32. यीशु दुष्टात्मा का ग्रस्त मानुष ला आई एक बीमार देन ला चांगा कौरदौस

एक दयार यीशु सी हौतिन रौ चेलाहौरी आपरौ किस्ती कै हौसौ जागा कै नाशुन्दै जिन्चै गिरासेनी रौ मानुषा थाकदै थै। हौतैनै हौसौ जागा कै पौछी किस्ती का ऊतुरुन्दै।

हौतिनचै एक मानुष थयौ जुन भूत आत्मा का ग्रस्त थयौ।

हौई मानुष हौतैग ताकत स्या थैव कि कुन भी हौतिन ला बौश कै कौरी नौबौलदै थै। एकुम्बैरै मानुषा ए हौतिन रौ हाथ सी खुंडी ला शांगलीहौरी ऐ बानुधौ, पौर हौसौ हौतिज ला चुटान्दौ थैव।

हौसौ मानुष हौसौ जागा कै कब्रिस्तान कै थकदौ थैव। हौई मानुष सारा राचा जिंगयाएन थाकदौ थैव। हौसौ गाछौ निबिदीन्दौ थैव आई सौदा ऐ आपला जान्टीहौरी ऐ बेहौश कौरदौ थैव।

हौसौ मानुष ठूरी यीशु गाछै आछुन्दौ आई हौतिन रौ सौमने जान्नु गास बैशुन्दौ। तै यीशु ए हौसौ मानुष रौ भीते रौ दुष्टात्मा ला बौलुन्दौ, “हौई मानुष का बाए निकिल आ!”

हौसौ दुष्टात्मा जौरै जिंगयाऊन्दी, “हे यीशु,परम प्रधान परमात्मा रौ पुत्र, तैरौ मुका की काम? औरछे माना नाचापराए!” तै यीशु ए हौसौ दुष्टात्मा ला पुछुन्दौ, “तैरौ नाव किस?” हौतिनै जवाब दैऊन्दौ, “मैरौ नाव सैना, क्यु बौलता हामौरी बादौ सी।” (रोमी सेना कै कई हजार सैना हौर रौ एक टोली एक “सेना” थाकदौ थयौ।)

हौसौ दुष्टात्माहौरिए यीशु का विनती कौरुन्दौ, “औरछै हामोर ला हौई जागा का बाए नैबजै!” हौतिनचै नैरै ए ढौंक गाश सुंगारहौर रौ एक टौलांग चारिएन थै। हौतिज रौ ताईंए हौसौ दुष्टात्मा हौरी ए यीशु का विनती कौरुन्दौ, “औरछै हामोर ला हौई सुंगारहौर कै भेज पौर सजा निदिए!” यीशु ए बौलुन्दौ, “ठीक स, हौतैन कै नाशौ!”

तै हौसौ दुष्टात्माहौरी ए हौसौ मानुषा का निकली हौसौ संगार हौर कै प्रवेश करुन्दौ। हौसौ सुंगारहौरी ठुरावी एक ऊजौ चोटि गाश का झील कै नाशुन्दै आई डूबी मौरुन्दै। हौसौ टौलांग कै लगभग 2000 सुंगार थै।

हौतिन्चै हौसौ सुंगारहौर रौ देखरेख कौरदै मानुषा थै। जिबि भी फिरी थयौ जैतरै हौतैनोरी ऐ दैखौ तै हौतैनै हौसौ नगर का नाशुन्दै। यीशु ऐ जिबि भी कौरी थयौ हौतिनचै हौतैनोरी ऐ सैब ला बौलुन्दौ। हौसौ नगर रौ मानुषा निकली आई हौसौ मानुष ला शाई जासकै दुष्टातमा हौर थैव। हौसौ शान्तिए, गाछौ लाऊई, आई एक सामान्य मानुष रौ गान बरताव कौरैन बैशी थैव।

हौसौ मानुषा बादौ डौरी थै आई हौतैनोरी ऐ यीशु ला नाशमै ला बौलुन्दौ। तै यीशु किस्ती गाश नाशुन्दौ। हौसौ मानुष जासकै दुष्टात्माहौरी थैव हौतिनै यीशु सी नाशमै ला विनती कौरुन्दौ।

पौर यीशु ए बोलुन्दौ, “ ना। हाँऊ चाएन सु कि तु गौरे नाशी सेब ला बौल कि परमात्माए तैरौ तैईए कि कौरी स। हौतैन ला बौल कि क्यौ परमात्मा ऐ ताऊंगाश दया कौरी थैव।“

तै हौसौ मानुष नाशुन्दौ आई सेब ला हौजरौ बारै कै बौलुन्दौ जि यीशु ए हौतैन रौ तैईंए कौरी थैव।

यीशु झील रौ आईक बिलै आछुन्दौ। हौतिन रौ हौतिनचै पौछी पिछु, एक भारी भीड हौतिन रौ आसपास कौटठा फिरून्दै आई हौतिन ला दबायाएन थै। हौसौ भीड कै एक देन मानुष थी जासला 12 बौरौश का खून निकिलनौ रौ बयाज थैव। हौतैसै आपरौ सेब दौलत डाक्टरहौर ला दैऊन्दौ ताकि हौतैनै हौतैस ला चांगा जुरयाई बौलेसा,पौर हौतैस रौ बयाज आई भी बौडवी थैव।

हौतैसै शुनी थैव कि यीशु ऐ बादौ बैज्युन्दै मानुषाहौर ला चांगा कौरुन्दौ थैव आई हौतैसै सुनचुई, “माना हौई विशवास स कि अगर हाऊं ऐखौ यीशु रौ गाछौ ला छुंगता, तैभी हाऊं बौली फिरसु!” हौतिज रौ तैईंए हौसौ यीशु पिछांए आछुन्दी आई हौतेसै यीशु रौ गाछौ ला छुंगुन्दौ। ज्यौ ऐ हौतैसै यीशु ला छुंगुन्दौ, खून बौयानौ बयाज बौन्ध फिरुन्दौ।

हौतरै, यीशु ए जानी कि मुका शक्ति निकलिस। हौतिज रौ तैईंए हौतिनै पिछांए शुरुई पुछुन्दौ, “माना कुनै छुंगौ?” चेलाहौरी ए जवाब देऊन्दौ, “इनचै हौतैग सैब मानुषा ए तैरौ खुंडी बीलै भीड बैजिस,आई ताऊला टैमाएनस। तै तैईयैं कयु पुछौ कि माना कुनिए छुंगीस।

तै हौसौ दैन मानुष यीशु रौ सौमने थौरथौराएन पौ आई बादौ डौरेन पौ आपरौ जानो गाश बैशुन्दी। तै हौतैसै हौतिन ला बौलुन्दौ की हौतैसै कि कौरुन्दौस, आई हौई भी कि हौसौ ठीक फिरी। यीशु ए हौतैस ला बौलुन्दौ , “तैरौ विश्वास ए ताऊला चंगा कौरिस। शान्ति ऐ नाश।”