14. इस्त्राइली मानुष हौर रौ दुई बिशौ बौरौश सेग जांगाल कै भाटकानौ।
परमात्मा ऐ इस्राएल रौ मानुषा ला हौसौ नियम हौरला बौलनौ बौन्द कौरी जिररौ हौतिनै सी कौरुन्दौ समझौता रौ कारण ऐ पालन कौरनौ स्या थयौ । तै हौतिनै सीनै पौर्बत का आंमाए हौतैन का आंगमाए-आंगमाए हान्डुन्दौ। हौसौ हौतैन ला प्रतिज्ञा रौ देश कै निनौ चाएन थयौ। हौई देश ला कनान बी बौलदै थै। परमात्मा झुं रौ खम्बा कै हौतैन का आंमाए -आंमाए हान्डुदौ, आई हौतैनै हौतिन रौ पिछांए- पिछांऐ हान्डुदै।
परमात्मा ऐ अब्राहम, इसहाक आई याकुब सी वायदा कौरी थयौ कि हौसौ वायदा रौ हौसौ देश हौतैन रौ वंशज हौर ला देस, पौर ईम्बरी हौतिन्चै बादौ जाति थाकैन थै। हौतैन ला कनानी बौलदै थै। हौई कनानी मानुषा परमात्मा रौ अराधना नौकौरदै थै आई हौतिन ऱौ हूकुम ला नौमौन्यादै थै। हौतैनै जाली देव हौर रौ अराधना कौरदै थै आई बादौ मारे काम खौटदै थै।
परमात्मा ऐ इस्राएल रौ मानुषा ला बौलुन्दौ, “जैतरै तोमोरी हौसौ समझौता रौ देश कै नाशसौ तै हौतिनचै रै सैब कनानी हौर का छुट्यो।” हौतैन सी समझौता नौकौरयो आई हौतैन सी शादी नौकोरयो। तोमोर ला हौतैन रौ सैब मुर्ति हौर ला बानि बैजनौ स्यास। आगार तोमोरी मैरौ हूकुम नौमौन्यासौ, तै तोमोरी मैरौ बजाए हौतैन रौ देव हौररौ अराधना कौरसौ।”
जैतरै इस्राएल रौ मानुषा कनान रौ सीमांग गाश पोछै, मूसा ऐ इस्राएल रौ सैब खानदान का ऐक -ऐक कौरी बारा मानुषा ला चुन्याई। हौतिनै हौतैन ला नाशिन्दै हौसौ देश रौ बातै जान्नौ हूकुम दैऊन्दौ कि हौसौ देश कैनौस। हौतैन ला हौसौ कनानी हौररौ बारे ए बी जान्नौ थयौ कि हौतैनै ताकतस्या या कामजोर सा।
हौसौ बारा मानुषा ऐ पुरा कनान बाति दुईबिशौ दयार हान्डुदै आई फिरी हौतैनै वापिस आछुन्दै। हौतैनोरिए मानुषा ला बौलुन्दौ, “हौसौ देश वाल उपजाऊस आई बादौ नाज हौरिस!” पौर दौश जासूस हौरिए बौलुन्दौ। “हौतैन रौ इलाका बादौ पाकास आई हौसौ मानुषा हाट्टा-गाट्टा सा! आगार तामोरी हौतैन गाश हमला कौरता, तै पाका हौतैनै तामोर ला हरायासा आई तामोर ला मारी बैजसा।”
हौतरै कालेब आई यहौशू आई दूई आईक मानुषा ऐ बौलुन्दौ, “हौई दिमांग बातैस कि कनान रौ मानुषा उशटै सी ताकतस्या सा, पौर तामोरी पाका हौतैन ला हरायाई बौल्दै! परमात्मा तामोर रौ तैईए लौसैस!”
