26. यीशु आपरौ सेवा शुरु कौरदौ स

शैतान रौ इम्तेहान हौर का मुकरिनौ का पिछु, यीशु वापस गलील रौ जागा कै आछुन्दौ। हौईए हौसौ जागा जिनचै यीशु थाकदौ थयौ। पवित्र आत्मा यीशु ला भारी ताकत दियैन थयौ, तै

यीशु नासरत नगर कै नाशुन्दौ। हौई हौसौ ऐ देश स जिन्चै यीशु आपरौ बचपन कै थाकदौ थयौ। सब्त रौ दयार तादु, हौसौ पूजा पाठ कौरनौ रौ जागा कै नशुनदौ। आंगमै हान्डदै स्या ऐ हौतिनला यशायाह भविष्य बौल्दौ स्या रौ सन्देश हौर रौ एक किताब दैऊन्दौ। हौतैनै चाईन थै कि हौसौ हौतिज ला शिखैस। तै यीशु ऐ हौसौ किताब ला खुलाई हौतिजरौ एक भाग ला मानुषा रौ तैईए शिखयुन्दौ।

यीशु ए शिखयुन्दौ, “परमात्मा ऐ माना आपरौ आत्मा देऊन्दौ स ताकि हाऊ कंगाल हौर ला सुसमाचार रौ प्रचार कौरी बौलसु। परमात्मा ऐ माना हौतिर रौ तैईए बैजिस कि हाऊ कैदी हौई ला आजाद कौरी बौलसु, अन्धा हौर ला फिरी दृष्टि दैई बौलसु, आई हौतैन ला छुटकारा दैमै जाल्ला आईक्या मानुषा दबाएन सा। हौई हौसौ बैलास जैतरै परमात्मा तामौर गास आपरौ दया कौरेस आई तामोर रौ मदद कौरैस।”

तै यीशु बैशुन्दौ। सेब मानुषा यीशु ला बौडौ ध्यान ऐ शाएन थै। हौतैनै जानदै थै कि पवित्र शास्त्र रौ जि सा भाग यीशु ऐ ईमरी शिखयु थयौ हौसौ मसीह रौ बारै कै थैव। यीशु ए बौलुन्दौ, “जुन बातै ईमरी मैईए तौमौर रौ तैईए शिखुइस ,हौसौ ईम्बरी बीतेन स।” सेब मानुषा हैरान थै। हौतैनोरिए बौलुन्दौ, “कि हौई युसुफ रौ छैलडु नुआया?”

तै यीशु ऐ बौलुन्दौ, “हौई दिमांग स कि मानुषा हौयौ कुन भी भविष्य बौलदौ स्या ला सविकार नौ कौरदै जुन हौतेन रौ ए देँश कै पौली बौडौ फिरुन्दौ। एलिय्याह भविष्य बौल्दौ स्या रौ बेला कै, इस्राइल के बादौ विधवा हौरी थै। पौर जैतरै त्रौन नौ आधौ बौरौश सैग ग्वैन नालागुन्दौ तै भी परमात्मा ऐ एल्लियाह ला कुनै विधवा रौ मदद कौरमै तैईए नेबैजुन्दौ। हौजरौ बजाय, परमात्मा ऐ एल्लियाह ला आईक दैश रौ विधवा गाछै बैजुन्दौ।

यीशु ऐ बौलनौ जारी जागुन्दौ, ‘आई एलीशा भविष्य बौल्दौ स्या रौ बेला कै, इस्राएल कै बादौ मानुषा बू का दुखी थै। पौर एलीशा ऐ हौतेन माज कासलाए चांगा नौकौरुन्दौ। हौतिनै ऐखो इस्राएल रौ दुशमन हौर रौ सेनापति नामान ला चांगा कौरुन्दौ।” पौर जुन मानुषा यीशु रौ बातै शुनेन थै हौतैने यहुदी थै। हौतिर रौ तैईए जैतरै हौतैनोरी ऐ यीशु ला हौई बौलदी बैरै शुनौ तै हौतैनोरिए यीशु गास रौश गारुन्दौ।

नासरत रौ मानुषा ऐ यीशु ला पाउन्दौ आई हौतिन ला आराधना रौ जागा का गिशी बाए निउन्दौ। हौतैनै यीशु ला मारी बैजमै तैईए तोल फिक्यमै ला एक ढौक रौ मुटकांग गास निउन्दौ। पौर यीशु भीड माज का निकलुन्दौ आई नासरत नगर ला शौठाई नाशुनदौ।

तै यीशु सेब गलील रौ जागा कै नाशुन्दौ। आई हौतिन गाछै बादौ भीड आछुन्दै। हौतैनै हौयौ बादौ मानुषा ला गिनुई आछुन्दै जुन बेजुई आइ अपंग थै। हौतैन माज ऐक्या शाई, हान्डी, शुनी आई बौली नौबौल्दै थै,आई यीशु ए हौतेन ला चांगा कौरुन्दौ।

हौजरौ अलावा, बादौ हौयौ मानुषा यीशु गाछै आछुन्दै जाल्ला भूत हौरी लागी थयौ। यीशु ए भूत हौर ला हौतैन का निकलमै ला हूकूम दैऊन्दौ। हौसौ भुत हौरी जिंगाएन थाकुन्दै, “ तू परमात्मा रौ छैलडु सै! भीड रौ मानुषा हैरान थै, आई हौतैनोरिए ऐ परमात्मा रौ स्तुती कौरुन्दौ।“

तै यीशु ए बारा पुशां पैरै ला चुनायाऊन्दौ जाल्ला यीसु ए आपरौ “प्रेरित” बौलुन्दौ। हौसौ प्रेरितहौरिए यीशु सी यात्राहौरी कौरुन्दौ आई यीशु का ज्ञान परापौत कौरून्दौ।