22. यूहन्ना रौ जौन्म।

अतीत कै, परमात्मा ऐ आपरौ भविष्य जान्दै स्या हौर सि बातै बातावी थयौ हौतिर रौ तैईए हौतैनै मानुषा सि बातै बातावी थै। पौर हौतरै का पिछु चार रा बौरौश बितैन सैग हौतिनै हौतैन सि बातै ना बातावी । तै परमात्मा ऐ जकर्याह नाव रौ भविष्य जान्दौ स्या गाछै एक स्वर्गदूत ला भैजुन्दौ। जकर्याह सि आपरौ देन एलिशिबा परमात्मा रौ आदर कौरदै थै। हौतैनै बादौ बूडै फिरी थै, आई हौतैन रौ एक बि छैल्डु निफिरी थयौ।

हौसौ स्वर्गदूत ऐ जकर्याह ला बौलुन्दौ, “तैरौ देन एलिशिबा रौ एक छैल्डु जौन्मैस। तु हौतिन रौ नाव यूहन्ना जागै। परमात्मा हौतिन ला पवित्र आत्मा ऐ परिपूर्ण कौरैस, आई यूहन्ना मानुषा ला मसीह ला अपनायामै ला त्यार कौरैस।” जकर्याह ऐ जवाब दैऊन्दौ, “हाऊ सि मैरौ देन छैल्डु पैदा कौरमै ला बादौ बुडै सि! हाऊ कैव जानु कि तु माना दिमांग बौलैन सै?”

हौसौ स्वर्गदूत ऐ जकर्याह ला जवाब दैऊन्दौ, “ताऊ गाछै हौई बौलौ काचा ला आनमै तैईए माना परमात्मा ऐ भैजुन्दौ स। क्यु बौलता तैईए मुगाश विश्वास नौकौरी, हौतिर रौ तैईए छैल्डु जौरमैन सेग तू बाताई नौबौलै।” हौतरै, जकर्याह बाताई नौबौलैन थयौ। तै हौसौ स्वर्गदूत जकर्याह गाछै का ठुरुन्दौ। हौजका पिछु, जकर्याह घौरै वापिस आछुन्दौ आई हौतिन रौ देन दुई डे सि फिरुन्दी।

जैतरै एलिशिबा छौ मास रि दुई डे सि थी, तै हौसौए स्वर्गदूत अचानक ऐ एलिशिबा रौ पैरैजोरै गाछै प्रकट फिरुन्दौ, जासरौ नाव मरियम थयौ। मरियम कुँवारी थी आई शादी फिरमै ला यूसुफ नाव रौ मानुष सि हौतैस रौ मंगनी फिरी थयौ। स्वर्गदूत ऐ बौलुन्दौ, “तु दुई डे से फिरसै आई एक छैल्डु ला जौन्म दिसै। ताऊना हौतिन रौ नाव यीशु जागनौ स्या। हौसौ सेब-शक्ति स्या परमात्मा रौ छैल्डु हौएस आई सौदा ला राज कौरैस।”

मरियम ऐ जवाब दैऊन्दौ, “हौई क्यौ फिरैस, क्यु बौलता हांऊ ता कुँवारी सु?” हौसौ स्वर्गदूत ऐ समझायाऊन्दौ, पवित्र आत्मा तांऊ गाश आछैस, आई परमात्मा रौ सामर्थ तांऊ गाश छाया कौरैस। हौतिर रौ तैईए हौसौ छैल्डु पवित्र हौएस, आई हौसौ परमात्मा रौ छैल्डु हौएस। जि हौसौ स्वर्गदूत ऐ बौलुन्दौ हौतिज गाश मरियम ऐ विश्वास कौरुन्दौ।

हौई फिरी पिछु हौतरे, मरियम ऐ नाशिन्दै एलिशिबा सि बैठयुन्दी। जैव ऐ मरियम ऐ हौतैस ला नमस्कार कौरुन्दौ, एलिशिबा रौ छैल्डु हौतैस रौ पेट कै ऊछलुन्दौ। हौतैन रौ तैईए परमात्मा ऐ जि कौरी थयौ हौतिर रौ बारे कै हौसौ देनीपैरै एक साथ खुश फिरुन्दी। एलिशिबा सि त्रौन मास थाकी पिछु, मरियम घौरै वापिस आछुन्दी।

हौज का पिछु, एलिशिबा ऐ आपरौ छैल्डु ला जौन्म दैऊन्दौ। जकर्याह सि एलिशिबा ऐ हौसौ छैल्डु रौ नाव यूहन्ना जागुन्दौ, जैव कि हौसौ स्वर्गदूत ऐ हूकुम दैई थयौ। तै परमात्मा ऐ जकर्याह ला बातामै ला सक्षम कौरुन्दौ। जकर्याह ऐ बौलुन्दौ, “परमात्मा रौ स्तुति हो, क्यु बौलता हौतिनै आपरौ मानुषा रौ मौदद कौरमै ला याद जागुन्दौस! हे मैरौ छैल्डु, तू सेब-शक्तिस्या परमात्मा रौ भविष्य बौलदौस्या हुसै। तु मानुषा ला बौलसै कि हौतैनै क्यौ आपरौ पाप हौररौ तैईए माफी पायाई बौलसा!”