30. यीशु पाँच हजार मानुषा ला खाऊ खिलायान्दौ स

यीशु ए आपरौ खास चेलाहौर ला प्रचार कौरमै आई मानुषा ला ज्ञान देमै तैईए बादौ आईक-आईक देश कै बैजुन्दौ। जैतरै हौतैनै हौतिनचै का आछुन्दै जिनचै यीशु थैव तै हौतैनोरिए यीशु ला बौलुन्दौ कि हौतेनोरिए की कौरी थैव। तै यीशु हौतेन सी झील रौ आईक बिलै एक शान्त जागा कै नाशी एकसान आराम कौरमै ला बौलुन्दौ। तै हौतेनोरी एक किस्ती गाश बैशुन्दै आई झील रौ आईक बिलै नाशुन्दै।

पौर हौतिनचै बादौ हौयौ मानुषा थै जुनै यीशु आई चेलाहौरी ला कस्ती कै नाशनौ दैखी थैव। हौई मानुषा हौतैन का आंगमै झील रौ आईक बिलै नाशमै तैईए झील रौ कनारे-कनारे ठुरायुन्दै। तै जैतैरै यीशु सी आपरौ चेलाहौरी पौछुन्दै तै बादौ मानुषा रौ एक बौडौ समुह हौतैन ला पौखी हौतिनचै पैले का ऐ थै।

हौसौ भीड कै दैनी पैरै सी छैलडुपैरै रौ गिनती रौ बिना 5000 का बौदी पुषां पैरै थै। यीशु ऐ हौसौ मानुषा गाश बौडौ तरस खाऊन्दौ। यीशु रौ तैईए हौसौ मानुषा बिन पालैस रौ बैरैहौर रौ गान थै। हौतिज रौ तैईए यीशु ऐ हौतेन ला ज्ञान दैऊन्दौ आई हौतैन माज का जुन मानुषा बैजुई थै हौतैन ला चांगा कौरुन्दौ।

बयाल रि बैरै, चेलाहौरी ऐ यीशु ला बौलुन्दौ, “ऐ सानैन स आई औरू-पौरू कुनै नगर भी नाई। हौई मानुषा ला नाशनौ बैज ताकि हौनै नाशी दै की-की खासा।”

पौर यीशु ए चेलाहौर ला बौलुन्दौ, “तौमौरी हौनैला खामै ला की-की दयौ!” हौतैनोरिए जवाब दैऊन्दौ, “हामौरी हौयौ क्यौ कौरी बौलसी? हामौर कै ऐखौ पांच रौटी आई दुई लौऊडौ माछीहौरी स।”

यीशु ए आपरौ चेला हौर ला बौलुन्दौ कि हौसौ भीड रौ मानुषा ला खौर गास पचास-पचास रौ समूह कै बैशमै ला बौलौ।

तै यीशु ऐ पांच रौटी आई दुई माछी ला मांगी स्वर्ग बिलै शाऊन्दौ, आई हौसौ खाऊ रौ तैईए परमात्मा रौ धन्यवाद दैऊन्दौ।

तै यीशु ऐ रौटी सी माछीहौर रौ टुकडा हौर कै खान्याऊन्दौ। हौतिनै मानुषा ला दैमै ला आपरौ चेलाहौर ला हौसौ टुकडा हौरी दैऊन्दौ। चेलाहौर हौसो खाऊ ला बांटैन बांटैन, तै भी हौसौ नेछेक्युन्‍दौ।

हौचका पिछु, चेलाहौरी ए हौसौ खाऊ ला कौटठा कौरुन्दौ जुन नाखाईयुन्दौ थैव आई हौसौ 12 छाटो भौरी थैव! हौसौ सेब खाऊ हौसौ पांच रौटी सी दुई माछी का आछुन्दौ थैव।