15. प्रतिज्ञा रौ देश।

आखिर कै, ऐ हौसौ बेला आच्छी थयौ कि इस्राएल रौ मानुषा वायदा रौ देश, कनान के बितै फिरसा। हौसौ देश कै यरीहो नाव रौ ऐक नगर थयौ। हौतिर रौ रक्षा ला हौतिर रौ चारे बिलै वाल पाका बित हौरी थयौ। यहोशू ऐ हौसौ नगर कै दूई कूफिया हौर ला भैजुन्दौ। हौसौ नगर कै राहाब नाव री ऐक वेश्या थाकदी थी। हौतैसै हौई कूफिया हौर ला चोरुन्दौ, आई फिरी पिछांए का हौतैसै हौतैन ला नगर का बौची निकिलमै ला मौदत कौरुन्दौ। हौतैसै हौयौ हौतिर रौ तैईए कौरुन्दौ क्यु बौलता हौसौ परमात्मा कै विश्वास कौरदी थी। जैतरै इस्राएल रौ मानुषा यरीहो ला नष्ट कौरसा तै हौतैनोरिए राहाब सी हौतैस रौ पैरै रौ रक्षा कौरनौ वायदा कौरी थयौ।

इस्राएल रौ मानुषा ला वायदा रौ देश कै बितै फिरमै ला यरदन गार लांगनौ स्या थयौ। परमात्मा ऐ यहोशू ला बौलुन्दौ ,”याजक हौर ला आंगमाए नाशनौ भैज।” जैतरै याजक हौरिए यरदन गार कै आपरौ खुन्डी हौर ला जागौ तै पानी रौ धारा चौल्नौ बौन्द फिरुन्दौ, जिजै कि इस्राएल रौ मानुषा गार रौ आईक बिलै शुकौ जागा गाश पार नाशी बौल्सा।

हौसौ मानुषा ऐ यरदन गार पार कौरी तै परमात्मा ऐ यहोशू ला बौलुन्दौ कि यरीहो गाश हमला कौरमै त्यार थाकौ, बेशक हौसौ बादौ पाका नगर थयौ। परमात्मा ऐ हौसौ मानुषा ला बौलुन्दौ कि हौतैन रौ याजक हौरला आई सैना हौरला छौ दयारौ सेग हौसौ नगर रौ चारे बिलै हान्डनौ स्यास। हौतिर रौ तैईए याजक हौरीए आई सैना हौरिए हौयौए कौरुन्दौ।

तै सात दयार तादु, इस्राएल रौ मानुषा ऐ हौसौ नगर रौ चारे बिलै सात बैरै आई हान्डुदै। हौतैन नगर रौ चारै बिलै सात बैरै हान्डी पिछु, याजक हौरिए आपरौ तुहरी हौरला बाजाऊन्दौ आई सैना हौरिए वालजोरे काद गारुन्दौ।

तै यरीहो रौ चारे बिलै रौ बित डौलुन्दौ! ज्यौ परमात्मा ऐ हूकुम दैई थयौ इस्राएल रौ मानुषा ऐ नगर रौ सैब चिज ला नष्ट कौरुन्दौ। हौतैनोरिए ऐखो राहाब सी हौतिन रौ पैरै ला शौठयाऊन्दौ, जुन इस्राएल रौ मानुषा रौ भाग फिरी थै। जैतरै कनान थाकदै आईक मानुषा ऐ शुनौ कि इस्राएल रौ मनुषा ऐ यरीहो ला नष्ट कौरुन्दौस, तै हौतैनोरी डौरुन्दै कि इस्राएल रौ मानुषा हौतैनै गाश बी हमला कौरसा।

परमात्मा ऐ इस्राएल रौ मानुषा ला हूकुम दैई थयौ कि कनान कै थाकदै सया कुने बी जाति सी शान्ति समझौता नौकौरनौ सया। पौर गिबोनियो नाव रौ ऐक कनानी जाति ऐ यहोशू ला ठकायाऊन्दौ कि हौतैनै कनान का दूर ऐक जागा कै थाकदै सया सी। हौतैनोरिए यहोशू ला हौतैन सी शान्ति समझौता कौरनौ अर्जी कौरी। यहोशू सी आईक इस्राएल रौ अगुवा हौरिए परमात्मा ला नूपुछी कि हौतैन ला कि कौरनौ चान्दौ। हौररौ बजाए, हौतैनोरिए गिबोनिया हौरि सी शान्ति समझौता कौरुन्दौ।

