16. छुडायान्दै स्या।

यहोशू मौरी पिछु इस्राएल रौ मानुषा ऐ परमात्मा रौ हूकुम नौमौन्याई। हौतैनोरिए परमात्मा रौ नियम हौररौ पालन नौकौरी,आई हौतैनोरिए हौसौ समझौता रौ देश का बौचुन्दै कनानी हौरला बाए नागारुन्दौ। इस्राएल रौ मानुषा ऐ आपरौ सौचौ परमात्मा, यहोवा ला शौठयाई कनानी हौररौ देव हौररौ पुजापाट कौरनौ शुरु कौरुन्दौ। इस्राएल रौ मानुषा कै कुने राजा नाई थै, हौतिर रौ तैईए सेबे आपरौ मौन मौरजी रौ काम खौटैन थै।

परमात्मा रौ हूकुम ला नौमौन्याई इस्राएल रौ मानुषा ऐ ऐक रिवाज ला शुरु कौरुन्दौ जिल्ला बादौ बैरै दौरायाऊन्दौ थयौ। हौई रिवाज हौयौ चौली: बादौ बौरौश सेग इस्राएल रौ मानुषा परमात्मा रौ हूकुम नौमौन्यांदै थै, तै परमात्मा हौतैन ला हौतैन रौ दुश्मौन हौर का हरायाई सजा दैंदौ थयौ। हौई दुश्मौन इस्राएल रौ मानुषा का हौतैन रौ चीज हौरला लूटयान्दै थै, हौतैन रौ जायदाद ला नष्ट कौरदै थै, आई हौतैन माज बादौ ला मारी बैजुन्दौ । फिरी जैतरै इस्राएल रौ मानुषा रौ दुश्मौन हौतैन गाश बादौ बौरौश सेग अत्याचार कौरैन थै, हौतिज पिछु इस्राएल रौ मानुषा आपरौ पाप हौररौ पश्चाताप कौरदै थै आई परमात्मा का आपोर ला बौचामै ला प्रार्थना कौरदै थै।

सौदा जैतरै इस्राएल रौ मानुषा पश्चाताप कौरदै थै तै परमात्मा हौतैन ला बौचान्दौ थयौ। हौसौ ऐक छुडायान्दै स्या रौ जरिया ऐ हौयौ कौरदौ थयौ – ऐक हौयौ मानुष जुन हौतैन रौ दुश्मौन हौररौ खिलाफ लौसिन्दौ थयौ आई हौतैन ला हरायान्दौ थयौ। तै देश कै शान्ति फिरदौ थयौ आई हौसौ छुडायान्दौ स्या हौतैन गाश बढिया राज कौरैस। परमात्मा ऐ हौसौ मानुषा ला बौचामै ला बादौ छुडायान्दै स्या ला बैजुन्दौ। परमात्मा ऐ नेर रौ ऐ ऐक दुश्मौन जाति, मिघानी हौररौ जरिया ऐ इस्राएल रौ मानुषा ला हरायाई फिरी हौयौ कौरुन्दौ।

मिघानी हौरिए सात बौरौश सेग इस्राएल रौ मानुषा रौ नाज हौरला लुटयाऊन्दौ। इस्राएल रौ मानुषा वाल डौरी थै, आई हौतैनोरी गुफा हौरकै चोरिऊन्दै ताकि मिघानी हौरी हौतैन ला नैदैखा। आखिरकार, हौतैनोरिए आपोर ला बौचामै ला परमात्मा का प्रार्थना कौरुन्दौ।

गिदोन नाव रौ ऐक इस्राएल रौ मानुष थयौ। ऐक दयार, हौसौ ऐक गुप्त जागा कै गेहूँ फानैन थयौ ताकि मिघानी हौरी हौतिज ला चोरि नौबौला। यहोवा रौ स्वर्गदूत ऐ गिदोन गाछै आछी हौतिन ला बौलुन्दौ, “हे शूरवीर सूरमा, परमात्मा तांऊसी स। नाश आई इस्राएल रौ मानुषा ला मिघानी हौरका बौचाव।”

गिदोन रौ बा गाछै मूर्ति ला समर्पित ऐक वेदी थयौ। सेबका पहला बातै जुन परमात्मा ऐ गिदोन ला कौरमै ला बौली हौई हौसौ वेदी ला बान्नौ स्या थयौ। पौर गिदोन मानुषा का डौरदौ थयौ, हौतिर रौ तैईए हौतिनै राच फिरनौ पौखुन्दौ। तै हौतिनै हौसौ वेदी ला बानि टुकडा-टुकडा कौरुन्दौ। हौतिनै परमात्मा ला ऐक नौऊवो वेदी जुरयाऊन्दौ आई हौतिज गाश परमात्मा ला बलि चढायाऊन्दौ।

