18. बान्टुन्दौ इलाका।

दाऊद राजा ऐ दुई बिशौ बौरौश सेग राज कौरुन्दौ। तै हौसौ मौरुन्दौ,आई हौतिन रौ छैल्डु सुलैमान ऐ इस्राएल गाश राज कौरनौ शुरु कौरुन्दौ। परमात्मा ऐ सुलैमान सि बातै बातायुन्दौ आई हौतिन का पुछी कि हौसौ सेबका बौदी कि चान्दौस कि परमात्मा हौतिन ला कौरैस। सुलैमान ऐ परमात्मा का मांगुन्दौ कि हौसौ हौतिन ला बादौ बुध्दिमान जुरयाए। हौई बातै ऐ परमात्मा ला खुश कौरुन्दौ,हौतिर रौ तैईए परमात्मा ऐ सुलैमान ला संसार रौ सेबका बुध्दिमान मानुष जुरयाऊन्दौ। सुलैमान ऐ बादौ बातै हौरला शिखयुन्दौ आई हौसौ ऐक बुध्दिमान राजा थयौ। परमात्मा ऐ हौतिन ला बादौ धनवान बि जुरयाऊन्दौ थयौ।

यरुशलेम सुलैमान ऐ हौसौ मन्दिर ला जुरयाऊन्दौ जिररौ तैईए हौतिन रौ बा ऐ योजना जुरयाई थयौ आई सामान ला कौठा कौरी थयौ। ऐ मानुषा मैठिनौ डैरा रौ बजाए मन्दिर कै परमात्मा रौ अराधना कौरैन थै आई हौतिन ला बलि चढायांदै थै। परमात्मा आछिन्दै मन्दिर कै हाजिर थाकदौ थयौ,आई हौतिनचै हौसौ आपरौ मानुषा सि थाकदौ थयौ।

पौर सुलैमान ऐ आईक देश हौररौ देनीपैर सी प्यार कौरुन्दौ। हौतिनै बादौ लगभग ऐक हजार देनीपैर सी शादी कौरीन्दै परमात्मा रौ अवज्ञा कौरुन्दौ! हौतैन माज बादौ देनीपैरै आईक देश हौरका आछुन्दी आई आपसी आपरौ देव हौरला आनुन्दौ आई हौतेन रौ अराधना कौरनौ जारी जागुन्दौ। जैतरै सुलैमान बूढौ फिरौ तै हौतिनै बी हौतैन रौ देव हौररौ अराधना कौरुन्दौ।

हौररौ तैईए परमात्मा सुलैमान सी रोशे थयौ। हौतिनै बौलुन्दौ कि हौसौ इस्राएल देश ला दूई इलाका हौरकै बान्टी हौतिन ला डान्ड दैस। हौई सुलैमान मौरी पिछु हौयौ खौटैस।

सुलैमान मौरी पिछु,रहबाम राजा फिरुन्दौ। इस्राएल देश रौ सेब मानुषा हौतिन ला आपरौ राजा रौ रुप कै स्वीकार कौरमै ला ऐक सात कौठा फिरुन्दै। हौतैनोरिए रहबाम ला शिकायत कौरिन्दौ कि सुलैमान ऐ हौतैन का बादौ काठौ मैहनत कौरनौ भैजुन्दौ थयौ आई बादौ माम्ला मांगुन्दौ थयौ। हौतैनोरिए रहबाम ला अर्जी कौरुन्दौ कि हौतैन का कम काम खौटाए।

पौर रहबाम ऐ हौतैन ला बौडौ ऐ मूर्खता ऐ जवाब दैऊन्दौ, “तोमोरी बौलैन कि मैरो बा सुलैमान ऐ तोमोर का काठौ काम खौटाई। पौर हांऊ तोमोर का हौतिज का बी बौदी काठौ काम खौटासु, आई हांऊ तोमोर ला हौतिज का बी बौदी आसे कौरसु।”

जैतरै मानुषा ऐ हौतिन ला हौयौ बौलनौ शुनौ तै हौतैन माज का बादौ ऐ हौतिन रौ खिलाफ बलवा कौरुन्दौ। दौश खानदान हौरिए हौतिन ला शौठयाऊन्दौ; हौतिन सी ऐ ऐखौ दुई खानदान ऐ थाकुन्दै। हौई दुई खानदान हौरिए आपला यहूदा रौ इलाका बौलुन्दौ।

बाकी दौश खानदान हौरिए यारोबाम नाव रौ ऐक मानुष ला आपरौ राजा जुरयाऊन्दौ। हौई खानदान देश रौ उत्तर-पूर्वी भाग कै थै। हौतैनोरिए आपला इस्राएल रौ इलाका बौलुन्दौ।

पौर यारोबाम ऐ परमात्मा रौ खिलाफ बलवा कौरुन्दौ आई मानुषा का पाप खौटाऊन्दौ। हौतिनै आपरौ मानुषा का अराधना कौरमै ला दुई मुर्ति हौरी जुरयाऊन्दौ। हौतैनै ऐ यहूदा रौ इलाका कै यरुशलेम कै परमात्मा रौ मन्दिर कै हौतिन रौ अराधना कौरमै ला नौन्छुन्दै।

यहूदा सी इस्राएल रौ इलाका दुश्मौन फिरुन्दै आई सौदा आपुरी माज लौसैन थै।

इस्राएल रौ नौऊवो इलाका कै, सेबे राजा मारे थै। हौतैन माज का बादौ राजा हौतेन रौ जागा गाश राजा फिरनौ इच्छा जागदै स्या आईक इस्राएल रौ मानुषा रौ हात का मौरुन्दै थै।

इस्राएल इलाका रै सेबे राजा हौरिए आई बौदीभाग मानुषा ऐ मुर्ति हौररौ अराधना कौरुन्दौ। जैतरै हौतैनोरिए हौयौ खौटुन्दौ, तै हौतैनोरी सौदा वैश्या हौरसी सुतुन्दै आई हौन्चै सेग कि बादौ बैरै मुर्ति हौररौ मुखुंमाये छौकुर पैरैला बलि बि दैऊन्दौ।

यहूदा इलाका रै राजा,दाऊद ऱौ वंशज थै। हौई राजा हौर माज एक्या बौलै मानुष थै जुनै न्याय सी राज कौरुन्दौ आई परमात्मा रौ अराधना कौरुन्दौ। पौर यहूदा रै बौदीभाग राजा मारे थै। हौतैनोरीए मारे फिरी राज कौरुन्दौ,आई मुर्ति हौररौ पुजापाट कौरुन्दौ। हौन्चै सेग कि हौतैन माज एक्या राजा हौरिए नौकली देव हौर गाछै आपौर रौ छैल्डु पैरै ला बी बलि दैऊन्दौ। यहूदा रै बौदीभाग मानुषा ऐ बी परमात्मा रौ खिलाफ बलवा कौरुन्दौ आई आईक्या देव हौररौ पुजापाट कौरुन्दौ।