25. शैतान यीशु रौ परख कौरदौ स

यीशु रौ बपतिस्मा फिरी पिछु हौतरै ऐ, पवित्र आत्मा हौतिन ला सुनसान जागा कै निऊन्दौ। यीशु हौतिनचै दुई बिशौ दयार आई दुई बिशौ राच थयौ। हौतादु काल हौतिनै ब्रौत जागुन्दौ, आई शैतान ऐ यीशु गाछै आछी पाप खौटामै तैईए हौतिन रौ परख कौरुन्दौ।

पहले, शैतान ऐ यीशु ला बौलुन्दौ, “आगर तु परमात्मा रौ छैल्डु सै तै हौई जान्टी हौर ला रौटी जुरयाव ताकि तु खाई बौल्सै!”

पौर यीशु ऐ शैतान ला बौलुन्दौ, “परमात्मा रौ वचन कै हौई लिखी स, ‘जिऊन्दौ थाकमै तैईए मानुष ला ऐखो खाऊ रौ जरुरत नुंदौ, पौर हौतैन ला हर हौसौ बातै रौ जरुरत स जि परमात्मा हौतैन ला बौल्दौ स!’”

तै शैतान ऐ यीशु ला मन्दिर रौ सेबका ऊशटौ सिरा गाश निऊन्दौ। हौतिनै यीशु ला बौलुन्दौ, “आगर तु परमात्मा रौ छैल्डु सै तै ईनचै का तोल लांग छाराव, क्यु बौलता लिखी स, ‘परमात्मा तांऊला चुंगमै तैईए आपरौ स्वर्गदूत हौर ला हुकूम दैस कि तैरौ खुन्डी हौर कै जान्टी रौ चोट नालागनौ चान्दौ।”

पौर यीशु ऐ हौसौ नौकौरुन्दौ जि शैतान ऐ हौतिन ला कौरमै ला बौली थयौ। हौजरौ बजाए, हौतिनै बौलुन्दौ, “परमात्मा सेब ला बौलदौ स, ‘तु प्रभु आपरौ परमात्मा रौ परख नौकौरै।’”

फिरी शैतान ऐ यीशु ला संसार रौ सेब इलाका दैखाऊन्दौ। हौतिनै यीशु ला दैखाऊन्दौ कि हौतैनै केत्तेग शक्ति स्या थै, आई हौतैनै केत्तेग साहुकार थै। हौतिनै यीशु ला बौलुन्दौ, “हांऊ तांऊला हौई सेब दिसु आगर तु घुटना टेक्याई मैरौ आराधना कौरसै।”

यीशु ऐ जवाब दैऊन्दौ, “हे शैतान, मुगाछै का ठुर! क्युं बौलता पवित्रशास्त्र कै लिखिस कि तु ऐखो आपरौ परमात्मा ला प्रणाम कौर आई हौतिन रौए आराधना कौर।’”

यीशु ऐ शैतान रौ परख का हार नौ मौन्याऊन्दौ, हौतिर रौ तैईए शैतान हौतिन गाछै का ठुरुन्दौ। तै स्वर्गदूत आछी यीशु रौ सेवापानी कौरैन थै।