आईक दौथी मानुषा ऐ शाव कि कुनै ता वेदी ला बानि टुकडा-टुकडा कौरुन्दौस, हौतिर रौ तैईए हौतैनै वाल रोशै थै। हौतैनै गिदोन ला मारी बैजमै ला हौतिन रौ घौरै नाशी, पौर गिदोन रौ बा ऐ बौली, “तोमोरी क्यु आपरौ देव रौ मौदद कौरनौ कोशिश कौरैन सौ? आगर हौसौ देव स तै हौतिन ला आपरौ रक्षा आपु कौरनौ बैज!” क्यु बौलता हौतिनै हौयौ बौलौ हौतिर रौ तैईए मानुषा ऐ गिदोन ला नामारुन्दौ।

तै इस्राएल रौ मानुषा ला लूटयामै ला मिघानी हौरी फिरी आछुन्दै। हौतैनै हौतेग थै कि हौतैन ला गौनी बि नौबौल्नौ स्या थयौ। गिदोन ऐ हौतैन रौ खिलाफ लौसिमै ला इस्राएल रौ मानुषा ला कौठा बेदुन्दौ। गिदोन ऐ परमात्मा का दुई निशानी हौररौ मांग कौरुन्दौ ताकि हौतिन ला विश्वास फिरैस कि परमात्मा दिमांग ऐ हौतिन ला इस्राएल ला बौचामै ला बौलैन स।

पहला निशानी रौ तैईए, गिदोन ऐ बैरै रौ ऊन ला माटी गाश जागी परमात्मा ला बौलुन्दौ कि दौथी रौ ओस ऐखो बैरै रौ हौसौ ऊन गाश आछनौ चान्दौ आई माटी गाश नाछनौ चान्दौ। परमात्मा ऐ हौयौ ऐ कौरुन्दौ। आईक राच, हौतिनै परमात्मा ला बौलुन्दौ कि माटी सिनौ फिरनौ चान्दौ पौर बैरै रौ ऊन शुकौ थाकनौ चान्दौ। परमात्मा ऐ हौयौ ऐ कौरुन्दौ। हौई दुई निशानी रौ कारण ऐ, गिदोन ऐ विश्वास कौरुन्दौ कि परमात्मा दिमांग ऐ चाएन स कि हौसौ इस्राएल रौ मानुषा ला मिघानी हौरका बौचाए।

तै गिदोन ऐ सैना हौरला आप गाछै बेदुन्दौ आई 32,000 मानुष आछुन्दै। पौर परमात्मा ऐ हौतिन ला बौलुन्दौ कि हौई बादौ सा। हौतिर रौ तैईए गिदोन ऐ हौतैनै सेब 22,000 ला घौरै वापिस बैजुन्दौ जून लौसिनौ का डौरदै थै। परमात्मा ऐ गिदोन ला बौलुन्दौ कि हौई मानुषा ईम्बरी बी बादौ थै। हौतिर रौ तैईए गिदोन ऐ 300 सैना हौरला शौठयाई हौतैन सेब ला घौरै बैजुन्दौ।

हौतादु राच परमात्मा ऐ गिदोन ला बौलुन्दौ, “मिघानी हौररौ छावनी कै नाश आई हौतैन ला बातै बाताईनौ शुन। जैतरै तु शुनसै कि हौतैनै की बातै बाताएन सा तै तु हौतैन गाश हमला कौरनौ का नौडौरदौ।” हौतिर रौ तैईए हौतादु राच, गिदोन तोल हौतैन रौ छावनी कै नाशुन्दौ आई हौतिनै एक मिघानी सैना ला आपरौ कौनैस ला हौसौ बातै बौलनौ शुनी जुन हौतिनै सिऊनै कै दैखी थयौ। हौसौ मानुष रौ कौनैस ऐ बौलुन्दौ, “हौई सिऊनै रौ मौतलबस कि गिदोन रौ सैना तामोरी मिघानी सैना ला हरायाई बैजसा!” जैतरै गिदोन ऐ हौई शुनौ तै हौतिनै परमात्मा रौ स्तुति कौरून्दौ।

