20. गुलामी आई वायदा रौ देश कै वापिस आछनौ।
इस्राएल रौ इलाका आई यहूदा रौ इलाका दुईए ऐ परमात्मा रौ खिलाफ पाप खौटुन्दौ। हौतैनोरिए हौसौ समझौता ला बानुदौ जून परमात्मा ऐ हौतैन सी सीनै पौर्वत गाश कौरी थयौ। परमात्मा ऐ हौतैन ला पश्चाताप कौरमै आई दुबारा हौतिन रौ अराधना कौरमै ला चेतावनी दैमै ला आपरौ भविष्य जान्दै स्या ला भैजुन्दौ, पौर हौतैनोरिए हौतैन रौ बातै हौरला मौन्यानौ का मना कौरुन्दौ।
हौतिर रौ तैईए परमात्मा ऐ हौतैन रौ दुश्मौन हौरला हौतैन ला नाश कौरमै समर्थ जुरयाई दूईए इलाका हौरला सजा दैऊन्दौ। अश्शूर ऐक आईक देश थयौ जून बादौ शक्ति स्या फिरी थयौ। हौतैनै आईक देश हौरला बादौ मारै बी थै। हौतैनोरिए आछिन्दै इस्राएल रौ इलाका ला नाश कौरुन्दौ। अश्शूरी हौरिए आछिन्दै इस्राएल रौ इलाका कै बादौ मानुषा ला मारी बैजुन्दौ, जि चाऊन्दौ हौसौ लुटयाऊन्दौ, आई देश रौ बादौ जागा ला जालुन्दौ।
अश्शूरी हौरिए सैब अगुवा हौरला, साऊकार मानुषा ला, आई हौयौ मानुषा ला जुन किमौती सामान जुरयाई बौल्दै थै ऐक साथ कौठा कौरुन्दौ आई हौतैनोरिए हौतैन ला अश्शूर देश निऊन्दौ। इस्राएल कै ऐखो ऊतुरी गरीब इस्राएली ऐ थाकुन्दै।
तै अश्शूरी मानुषा हौसौ देश कै थाक्मै ला आईक देश रै मानुषा ला गिनुई आछुन्दै। हौसौ आईक देश रै मानुषा ऐ हौसौ नगर हौरला दुबारा जुरयाऊन्दौ। जून इस्राएली हौतिनचै बौची थै हौतैन सी हौतैनोरिए शादी कौरुन्दौ। हौतैनोरी रौ वंशज ला सामरी बौल्दै।
यहूदा रै इलाका रै मानुषा ऐ दैखौ कि कैव परमात्मा ऐ हौतिन गाश विश्वास नौकौरमै आई हौतिन रौ बातै हौरला नौमौन्यानौ कारण ऐ इस्राएल रौ इलाका रै मानुषा ला सजा दैई थयौ। पौर तै बी हौतैनोरिए कनानी हौररौ देव हौररौ मुर्ति हौररौ पुजापाट कौरुन्दौ। परमात्मा ऐ हौतैन ला चेतावनी दैमैला भविष्य जान्दै स्या ला बैजुन्दौ, पौर हौतैनोरिए शुन्नौ का मना कौरुन्दौ।
लगभग रा बौरौश पिछु अश्शूरी हौरिए इस्राएल रौ इलाका ला नाश कौरुन्दौ। परमात्मा ऐ बेबीलोन रौ राजा, नबूकदनेस्सर ला यहूदा रौ इलाका गाश हमला कौरमै ला बैजुन्दौ। बेबीलोन ऐक शक्ति स्या देश थयौ। यहूदा रौ राजा नबूकदनेस्सर रौ गुलाम फिरमै आई सौदा बौरौश हौतिन ला बादौ रुपया दैमै ला सहमत फिरुन्दौ।
पौर ऊतुरी बौरौश पिछु, यहूदा रौ राजा ऐ बेबीलोन रौ खिलाफ बलवा कौरुन्दौ। हौतिर रौ तैईए बेबीलोन रौ मानुषा ऐ वापिस आछी यहूदा रौ इलाका गाश हमला कौरुन्दौ। हौतैनोरिए यरुशलेम नगर गाश कब्जा कौरुन्दौ, आई नगर सी मन्दिर रौ खजाना ला लुटयाई निऊन्दौ।
