17. दाऊद सी परमात्मा रौ वायदा।

शाऊल इस्राएल रौ पहला राजा थयौ। हौसौ ऊशटो आई शारो थयौ, जयौ हौसौ मानुषा चाएन थै बिलकुल हौत्यौ। इस्राएल गाश आपरौ राज रौ पहले-पहले बौरौश कै शाऊल ऐक बडिया राजा थयौ। पौर पिछांए का हौसौ ऐक दुष्ट मानुष फिरुन्दौ जुनै परमात्मा रौ बातै हौरला नौमौन्याऊन्दौ, हौतिर रौ तैईए परमात्मा ऐ ऐक आईक मानुष ला चुनयाऊन्दौ जून ऐक दयार हौतिन रौ जागा कै राजा फिरैस।

परमात्मा ऐ दाऊद नाव रौ ऐक जवान एस्राएली मानुष ला चुनायाई ऐक दयार शाऊल रौ जागा कै राजा फिरमै ला त्यार कौरनौ शुरु कौरुन्दौ। दाऊद बैतलहम नगर रौ ऐक पालैस थयौ। बादौ बैरै, दाऊद ऐ शैर सी रीक दुईए ला मारी बैजुन्दौ थयौ क्यु बौलता दाऊद ऐ रखवाली कौरदी बैरै हौतिन रौ बा रौ बैरै हौर गाश हौतैनोरिए हमला कौरी थयौ। दाऊद ऐक बौलौ आई धर्मी मानुष थयौ। हौतिनै परमात्मा गाश विश्वास कौरुन्दौ आई हौतिन रौ बातै हौरला मौन्याऊन्दौ।

जैतरै दाऊद ईमबरी जवान मानुष ऐ थयौ, हौतिनै ऊशटौ-बिंऊलौ गोलियत रौ खिलाफ लडाई कौरुन्दौ। गोलियत ऐक बादौ बडिया सैना थयौ। होसौ बादौ पाका आई लगभग त्रौन मिटौर ऊशटौ थयौ! पौर परमात्मा ऐ गोलियत ला मारमै आई इस्राएल ला बौचानौ कै दाऊद रौ मौदद कौरुन्दौ। हौतिज पिछु , दाऊद ऐ इस्राएल रौ दुशमौन हौर गाश बादौ बैरै विजय पायाऊन्दौ। दाऊद ऐक बौडौ सैना फिरुन्दौ, आई हौतिनै बादौ लडाई हौरकै इस्राएली सैना रौ अगुवाई कौरुन्दौ। मानुषा ऐ हौतिन रौ बादौ तारिफ कौरुन्दौ।

मानुषा ऐ दाऊद सी हौतेग प्यार कौरुन्दौ कि शाऊल हौतिन का ईर्श्या कौरैन थयौ। आखिरकार शाऊल हौतिन ला मारी बैजनौ चाएन थयौ, हौतिज रौ तैईए दाऊद हौतिन का आई हौतिन रौ सैना हौरका चौरिमै ला जांगलै ठुरुन्दौ। ऐक दयार, जैतरै शाऊल आई हौतिन रौ सैना दाऊद ला लोरेन थै तै शाऊल ऐक गुफा कै नाशुन्दौ। हौई हौसौए गुफा थयौ जिजकै दाऊद चोरुई थयौ, पौर शाऊल ऐ हौतिन ला नैदैखुन्दौ। दाऊद शाऊल पिंछाए हौतिन रौ बादौ नेर नाशुन्दौ आई हौतिन रौ गाच्छौ का ऐक टुकरा काटुन्दौ। पिछांए का, जैतरै शाऊल हौसौ गुफा का निकलौ तै दाऊद ऐ हौतिन ला बेदी हौसौ काटुन्दौ गाच्छौ रौ टुकरा ला दैखाऊन्दौ। हौई तरीका ऐ, शाऊल ऐ जानौ कि दाऊद ऐ राजा फिरमै ला हौतिन ला मारी बैजनौ का मना कौरुन्दौस।

ऐक छिब्या पिछु, शाऊल लडाई कै मौरुन्दौ, आई दाऊद इस्राएल रौ राजा फिरुन्दौ। हौसौ ऐक बडिया राजा थयौ, आई मानुषा ऐ हौतिन सी प्रेम जागुन्दौ। परमात्मा ऐ दाऊद ला आशिरवाद दैऊन्दौ आई हौतिन ला सफल जुरयाऊन्दौ। दाऊद ऐ बादौ लडाई कौरुन्दौ, आई परमात्मा ऐ इस्राएल रौ दुश्मन हौरला हरायामै हौतिन रौ मौदद कौरुन्दौ। दाऊद ऐ यरुशलेम नगर ला जितवी हौतिज ला आपरौ राजधानी जुरयाऊन्दौ, जिन्चै हौसौ थाकुन्दौ आई राज कौरुन्दौ। दाऊद दुई बिशौ बौरौश सेग राजा थाकुन्दौ। हौतादु काल, इस्राएल सामर्थवान सी धनवान फिरुन्दो।

दाऊद ऐक मंदिर जुरयानौ चाएन थयौ जिनचै सैब इस्राएली परमात्मा रौ अराधना कौरी बौल्सा आई हौतिन ला बलिदान दैई बौल्सा। लगभग चार रा बौरौश सेग, हौसौ मानुषा मूसा रौ जुरयाऊन्दौ मैठिनौ डेरा कै परमात्मा रौ अराधना कौरैन थै आई हौतिन ला बलिदान दैन थै।

