24. यूहन्ना यीशु ला बपतिस्मा दैन्दौ स

एलीशिबा सि जकर्याह रौ छैल्डु यूहन्ना, बौडौ फिरी एक भविष्य जान्दौ स्या फिरुन्दौ। हौसौ जांगलै थाक्दौ थयौ, आई जंगली मौ सि टिडडी हौरी खान्दौ थयो, आई ऊँट रौ बाल ऐ जुरयाऊन्दौ गाछौ लाईन्दौ थयौ।

बादौ मानुषा यूहन्ना रौ बातै शुन्मै तैईए जांगलै नाशी आछुन्दै। हौतिनै हौई बौली हौतैन ला प्रचार कौरुन्दौ, “पश्चाताप कौरौ, क्यु बौलता स्वर्ग रौ राज्य नेर स!”

जैतरै मानुषा ऐ यूहन्ना रौ काचा ला शुनौ, तै हौतैन माज का बादौ ऐ आपरौ पाप हौर का पश्चाताप कौरुन्दौ, आई यूहन्ना ऐ हौतैन ला बपतिस्मा दैऊन्दौ। यूहन्ना ला शामै तैईए बादौ धार्मिक प्रधान हौरी बि आछुन्दै, पौर हौतैनोरिए आपरौ पाप हौर रौ पश्चाताप या अंगीकार नौ कौरुन्दौ।

यूहन्ना ऐ धार्मिक प्रधान हौर ला बौलुन्दौ, “हे साँप रौ काथा जहरिला मानुषा! पश्तावा कौरौ आई आपरौ व्यवहार ला बौदल्याव। परमात्मा हर हौसौ बोट ला काटी बैजैस जुन बौलौ फौल ना राजान्दौ, आई हौसौ हौतैन ला आग कै झौंकयाई बैजैस।” जि भविष्य जान्दै स्या हौरी ऐ बौलुन्दौ थयौ यूहन्ना ऐ हौतिज ला पूरा कौरुन्दौ, “शाव, हासाल ऐ हांऊ तांऊ गाछै आपरौ काचा आन्दौ स्या ला भैजसु जुन तांऊला बात जुरयाएस।”

एक्या धार्मिक नेता हौरी ऐ यूहन्ना ला पूछून्दौ कि की तु मसीह सै हा, “यूहन्ना ऐ जवाब दैऊन्दौ, हांऊ मसीह नुंवा, पौर हौसौ मुका पिछु आछैनस। हौसौ हौतेग महान स कि हांऊ हौतिन रौ चिन्दरी रौ फीता खुल्यानौ लायक बि नूसु।”

आईक दयार, यीशु बपतिस्मा मांगमै तैईए यूहन्ना गाछै आछुन्दौ। जैतरै यूहन्ना ऐ हौतिन ला दैखौ, तै हौतिनै बौलुन्दौ, “शाव! परमात्मा रौ गाबलु जुन संसार रौ पाप हौर ला आपगाश चुंगैस।”

यूहन्ना ऐ यीशु ला बौलुन्दौ, “हांऊ तांऊला बपतिस्मा दैन्नौ लायक नुसु। हौजरौ बजाए जरुरी स कि तू माना बपतिस्मा दै।” पौर यीशु ऐ बौलुन्दौ, “तांऊला माना बपतिस्मा दैन्नौ चान्दौ, क्यु बौलता हौयौ कौरी हाऊ परमात्मा रौ इछा पूरा कौरसु।” तै यूहन्ना ऐ हौतिन ला बपतिस्मा दैऊन्दौ, बल्कि यीशु ऐ कादुई पाप नौ कौरुन्दौ थयौ।

बपतिस्मा दैई पिछु जैतरै यीशु पानी का निकली बाए आछुन्दौ, तै परमात्मा रौ आत्मा कबूतर रौ रु कै प्रकट फिरुन्दौ आई तोल आछी हौतिन गाश बैशुन्दौ। हौतरै, परमात्मा ऐ स्वर्ग का बाताऊन्दौ। हौतिनै बौलुन्दौ, “तु मैरौ छैल्डु सै। हांऊ तांऊका प्रेम कौरदौ सु, आई हांऊ तांऊका वाल खुश सु।”

परमात्मा ऐ यूहन्ना ला बौलुन्दौ थयौ, “पवित्र आत्मा तोल आछी कास एक गाश बैशैस जासला तु बपतिस्मा दिसै।” हौसौए परमात्मा रौ छैल्डु स परमात्मा एखेस। पौर जैतरै यूहन्ना ऐ यीशु ला बपतिस्मा दैऊन्दौ, तै हौतिनै परमात्मा ला छैल्डु सी बातै बाताईनौ शुनी, हौतिनै छैल्डु सी परमात्मा ला दैखुन्दौ, जुन कि यीशु स, आई हौतिनै पवित्र आत्मा ला यीशु गाश उतरैन दैखुन्दौ।