31. यीशु रौ पानी गाश हांडनौ

पाँच हजार मानुषा ला खाऊ खिलायाई पिछु , यीशु ए आपरौ चेलाहौर ला किस्ती कै नाशमै ला बौलुन्दौ। हौतिनै हौतैन ला झील रौ आईक किनारा बिले नाशमै ला बौलुन्दौ पौर आई आपु ऊतूरी वक्त ला हौसौ हौतिनचै थाकुन्दौ। पौर चेलाहौरी नाशुन्दै आई यीशु ऐ भीड ला भी विदा कौरुन्दौ ताकि हौतैनै आपरौ घौरे नाशसा। हौतिज का पिछु, यीशु प्रार्थना कौरमै ला एक पर्वत गाश नाशुन्दौ। हौतिन्चे हौसौ एखैले थैव, आई हौतिनै बादौ राच सैग प्रार्थना कौरुन्दौ।

हौतरै, चेलाहौरी आपरौ किस्ती ए नाशेन थै, पौर बागुर हौतेन रौ बिलै बादौ जौरी ए आछेन थैव। बादौ राच फिरिन्दौ तै भी हौतैनै झील रौ बीच कै ए पौछी थै।

हौतरै यीशु ए प्रार्थना कौरनौ छैकुन्दौ आई आपरौ चेलाहौर गाछै वापस नाशनौ शुरू कौरुन्दौ। हौसौ किस्ती बिलै नाशमै ला पानी गाश हान्डैन थैव।

तै चेलाहौरिए हौतिन ला दैखुन्दौ आई हौतैनै बादौ डौरुन्दै कयु बौलता हौतैनोरिए सुनचुई थैव कि हौई ता कुन ता भुत स। यीशु जानदौ थयौ कि हौतैनै डौरी सा, हौतिज रौ तैइए हौतैनै हौतेन ला बैदीस बौलुन्दौ, “नौ डौरयौ, हौई हाऊ सु।”

तै पतरस ए यीशु ला बौलुन्दौ, “हे प्रभु, आगर हौई तु सै ता माना पानी गाश हान्डी ताऊगाछै आछनौ रौ आदेश दै।” यीशु ए पतरस ला बौलुन्दौ, “आ!”

पौर पतरस किस्ती का ऊतुरुन्दौ आई यीशु गाछै नाशमै ला पानी रौ सतह गाश हान्डनौ शुरु कौरुन्दौ। पौर ऊतुरी दूर नाशी हौतिनै आपरौ नजर यीशु गास का हटायाउन्दौ आई लेहर हौर ला शानौ आई तेज बागुर ला महसुस कौरनौ शुरू कौरुन्दौ।

तै पतरस डौरी आई डूबैन थयै। हौसौ जिंगयाई, “हे प्रभु, माना बौचाव!” यीशु ए हौतरै हाथ बढायाई हौतिन ला पाई। तै हौतिनै पतरस ला बौलुन्दौ, “तैरौ विश्वास वाल कामस! आपला सुरक्षित जागमै तैईए मुगाश विशवास क्यु नौकौरी?

तै यीशु सी पतरस किस्ती गाश नाशुन्दै, आई हौतरै बागुर बन्ध फिरुन्दौ। पानी शान्त फिरी। चेला हौर ए हैरान फिरी आपरौ जानौ गाश बैशी। हौतैनोरिए हौतिन रौ आरधना कौरी आई हौतिन ला बौलुन्दौ, “ दीमांग ऐ तु परमात्मा रौ छैल्डु सैस।”