11. फसह रौ तिवार

परमात्माए मूसा सी हारुन ला फिरौन गाच्छै हौई बौलमै ला बैजी कि इस्राएल रौ मानुषा ला नाशनौ भैज। हौतैनोरिए हौतिन ला चेतायाई कि आगर हौसौ हौतेन ला नाशमै नैदैता, तै परमात्मा मिस्र रौ मानुषा रौ आई पौशु हौर रौ सैब जैठौ हौरला मारी बैजैस। फिरौन ऐ हौई शुनी बी परमात्मा गाश विश्वास कौरनौ का आई हौतिन रौ बातै मौन्यानौ का मौना कौरून्दौ।

परमात्मा ए बौलुन्दौ कि जुन भी मुगाश विशवास कौरेस हाऊँ हौतिन रौ जैठौ छैल्डु ला बचायासु पौर सैब पैरै ला ऐक बेदाग गाबलु ला आनी हौतिन ला मारनौ स्या थयौ।

परमात्मा ए इस्राएल रौ मानुषा ला हौसौ गाबलु रौ खून ला आपरौ गौर हौऱरौ दवार गाश बैजमै ला बौलुन्दौ। हौतैन ला हौतिर रौ मांसाऊ ला पौनौ स्या थयौ आई फिरी हौतेन ला अखमीरी रौटी सी हौतिज ला हासाल-हासाल खानौ स्या थयौ। हौतिनै होसौ खाऊ ला खाई पिछु हौतैन ला हौतरै मिस्र ला शौठयामै ला बी त्यार थाकमै ला बौलुन्दौ।

परमात्मा ऐ इस्राएल रौ मानुषा ला जैव खौटमै ला हूकुम दैई थयौ हौतैनोरिए हौतयौए सैब खौटुन्दौ। आदौ राच कै, परमात्मा सैब जैठौ छैल्डु ला मारैन मिस्र रौ माशटांए बाती नाशुन्दौ।

इस्राएल रौ मानुषा रौ सैब गौर रौ दवार हौर गाश खून लागुन्दौ थयौ, हौतिर रौ तैईए परमात्मा ऐ हौसौ गौर हौर ला शौठयाऊन्दौ। हौतिज रौ भीतै रौ सैब मानुषा ऐसा थै। हौतैनै गाबलु रौ खून रौ तैईए बौची थै।

पौर मिस्र रौ मानुषा ऐ परमात्मा गाश विश्वास नौकौरी थयौ आई हौतिन रौ हूकुम हौर ला नौमौन्याई थयौ। हौतिज रौ तैईए परमात्मा ऐ हौतैन रौ गौर हौर ला नबक्शयाऊन्दौ। परमात्मा ऐ मिस्र रौ मानुषा रौ सैब जैठौ छैल्डु पैरै ला मारून्दौ।

जेलखाना रौ कैदी हौर रौ जैठौ छैल्डु हौर का, फिरौन रौ जैठौ छैल्डु सेग , सैब जैठौ छैल्डु पैरै मौरुन्दै। आपौर रौ बारी दु:ख रौ तैईए मिस्र रौ बादौ मानुषा रौएन थै आई जिंगाएन थै।

हौसौए राच, फिरौन ऐ मूसा सी हारुन ला बेदी आई बौली, “इस्राएल रौ मानुषा ला गिनुई हासाल ए मिस्र का ठुरायौ!” मिस्र रौ मानुषा ऐ बी इस्राएल रौ मानुषा का हासाल ठुराईमै ला अर्जी कौरुन्दौ।