29. निर्दयी गुलाम रौ कौथा

एक दयार, पतरस ऐ यीशु का पुछुन्दौ, “हे स्वामी, माना मैरौ भाई ला कैतेग बैरै माफ कौरनौ चान्दौ जैतरै हौसौ मैरौ खिलाफ पाप कौरैस? कि सात बैरै सैग आ?” यीशु ऐ बौलुन्दौ, “सात बैरै नुआ, पौर सात रौ सत्तर बैरै सैग!” हौतिज रौ जरिया ऐ, यीशु रौ मतलब स कि तामोर ला सौदा क्षमा कौरनौ चान्दौ। तै यीशु ऐ हौई कौथा सुनायाऊन्दौ।

यीशु ऐ बौलुन्दौ, “परमात्मा रौ राज्य एक राजा रौ समान स जुन आपरौ गुलाम का हिसाब मांगनौ चान्दौ थैव।” हौतिन रौ एक गुलाम बादौ कर्जदार थैव।”

पौर हौसौ गुलाम आपरौ कौर्ज चुकायाई नौबौलुन्दौ, हौतिज रौ तैईए राजा ए बौलुन्दौ, “हौनरौ कौर्ज चुकायामै तैईए हौई मानुष ला आई हौनरौ पैरै ला गुलाम रौ रू कै बिकनौ।”

“हौसौ गुलाम ऐ राजा रौ मुंखुंमाए आपरौ जानौ गाश बैशी बौलुन्दौ, “औरछै माना आई ऊतुरी वक्त दै, आई हाऊ कौर्ज रौ सेब रुपया चुकायासु।” राजा ऐ हौतिन गाश रेहम खाऊन्दौ, आई हौतिज रौ तैईए राजा ऐ हौतिन रौ सेब कौर्ज माफ कौरुन्दौ आई नाशनौ बेजुन्दौ।

“पौर जैतरै हौसौ गुलाम राजा गाछै का बाए नाशी, तै हौतिन ला हौतिन रौ एक साथी गुलाम बैठयुन्दौ जुन हौतिन रौ चार मसारौ रौ मुजुरी रौ कर्जदार थैव। हौसौ गुलाम ऐ आपरौ साथी गुलाम ला पाऊन्दौ आई बौलुन्दौ, “ताऊगाश मैरौ जि बि कौर्ज स माना हौसौ चुकायाव।

“होसौ साथी गुलाम ऐ जानौ गाश बैशी बौलुन्दौ, “औरछै आई एकछिब्या पौख, आई हाऊ मैरौ सेब कौर्ज रौ रौकम चुकायासु” पौर हौररौ बजाए, हौसौ गुलाम ऐ आपरौ साथी गुलाम ला जेल कै बैजैन्दौ जैतरै सैग हौसौ हौतिन रौ कौर्ज नुचुकायाए स।”

“जि बि फिरी थैव हौतिज ला आईक्या गुलाम हौरी ऐ देखी आई हौतैनै बादौ परेशान फिरुन्दै। हौतैनै राजा गाछै नाशुन्दै आई हौतिन ला सेब कुछ बौलुन्दौ।

“राजा ऐ हौसौ गुलाम ला बैदी बौलुन्दौ, ‘हे दुष्ट गुलाम! मैईए तैरौ कर्ज ला हौतिज रौ तैईए माफ कौरी थैव क्यु बौलता तैइयें माना औरछै बौली थैव। ताऊंला भी हौयौए कौरनौ चान्दौ थयौ।’ राजा हौतैग रौशै थयौ कि हौतिनै हौतिन ला जेलखाना कै बैजुन्दौ जैतैरै सैग कि हौसौ आपरौ सेब कौर्ज चुकदा नौकौरै स।”

तै यीशु ए बौलुन्दौ, “मैरौ स्वर्ग कै विराजमान बा तोमौर माज का हर एक सी भी हौयौए कौरैस आगर तोमौरी आपरौ भाई ला आपरौ मौन ए क्षमा नौकरता।”