12. इज्राइली मानुषा रौ मिस्र देश का निकिलनौ

इस्राएल रौ मानुषा मिस्र का निकली वाल खुसिए थै। हौतैनै ऐ गुलाम नैथै, आई हौतैनै प्रतिज्ञा रौ देश कै नाएन थै! इस्राएल रौ मानुषा ऐ जिबी मांगौ, मिस्र रौ मानुषा ऐ हौतैन ला हौसौ सैब दैऊन्दौ, हौन्चै सेग कि सुनौ सी चांदी आई आईक किमौती चीज हौरी । आईक देश हौररौ ऐक्या मानुषा ऐ परमात्मा गाश विश्वास कौरी आई जैतरै इस्राएल रौ मानुषा नाठै तै हौतैनै बी हौतैन सी नाशुन्दै।

दियुस री बैरै झुं रौ ऐक बौडौ खम्बा हौतैन रौ आंगमाए-आंगमाए हांडी। आई राच री बैरै हौई आग रौ खम्बा फिरी। परमात्मा जून हौसौ झं रौ खम्बा कै आई आग रौ खम्बा कै थयौ, सौदा हौतैन सी साथ थयौ आई बातकै हान्डदी बैरै हौसौ हौतैन का आंगमाए-आंगमाए थयौ। हौतैन ला ऐखो हौतिन रौ पिछांए हान्डनौ स्या थयौ।

एकछिब्या पिछु, फिरौन सी हौतिन रौ मानुषा ऐ आपरौ जीवा ला बौदल्याऊन्दौ। हौतैनै इस्राएल रौ मानुषा ला फिऱी आपरौ गुलाम जुरयानौ चाएन थै। हौतिज रौ तैईए हौतैनोरिए इस्राएल रौ मानुषा रौ पिछा कौरुन्दौ। हौई परमात्मा ऐ थयौ जुनै हौतैन रौ जिवा हौर ला बौदल्याई थयौ। हौतिनै हौयौ हौतिज रौ तैईए कौरुन्दौ क्यु बौलता हौसौ चाएन थयौ कि सैब मानुषा हौई जान्सा कि फिरौन का आई मिस्र रौ मानुषा रौ सैब देव हौर का हौसौ, यहोवा बौदी शक्तिस्या स।

जैतरै इस्राएल रौ मानुषा ऐ मिस्र रौ सेना ला आछनौ दैखी तै हौतैन ला पौता लागी कि हौतैनै फिरौन रौ सेना आई रातौ समुद्रांग रौ माशटांए फौसुन्दै। हौतैनै वाल डौरुन्दै आई रौएन थै, “ तामौरिए मिस्र ला क्यु शौठयाव? तामौरी मौरदै स्या!”

मूसा ऐ इस्राएल रौ मानुषा ला बौलुन्दौ, “डौरनौ बौन्द कौरौ! परमात्मा आज तोमोरौ तैईए लौसेस आई तोमोर ला बौचाएस।” तै परमात्मा ऐ मूसा ला बौलुन्दौ, “हौनैला रातौ समुद्रांग बिलै आंगमाए हान्डमै ला बौल।”

तै परमात्मा ऐ हौसौ झुं रौ खम्बा ला आनी इस्राएल रौ मानुषा सी मिस्र रौ मानुषा माशटांए जागी जीजै मिस्र रौ मानुषा इस्राएल रौ मानुषा ला शाई नौबौला।

परमात्मा ऐ मूसा ला समुद्रांग गाश आपरौ हात बौडामै ला बौलुन्दौ। तै परमात्मा ऐ बागुर ला समुद्रांग रौ पानी ला खोजांग सी जाखनौ बिलै कौरनौ बैजुन्दौ, जिज्का कि समुद्रांग माशटांए री ऐक बात फिरुन्दौ।

इस्राएल रौ मानुषा आपरौ दुईए बिलै पानी रौ बीत हौर सी शुकौ माटी गाश समुद्रांग बाती आंगमाए निकलुन्दै।

तै परमात्मा ऐ हौसौ बात का झुं ला आगाश बैजुन्दौ जिज्का मिस्र रौ मानुषा इस्राएल रौ मानुषा ला बौचिन्दै नाएन दैखसा। मिस्र रौ मानुषा ऐ हौतैन ला पामै तैईए हौतैन रौ पिछा कौरनौ फैसला कौरी।

तै मिस्र रौ मानुषा ऐ समुद्रांग रौ जरिया ऐ हौसौ बात गाश इस्राएल रौ मानुषा रौ पिछा कौरी, पौर परमात्मा ऐ मिस्र रौ मानुषा ला डौराई आई हौतैन रौ रथ हौर ला औटक्याई। हौतैनोरी जिंगाएन थै,” ठुरौ! इस्राएल रौ मानुषा बिलै का परमात्मा लौसैनस!”

सैब इस्राएल रौ मानुषा समुद्रांग रौ आईक बिलै पौछुन्दै। तै परमात्मा ऐ मूसा ला बौलुन्दौ कि तु फिरी पानी गाश हात बढायाव। जैतरै मूसा ऐ हौयौ कौरौ, तै पानी मिस्र रौ सैना गाश आछुन्दौ आई आपरौ पैहलै रौ काथाए फिरुन्दौ। सैब मिस्र रौ सैना डुबुन्दै।

जैतरै इस्राएल रौ मानुषा ऐ दैखौ कि मिस्र रौ मानुषा मौरी थै तै हौतैनोरिए परमात्मा गाश विश्वास कौरुन्दौ। हौतैनोरिए विश्वास कौरौ कि मूसा परमात्मा बिलै का भविष्य जान्दौ स्या थयौ।

इस्राएल रौ मानुषा हौतिर रौ तैईए बी वाल खुश थै क्यु बौलता परमात्मा ऐ हौतैन ला मौरनौ का आई गुलाम फिरनौ का बौचाई थयौ। ऐ हौतैनोरी परमात्मा रौ अराधना कौरमै आई हौतिन रौ हूकुम मौन्यामै ला आजाद थै। इस्राएल रौ मानुषा ऐ आपरौ आजादी रौ तिवार मौनायामै ला आई परमात्मा रौ गुनगान कौरमै ला बादौ भजन हौरी ल्याऊन्दौ क्यु बौलता हौतिनै हौतैन ला मिस्र रौ सैना होरका बौचाऊन्दौ थयौ।

परमात्मा ऐ इस्राएल रौ मानुषा ला सौदा बौरौश ऐक तिवार मौनायानौ हूकुम दैऊन्दौ हौई याद कौरमै ला कि क्यौ परमात्मा ऐ मिस्र रौ मानुषा ला हरायाऊन्दौ आई हौतैन ला गुलाम फिरनौ का आजाद कौरून्दौ। हौई फसह रौ तिवार कहलायाऊन्दौ थयौ। हौजकै हौतैन ला हौजरौ तिवार मौनायामै ला ऐक बढिया गाबलु रौ बलि दैन्नौस्या थयौ, हौतिज ला पौनौ स्या थयौ, आई हौतिज ला खमीरनुदौ रौटी सी खानौस्या थयौ।