21. परमात्मा मसीह ला बैजनौ रौ वायदा कौरदौस।

जैतरै परमात्मा ऐ संसार रौ रचना कौरी थयौ, हौसौ जान्दौ थयौ कि हौतिन ला पिछांए का कादु दयार मसीह ला भैजनौ फिरैस। हौतिनै आदम सी हव्वा का वायदा कौरी कि हौसौ हौयौ कौरैस। हौतिनै बौली कि हव्वा का एक वंशज जौरमैस जुन साँप रौ मुटकांग ला दबायाएस। जुन साँप ऐ हव्वा ला धोखा दैऊन्दौ हौसौ बेशक शैतान थयौ। परमात्मा रौ मौतलब थयौ कि मसीह शैतान ला पुरा हरायाएस।

परमात्मा ऐ अब्राहम का वायदा कौरी थयौ कि हौतिन रौ जरिया ऐ संसार रौ सेबे जाति हौरी आशिरवाद पायाएस। परमात्मा पिछांए का कादु मसीह ला भैजनौ जरिया ऐ हौई वायदा ला पुरा कौरैस। हौसौ मसीह संसार रौ सेब जाति रौ मानुषा ला हौतैन रौ पाप का छुडायाएस।

परमात्मा ऐ मूसा का वायदा कौरी थयौ कि भविष्य कै हौसौ मूसा सि बराबौर एक आईक भविष्य जान्दौ स्या ला भैजैस। हौसौ भविष्य जान्दौ स्या मसीह हौएस। हौई तरीका ऐ, परमात्मा ऐ फिरी वायदा कौरी कि हौसौ मसीह ला भैजैस।

परमात्मा ऐ राजा दाऊद का वायदा कौरी थयौ कि हौतिन रौ एक वंशज मसीह हौएस। हौसौ राजा हौएस आई परमात्मा रौ मानुषा गाश सौदा ला राज कौरैस।

परमात्मा ऐ यिर्मयाह भविष्य जान्दौ स्या सि बातै बातावी आई बौली कि एक दयार हौसौ एक नौऊवौ समझौता कौरैस। हौसौ नौऊवौ समझौता इस्राएल सि सीनै गाश कौरुन्दौ पुरानौ समझौता जैव नौहौएस। जैतरै मानुषा सि हौसौ आपरौ नौऊवौ समझौता कौरैस , तै हौसौ हौतैन गाछै आपला मानुष रौ रू कै प्रकट कौरैस। सेब मानुषा हौतिन सि प्रेम जागसा आई हौतिन रौ व्यवस्था रौ पालन कौरनौ इच्छा जागसा। परमात्मा ऐ बौलौ कि हौई हौतिन रौ व्यवस्था ला हौतैन रौ जिवा हौर गाश लिखनौ जैव हौएस। हौतैनै हौतिन रौ मानुषा हुसा, आई परमात्मा हौतैन रौ पाप हौरला माफ कौरैस। हौसौ मसीह हौएस जुन हौतैन सि हौसौ नौऊवौ समझौता कौरैस।

परमात्मा रौ भविष्य जान्दै स्या ऐ हौई बि बौली कि मसीह एक भविष्यवक्ता हुएस, याजक एक भविष्य जान्दौ स्या हौसौ मानुष स जुन परमात्मा रौ वचन हौरला शुनदौस आई फिरी मानुषा ला परमात्मा रौ संदेश हौरला शुनायान्दौस। जासला भैजनौ रौ परमात्मा ऐ वायदा कौरी थयौ हौसौ मसीह एक सिध्द भविष्य जान्दौ स्या हौएस। मौतलब हौसौ मसीह परमात्मा रौ संदेश हौरला ऐस्सा शुनैस, आई हौसौ मानुषा ला हौसौ संदेश हौरला ऐस्सा शिखाएस।

इस्राएली याजकहौरी ऐ मानुषा रौ तैईए परमात्मा गाछै बलि बैजनौ जारी जागुन्दौ। हौई बलिदान मानुषा रौ पाप हौररौ तैईए हौतैन ला परमात्मा ऐ सजा दैन्नौ रौ बौदला कै चढायाई थयौ। याजक हौरिए मानुषा रौ तैईए प्रार्थना बि कौरी। पौर, हौसौ मसीह सिध्द महायाजक हौएस जुन परमात्मा ला दैमै ला एक सिध्द बलि रौ रु कै आपला चढायाएस। मौतलब, हौसौ कादुई पाप नौखौटा, आई जैतरै हौसौ आपला बलि फिरमै ला दैस, तै संसार रौ कुने बि आईक बलि जुरुरी नौहौएस।

