरिरौ पिछु बी, फिरौन ऐ इस्राएल रौ मानुषा ला आजाद फिरी नाशनौ बैजनौ का मौना कौरुन्दौ। क्यु बौलता फिरौन ऐ नुशुनी थयौ हौतिर रौ तैईए परमात्मा ऐ ऐक पिछांएरौ आफौत ला भैजनौ सुनचुई। हौई फिरौन रौ जीवा ला बौदल्याई बैजैस।