28. जवान साऊकार राजा

एक दयार, एक साऊकार जवान राजा ऐ यीशु गाछै आछी यीशु का पुछुन्दौ, “हे बौलौ गुरु, मोक्ष पामै ला हाऊ कि कौरु?” यीशु ए हौतिन ला बौलुन्दौ, “तू माना बौलौ क्यु बौलेन सै? ऐखौ एखै बौलौस आई हौसौ परमात्मा स। पौर आगर तू मोक्ष पामै चाएता तै परमात्मा रौ हुकुम रौ पालन कौर।”

“माना कुन स्या हुकुम रौ पालन कौरनौ रौ जरुरत स?” हौतिनै पुछुन्दौ। यीशु ए जवाब देऊन्दौ, “हत्या नौकौरै, व्यविचार नौकौरै, चौरी नौकौरै, जाली नाबाताये, आपरौ आमा बा रौ आदर कौरै, आई आपरौ पडोसी ला आपरौ गानै प्रेम कौरै।”

पौर हौसौ जवान मानुष ए बौलुन्दौ, “हाऊँ आपरौ बचपन का ऐ हौई सेब हुकुम हौर रौ पालन कौरेन सु। माना सौदा ए जीऊन्दौ थाकमै ला आई कि कौरनौ रौ जरुरत स?” यीशु ए हौतिन गाश दया कौरुन्दौ आई हौतिन सी प्रेम कौरुन्दौ।

यीशु ए जवाब दैऊन्दौ, “अगर तु सिध्द फिरमै चाएंता तै नाशी आपरौ सेब कुछ बिकिन आई हौसौ रुपया ला गरीब हौर कै बान्ट, आई ताऊला स्वर्ग कै धन पौरैस। तै आछिन्दै मुकपिछांए हान्ड।”

जि यिशु ए बौलुन्दौ आई जैतरै हौसौ जवान मानुष ए शुनुन्दौ होसौ वाल उदास फिरुन्दौ, क्यु बौलता हौसौ मानुष वाल साऊकार थैव आई हौसौ आपरौ सेब सम्पति दैमै ना चान्दौ थैव। हौसौ शुरुई यीशु गाछै का नाशुन्दौ।

तै यीशु ए आपरौ चेलाहौर ला बौलुन्दौ, “परमात्मा रौ राज्य कै साऊकार मानुषा रौ नशनौ वाल मुश्किल स! आं, एक साऊकार मानुष रौ परमात्मा रौ राज्य कै नाशनौ रौ तुलना कै ऊँट रौ स्यौन रौ आखी बाती निकली नाशनौ आसान स।

जि यीशु ऐ बौलुन्दौ चेलाहौर हौसौ सुनी वाले हैरान फिरुन्दै। हौतैनोरिए बौलुन्दौ, “आगर हौई हौयौ हुन्ता परमात्मा कासला बौचायैस?”

यीशु ऐ चेलाहौर गाश दृष्टि बैजी आई बौलुन्दौ, ‘मानुषा रौ आपरौ ऐ उदार कौरनौ असम्भव स। पौर परमात्मा ला असम्भव केछै नुन्दौ।“

पतरस ऐ यीशु ला बौलुन्दौ, “हामौरी 12 चेलाहौरी आपरौ सेब कुछ शौठाई ताऊ पीछांए आछी सी। तै हामौर रौ ईनाम की हौए स?”

यीशु ऐ जवाब दैऊन्दौ, “सेब मानुषा जुनै मैरौ बजाय आपरौ गौर, भाई, बहन, आंई-बा, छैल्डुपैरै आई आपरौ सम्पति ला शौठाइ स, हौतैन ला हौतिज का 100 गुना बौदी पौरैस आई अनन्त जीवन ला भी परापत कौरैसा। पौर बादै जुन पैलेका ऐ सा हौतैनै पिछांय फिरसा, आई बादै जुन पिछांए सा हौतैनै आंगमाए फिरसा।”