पोऱ हौतिनचै नातान नाव रौ ऐक भविष्य जान्दौ थयौ। परमात्मा ऐ हौतिन ला दाऊद ला हौई बौल्मै भैजी:“ तैईए बादौ लडाई खौटुंदौस, हौतिर रौ तैईए तू मैरौ तैईए हौई मन्दिर नूजुरयाए। हौई तैरौ छैल्डू जुरयाएस। तैबी, हांउ तांऊला बादौ आशिरवाद दिसु। तैरौ ऐक वंशज सौदा ला मैरौ मानुषा गाश राजा रौ रु कै राज कौरेस।” सौदा ला राज कौरदौ स्या हौसौ दाऊद रौ ऐकलौता वंशज मसीहस। मसीह परमात्मा रौ चुनुदौ मानुष थयौ जून संसार रौ मानुषा ला हौतैन रौ पाप हौरका बौचाएस।

जैतरै दाऊद ऐ नातान रौ संदेश ला शुनौ तै हौतिनै परमात्मा रौ धन्यवाद कौरुन्दौ आई हौतिन रौ पुजापाट कौरुन्दौ। परमात्मा हौतिन रौ प्रतिष्ठा ला बौडायाएन थयौ आई होतिन ला बादौ आशिरवाद दैन थयौ। बेशक, दाऊद नाजान्दौ थयौ कि परमात्मा हौई बाते हौरला कैतरै कौरैस। ईमबरी तामौरी जान्दै कि इस्राएल रौ मानुषा ला बादौ बौरौश सेग लगभग हजार बौरौश सेग मसीह आछनौ पौखनौ स्या।

दाऊद ऐ बादौ बौरौश सेग न्याय सी आपरौ मानुषा गाश राज कौरुन्दौ। हौतिनै बादौ निछौल ऐ परमात्मा रौ बातै हौरला मौन्याऊन्दौ आई परमात्मा ऐ हौतिन ला आशिरवाद दैऊन्दौ। बल्कि, हौतिनै आपरौ जिन्दगी रौ अन्त कै परमात्मा रौ खिलाफ वाल कौचरौ पाप खौटुन्दौ थयौ।

ऐक दयार दाऊद ऐ आपरौ महल का बाय शाऊन्दौ आई ऐक शारे देन ला दौईनौ दैखुन्दौ। हौसौ हौतैस ला नौरौईन्दौ थयौ, पौर हौतिनै पौता कौरुन्दौ कि हौतैस रौ नाव बतशेबा थयौ।

आपरौ नजर ला हटायानौ रौ बजाए, दाऊद ऐ हौतैस ला आप गाछै आन्मै तैईए मानुष भैजुन्दौ। हौसौ हौतैस सी सुतुन्दौ आई हौतैस ला वापिस घौरे भैजुन्दौ। ऐक छिब्या पिछु बतशेबा ऐ हौई बौली दाऊद गाछै संदेश भैजुन्दौ कि हौसौ दुई डेसीस।

बतशेबा रौ पुंशा ऊरिय्याह नाव रौ ऐक मानुष थयौ। हौसौ दाऊद रौ बडिया सैना हौरमाज का ऐक थयौ। ईमबरी हौसौ लडाई कौरमै ला बाय नाशी थयौ। दाऊद ऐ ऊरिय्याह ला लडाई का वापिस बेदी हौतिन ला आपरौ देन सी थाकमै ला बौली। पौर आईक्या सैना लडाई कै थै हौतिर रौ तैईए ऊरिय्याह ऐ घौरै नाशनौ का मना कौरुन्दौ। तै दाऊद ऐ ऊरिय्याह ला वापिस लडाई कै भैजुन्दौ आई सेनापति ला हौतिन ला लडाई कै हौयौ जागा कै जागमै ला बौलुन्दौ जिन्चै दुश्मौन सैबका शक्तिशाली हौयस ताकि हौसौ मौरैस। तै हौयौ फिरुन्दौ कि ऊरिय्याह लडाई कै मौरुन्दौ।

ऊरिय्याह लडाई कै मौरी पिछु दाऊद ऐ बतशेबा सी शादी कौरुन्दौ। पिछांए का, हौतैसै दाऊद रौ छैलडु ला जौन्म दैऊन्दौ। दाऊद ऐ जि खौटौ हौतिज का परमात्मा वाल रोशै थयौ, हौतिर रौ तैईए हौतिनै नातान भविष्य जान्दौ ला दाऊद ला हौई बौलमै ला भैजुन्दौ कि हौतिन रौ पाप केत्तेग कौचरौ थयौ। दाऊद ऐ आपरौ पाप रौ पश्चाताप कौरुन्दौ आई परमात्मा ऐ हौतिन ला माफ कौरुन्दौ। आपरौ बाकि जिन्दगी कै , आपरौ काठौ दयारौ कै बी दाऊद परमात्मा रौ पिछांए-पिछांए हान्डुन्दौ आई हौतिन रौ बातै हौरला मौन्याऊन्दौ।

पौर दाऊद रौ छैल्डू मौरुन्दौ। हौई तरिका ऐ परमात्मा ऐ दाऊद ला सजा दैऊन्दौ। हौजरौ अलावा, दाऊद मौरैन सेग, हौतिन रौ आपरौ पैरै रौ ऐक्या मानुषा ऐ हौतिन रौ खिलाफ लडाई कौरुन्दौ, आई दाऊद रौ आपरौ शक्ति काम फिरी थयौ। पौर परमात्मा विश्वासयोग्य थयौ आई ईमबरी बी हौतिनै हौसौ कौरी जि हौतिनै दाऊद सि कौरनौ वादा कौरी थयौ कि हौसौ कौरैस , बेशक दाऊद ऐ हौतिन रौ आज्ञा नौमौन्याई थयौ। पिछांए का ,दाऊद सि बतशेबा रौ आईक छैल्डु फिरुन्दौ, आई हौतैनोरिए हौतिन रौ नाव सुलैमान जागी।