तै गिदोन आपरौ सैना हौर गाछै वापिस आछुन्दौ आई हौतैनै सेब ला एक-एक नरसिंगा,एक माटी रौ बान्दरू, आई एक मशाल दैऊन्दौ। हौतैनोरिए हौसौ छावनी ला घेरयाऊन्दौ जिन्चै मिघानी सैना सुती थै। गिदोन रौ 300 सैना हौरिए आपरौ मशाल हौरला बान्दरू हौरिए बुदी थयौ हौतिर रौ तैईए मिघानी हौरिए मशाल हौर रौ प्याशौ ला नैदैखी थयौ।

तै गिदोन रौ सेब सैना हौरिए आपरौ बान्दरु हौरला एक बैरै ए बानि अचानक ए मशाल हौररौ आग ला प्रकट कौरुन्दौ। हौतैनोरिए आपरौ नरसिंग हौरला बाजाऊन्दौ आई जिंगायुन्दै,“यहोवा रौ आई गिदोन रौ डांगरौ!”

परमात्मा ऐ मिघानी हौरला डौराऊन्दौ, हौतिर रौ तैईए हौतैनै आपु माज मारैन-काटैन थै। हौतरे, गिदोन ऐ काचा हान्डादै स्या ला बादौ आईक इस्राएल रौ मानुषा ला मिघानी हौररौ पीछा कौरमै ला हौतैन रौ मौदद कौरमै ला बेदमै ला बैजुन्दौ। हौतैनोरिए हौतैन माज का बादौ ला मारी बैजुन्दौ आई बाकी ला पीछा कौरी हौतैन ला इस्राएल देश का बाए गारी बैजुन्दौ। हौतादु 1,20,000 मिघानी मौरुन्दै। हौयौए परमात्मा ऐ इस्राएल ला बौचाऊन्दौ।

हौतैनै गिदोन ला आपरौ राजा जुरयानौ चाएन थै, पौर गिदोन ऐ हौतैन ला हौयौ कौरमै नैदैऊन्दौ, पौर हौतिनै हौतैन का हौसौ सुनौ रौ जेवर मांगुन्दौ जून हौतैनै सेब ऐ मिघानी हौरका लुटयाई थयौ। हौतैनोरिए गिदोन ला ग्याक सुनौ दैऊन्दौ।

तै गिदोन ऐ हौसौ सुनौ रौ एक खास गाछौ जुरयाऊन्दौ जैव कि महायाजक बिदिन्दै थै। पौर मानुषा ऐ हौतिन रौ उपासना कौरनौ शुरु कौरुन्दौ जैव कि हौसौ एक मूर्ति स। तै परमात्मा ऐ फिरी इस्राएल रौ मानुषास ला सजा दैऊन्दौ क्यु बौलता हौतैनोरिए मुर्ति रौ उपासना कौरी थयौ। परमात्मा ऐ हौतैन रौ दुशमौन हौरला हौतैन ला हरायामै ला सक्षम कौरुन्दौ। आखिरकार हौतैनोरिए फिरी परमात्मा का मौदद कौरमै ला प्रार्थना कौरुन्दौ, आई परमात्मा ऐ हौतैन गाछै हौतैन ला बौचामै ला एक आईक छुडायान्दौ स्या ला बैजुन्दौ।

हौईए बातै बादौ बैरै बितुन्दौ: इस्राएल रौ मानुषा पाप कौरसा, परमात्मा हौतैन ला सजा दैस, हौतैनै पश्चाताप कौरसा, आई परमात्मा हौतैन ला छुडायामै ला कास-कास ला भैजैस। बादौ बौरौश सेग, परमात्मा ऐ बादौ छुडायान्दै स्या ला भैजुन्दौ जुनै इस्राएल रौ मानुषा ला हौतैन रौ दुशमौन हौरका बौचाऊन्दौ।

आखिरकार, हौतैनोरिए आईक्या देश हौररौ काथा परमात्मा का आपोर ला एक राजा रौ मांग कौरुन्दौ। हौतैनै एक हौयौ राजा चाएन थै जुन ऊशटौ आई शक्ति स्या हौएस, आई जुन लडाई कै हौतैन रौ अगुवाई कौरी बौलैस। परमात्मा ला हौई निवेदन पसंद नाछी, पौर हौतिनै हौतैन ला हौत्यौ राजा दैऊन्दौ जैव हौतैनोरिए मांग कौरी थयौ।