मानुषा रौ समूह हौर गाश राजा सि प्रधान राज कौरदै सा, आई कादु-कादु हौतैनै गौलती होऱी कौरदै सा। राजा दाऊद ऐ ऐखो इस्राएल रौ मानुषा गाश राज कौरुन्दौ, पौर राजा दाऊद रौ वंशज मसीह पूरा संसार गाश राज कौरैस। हौजरौ अलावा, हौसौ सौदा न्यायपूर्ण रीति ऐ राज कौरैस, आई ठीक निर्णय हौरी कौरैस।

परमात्मा रौ भविष्य जान्दै स्या हौरी ऐ मसीह रौ बारे कै बादौ बातै हौरी बौलुन्दौ। उदाहरण रौ तैईए, मलाकी भविष्य जानदौ स्या ऐ बौलुन्दौ कि मसीह रौ आछनौ का पैहलै एक आईक भविष्य जान्दौ स्या आछैस। हौसौ भविष्य जान्दौ स्या बादौ महत्वपूर्ण हौएस। हौजरौ अलावा, यशायाह भविष्य जान्दौ स्या ऐ लिखुन्दौ कि मसीह एक कुँवारी का जौन्म पायाएस। आई मीका भविष्य जान्दौ स्या ऐ बौलुन्दौ कि मसीह बैतलहम नगर कै जौन्म पायाएस।

यशायाह भविष्य जान्दौ स्या ऐ बौलुन्दौ कि मसीह गलील रौ जागा कै थाकैस। जुन मानुषा बादौ दु:खी सा मसीह हौतैन ला शान्ति दैस। हौसौ कैदी हौरला बि आजाद कौरैस। मसीह मरीज हौरला आई जुन शुनी नौबौलदै, शाई नौबौलदै, बाताई नौबौलदै, या हान्डी नौबौलदै हौतैन ला बि चांगा कौरैस।

यशायाह भविष्य जान्दौ स्या ऐ हौई बि बौलुन्दौ कि मानुषा मसीह का नफरत कौरसा आई हौतिन ला मौन्यानौ का मना कौरसा। आईक भविष्य जान्दै स्या हौरीऐ बौलुन्दौ कि मसीह रौ एक कौनैस हौतिन रौ खिलाफ उजैस। जकर्याह भविष्य जान्दौ स्या ऐ बौलुन्दौ कि हौतिन रौ हौई कौनैस हौयौ कौरमै ला आईक्या मानुषा का चाँदी रौ बिशौ दौश सिक्का मांगैस। हौजरौ अलावा, ऐक्या भविष्य जान्दै स्या हौरीए बौलुन्दौ कि मानुषा मसीह ला मारी बैजसा, आई हौई कि हौतैनै हौतिन रौ गाछौ हौररौ तैईए जुआ खैलसा।

भविष्य जान्दै स्या हौऱिए हौई बि बौलुन्दौ कि मसीह क्यौ मौरैस। यशायाह ऐ भविष्यवाणी कौरुन्दौ कि मानुषा मसीह गाश थुकसा, हौतिन रौ मजाक उडायासा, आई हौतिन ला लौससा। हौतैनै हौतिन ला फुटासा आई हौसौ बादौ दु:ख आई कौष्ट ऐ मौरैस, बल्कि हौतिनै केछै गलत नौखौटी हौएस।

भविष्य जान्दै स्या ऐ हौई बि बौलुन्दौ कि मसीह पाप नौखौटैस। हौसौ सिध्द हौएस। पौर हौसौ हौतिर रौ तैईए मौरैस परमात्मा हौतिन ला आईक्या मानुषा रौ पाप हौररौ तैईए सजा दैस। हौतिन रौ मौरनौ का मानुषा परमात्मा सि बैठिमै ला सक्षम फिरसा। हौतिर रौ ऐ तैईए परमात्मा मसीह ला मौरनौ चाएन।

भविष्य बौलदै स्या ऐ हौई बि बौली कि परमात्मा मसीह ला मौरुन्दै हौरी माज का जिऊन्दौ कौरैस। हौई दैखान्दौस कि हौई सेब नौऊवौ समझौता कौरमै ला परमात्मा रौ योजना थयौ, ताकि हौसौ हौतैनै ला बौचाई बौलैस जुनै हौतिन रौ खिलाफ पाप खौटी स।

परमात्मा ऐ भविष्य बौलदैस्या हौरी गाछै मसीह रौ बारे कै बादौ बातै हौरी प्रकट कौरुन्दौ, पौर मसीह हौसौ भविष्य बौलदैस्या हौर माज कासरौऐ जीवन काल कै ना आछी थयौ। हौई भविष्य वाणी हौरी बौलनौ का चार रा बौरौश पिछु, ठीक बेला गाश, परमात्मा मसीह ला हौई संसार कै भैजैस।