पौर मानुषा ऐ कालेब सी यहोशू रौ नुशूनी। हौतैनोरिए मूसा सी हारुन गाश रोश गारी आई बौली, “तुमबी ऐ हामोर ला हौई कौचरौ जागा गाश क्यु आनौ? तामोरी मिस्र ऐ थाकत़ा ठीक थयौ। आगार तामोरी हौई देश कै नाशता तै तामोरी लडाई कै मौरदे, आई कनान रौ मानुषा तामोर रौ देन हौर ला आई छौकुर पैरै ला गुलाम जुरयान्दै।” हौसौ मानुषा आपोर ला वापिस मिस्र निमै तैईए ऐक आईक आंमाए हांडदौ ला चुननौ चाएन थै।
जैतरै हौसौ मानुषा ऐ हौयौ बौलौ तै परमात्मा वाल रोशे थयौ। हौसौ मैठिनौ डेरा कै आछुन्दौ आई बौलुन्दौ,“तोमोरिए मैरो खिलाप बगावत कौरुन्दौस, हौतिर रौ तैईए तोमोरी सैब ला हौई जांगाल कै भाटकानौ फिरैस। सैबे जून बीश बौरौश या हौतिज का बौदी ऊमौर रौस हौतिनचै मौरैस आई कैतरै हौसौ देश कै नाशी नौबौला जि हांऊ तोमोर ला दिसु। ऐखो कालेब सी यहोशू हौतिन्चै नाशसा।”
जैतरै मानुषा ऐ परमात्मा ला हौयौ बौलनौ शुनौ, तै हौतैनै दुखी फिरुन्दै क्यु बौलता हौतैनोरिए पाप खौटी थयौ। हौतिर रौ तैईए हौतैनोरिए कनान रौ मानुषा गाश हमला कौरनौ सुनचुई। मूसा ऐ हौतेन ला नौन्छमै ला चेतावनी दैऊन्दौ क्यु बौलता परमात्मा हौतैन सी नौन्छदौ स्या, पौर हौतैनोरिए हौतिन रौ नुशूनी।
परमात्मा हौई लडाई कै हौतैन सी नौनछी थयौ, हौतिर रौ तेईए कनान रौ मानुषा ऐ हौतैन ला हरायाई आई हौतैन माज बादौ ला मारी बैजुन्दौ। तै इस्राएल रौ मानुषा कनान का वापिस फिरून्दै। आगे रौ दूई बिश बौरौश सैग , हौतैनै जांगाल कै औरू -पौरू भाटकाएसा।
एस्राएल रौ मानुषा रौ जांगाल कै भाटकानो रौ दूई बिश बौरौश काल, परमात्मा ऐ हौतैन रौ जरुरत हौर ला पुरा कौरी। हौतिनै हौतेन ला स्वर्ग का “मन्ना” बौलनौ रौटी दैऊन्दौ। हौतिनै बटेरो रौ टौलांग बी “जून कि डामचांग चौरखी थाकद” हौतैन रौ जागा कै भैजी ताकि हौतैन कै खामै ला मासांऊ हौएस। हौतादु काल,परमात्मा ऐ हौतैन रौ गाच्छौ सी चिन्दरी हौर ला फुटनौ का बौचाई जागुन्दौ।
हौनचै सेग कि परमात्मा ऐ हौतैन ला पिमै ला चमत्कार कौरी डौंक का पानी गारुन्दौ। पौर हौई सैब पिछु, इस्राएल रौ मानुषा ऐ परमात्मा रौ खिलाफ आई मूसा रौ खिलाफ शकेत कौरुन्दौ आई चौपरीऊन्दै। तै बी परमात्मा विश्वास रौ लायक थयौ। हौतिनै जि वायदा कौरी थयौ कि हौसौ अब्राहम, इसहाक, आई याकुब रौ वंशज हौर ला कौरैस हौतिनै हौसौ कौरी।
आई ऐक बैरै जैतरै हौतैन कै पानी नैथैव , परमात्मा ऐ मूसा ला बौली, “डौंक सी बातायु, आई हौतिज का पानी निकलैस।”पौर मूसा ऐ डौंक सी नाबातावी। बजाए हौर रौ, हौतिनै दूई बैरै बैरगा ऐ डौंक गाश ल्याई। हौई तरिका ऐ हौतिनै परमात्मा रौ बैजती कौरी। सैब ला पिमै तैईए डौंक का पानी ता निकलुन्दौ, पौर परमात्मा ला मूसा गाश रोश आच्छी। हौतिनै बौलुन्दौ,“ क्यु बौलता तैईए हौयौ खौटिस, हौतिज रौ तैईए तु प्रतिज्ञा रौ देश कै नाशी नौबौलै।”
जैतरै इस्राएल रौ मानुषा दूई बिशौ बौरौश सेग जांगलै भाटकाई थै, तै जुनै बी परमात्मा रौ खिलाफ पाप खौटी थयौ हौतैनै सैब मौरुन्दै थै। तै परमात्मा ऐ हौतैन ल फिरी हौसौ प्रतिज्ञा रौ देश रौ सिमांग सेग निऊन्दौ। ऐ मूसा बादौ बुडौ फिरी थयौ, हौतिज रौ तैईए परमात्मा ऐ मानुषा रौ अगुवाई कौरनौ कै हौतिन रौ सायता कौरमै ला यहोशू ला चुन्याऊन्दौ। परमात्मा ऐ मूसा सि हौई प्रतिज्ञा बी कौरी थयौ कि हौसौ ऐक दयार हौसौ मानुषा गाच्छै मुसा ज्यौवे ऐक भविष्य जानदौ भैजैस।
तै परमात्मा ऐ मूसा ला ऐक पौर्बत रौ चोटी गाश नाशमै ला बौलुन्दौ जिजै हौसौ वायदा रौ देश ला शाई बौलैस। मूसा ऐ हौसौ वायदा रौ देश ला शाई पौर परमात्मा ऐ हौतिन ला हौतिज कै नाशनौ हूकुम नैदैऊन्दौ। तै मूसा मौरुन्दौ, आई इस्राएल रौ मानुषा ऐ बिशौ दौश दयार सेग शोप जागुन्दौ। यहोशू हौतैन रौ नौऊवो अगुवा फिरुन्दौ। यहोशू ऐक बढिया अगुवा थयौ क्यु बौलता हौतिनै परमात्मा गाश बिश्वास जागी आई हौतिन रौ हूकुम ला मौन्याई।
निर्गमन पाठ 16-17;गिनती 10-14;20;27 व्यवस्थाविवरण 34 का एक बाइबल रौ कौथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।