त्रौन दयार पिछु, इस्राएल रौ मानुषा ला पौता लागुन्दौ कि गिबोनी मानुषा कनान ऐ थाकदै थै। हौतैन ला वाल रोश आछुन्दौ क्यु बौलता गिबोनिया हौरीए हौतेन ला धोखा दैई थयौ। पौर हौतैनोरिए हौतैन सी कौरुन्दौ हौसौ शान्ति समझौता ला कायम जागुन्दौ क्यु बौलता हौसौ परमात्मा रौ मुखुंमाए कौरून्दौ थयौ। तै ऐकछिब्या पिछु, कनान कै थाकदै ऐक आईक जाति, एमोरियो रौ राजा हौरिए शुनुन्दौ कि गिबोनी हौरिए इस्राएल रौ मानुषा सी शान्ति समझौता कौरुन्दौस, हौतिर रौ तैईए हौतैनोरिए आपरौ-आपरौ सैना हौर ला ऐक जुरयाई ऐक बौडौ सैना जुरयाऊन्दौ आई गिबोनी हौर गाश हमला कौरुन्दौ। गिबोनी हौरिए आपोर रौ मौदद कौरमै ला यहोशू गाच्छै ऐक काचा बैजुन्दौ।

हौई संदेश शुनी यहोशू ऐ इस्राएल रौ सैना ला कौठा कौरुन्दौ आई गिबोनी हौर गाछै पोछमै ला हौतैनै सारा राचा हान्डुदै। दौथी ब्याई पिछु हौतैनोरिए एमोरी हौररौ सैना ला हैरान कौरुन्दौ आई हौतैन गाश हमला कौरुन्दौ।

हौतादु परमात्मा इस्राएल रौ मानुषा रौ तैईए लौस्युन्दौ। हौतिनै एमोरी हौर ला डौराऊन्दौ आई हौतिनै बौडौ-बौडौ शौरु लागाई बादौ एमोरी सेना हौर ला मारी बैजुन्दौ।

परमात्मा ऐ दयुस ला बी आसमान कै ऐक जागा गाश रुक्याऊन्दौ जिजै इस्राएल रौ मानुषा ला बतेरा बेला पौरैस कि एमोरी सेना हौर ला कताई हरायाई बैजसा। हौतादु, परमात्मा ऐ इस्राएल रौ मानुषा ला ऐक बौडौ जीत पायाउन्दौ।

जैतरै परमात्मा ऐ हौसौ सैना हौर ला हरायाई पिछु, बादौ कनानी जाति रौ मानुषा इस्राएल गाश हमला कौरमै तैईए कौठा फिरुन्दै। यहोशू सी इस्राएल रौ मानुषा ऐ हमला कौरी हौतैन रौ सर्वनाश कौरुन्दौ।

हौई लडाई हौरी पिछु, परमात्मा ऐ इस्राएल रौ सैब खानदान ला वायदा रौ हौसौ देश कै हौतैन रौ हिसा दैऊन्दौ। तै परमात्मा ऐ इस्राएल ला हौतिज रौ सैब सिमांग गाश शान्ति दैऊन्दौ।

जैतरै यहोशू बुडौ फिरौ तै हौतिनै इस्राएल रौ सैब मानुषा ला कौठा बैदुन्दौ। तै यहोशू ऐ हौसौ मानुषा ला याद दिलायाई कि हौतैनोरिए हौसौ समझौता ला मौन्यामै वायदा कौरी थयौ जून परमात्मा ऐ हौतैन सी सीनै पोर्बत गाश कौरी थयौ। हौसौ मानुषा ऐ परमात्मा रौ प्रति विश्वास जागमै आई हौतिन रौ व्यवस्था हौर ला मौन्यामै ला वायदा कौरी।