बलवा कौरनौ कारण ऐ यहूदा रौ राजा ला सजा दैमैला, नबूकदनेस्सर रौ सैना हौरिए राजा रौ छैल्डु ला हौतिन रौ मुखुंगमाए मारी बैजुन्दौ आई फिरी हौतिन ला आन्धा कौरुन्दौ। हौतिज पिछु, हौतैनौरिए राजा ला नीऊन्दौ ताकि हौसौ बेबीलोन रौ जेलखाना कै मौरैस।
नबूकदनेस्सर सि हौतिन रौ सैना ऐ यहूदा रौ इलाका रै लगभग सैबे मानुषा ला बेबीलोन निऊन्दौ, ऐखो सैबका गरीब मानुषा ला पिछांऐ शौठयाई ताकि हौतैनै डौखरै नाज राजासा। हौई बेला ला बंधुआई बौलुन्दौ जिजकै परमात्मा रौ मानुषा ला प्रतिज्ञा रौ देश का निकिलमै ला बैबस कौरुन्दौ थयौ।
बेशक परमात्मा ऐ आपरौ मानुषा ला हौतैन रौ पाप रौ तैईए बंधुआई का निनौ जरिया ऐ सजा दैई थयौ, तैबी हौसौ हौतेन ला या आपरौ वायदा हौरला निबिसरुई थयौ। परमात्मा ऐ आपरौ मानुषा गाश नजर जागनौ जारी जागुन्दौ आई आपरौ भविष्य जान्दै स्या रौ जरिया ऐ हौतैन सि बातै बाताएन थाकुन्दौ। हौतिनै वायदा कौरुन्दौ कि त्रौन बिशौ दौश बौरौश पिछु, हौतेनै फिरी वायदा रौ देश कै वापिस आछसा।
लगभग त्रौन बिशौ दौश बौरौश पिछु, फारस रौ राजा कुस्त्रू ऐ बेबीलोन ला हरायाऊन्दौ, हौतिर रौ तैईए बेबीलोन रौ साम्राज्य रौ बजाए फारस रौ साम्राज्य ऐ बादौ देश हौर गाश राज कौरुन्दौ। इस्राएली मानुषा ला ऐ यहूदी बौल्दै थै। हौतैन माज का बादौ ऐ आपरौ पुरा जिन्दगी बेबीलोन बितायाऊन्दौ थयौ। ऐखो गाटो बूढे यहूदी हौरला ऐ यहूदा रौ देश याद थयौ।
फारस रौ मानुषा बादौ सामर्थ स्या थै, पौर हौतैनोरिए आपरौ जितिऊन्दै मानुषा गाश दया कौरुन्दौ। फारसी मानुषा रौ राजा फिरी ऐक छिब्या पिछु, कुस्त्रू ऐ ऐक हुकूम दैऊन्दौ कि जून बी यहूदी जून यहूदा वापिस नाशनौ चाएन थयौ, हौसौ फारस का निकली वापिस यहूदा नाशी बौल्दौ स्या। हौन्चै सेग कि हौतिनै हौतैन ला मन्दिर ला दुबारा जुरयामै ला रुपया बि दैऊन्दौ। तै बंधुआई रौ त्रौन बिशौ दौश बौरौश पिछु, यहूदी हौररौ ऐक लौऊडौ समूह यहूदा राज्य रौ यरुशलेम नगर कै वापिस आछुन्दै।
जैतरै हौसौ मानुषा यरुशलेम पौछुन्दै तै हौतैनोरिए मन्दिर ला आई नगर रौ चारे बिलै रौ दिवाल ला दुबारा जुरयाऊन्दौ। फारसी मानुषा ईम्बरी बि हौतैन गाश राज कौरदै थै पौर ऐक बैरै फिरी हौतैनै प्रतिज्ञा रौ देश कै थाकैन थै आई मन्दिर कै पुजापाट कौरैन थै।
2 राजा पाठ 17; 24-25; 2 इतिहास 36; एज्रा 1-10; नहेम्याह 1-13 का एक बाइबल रौ कौथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।