33. एक किसान रौ कौथा

एक दयार, यीशु झील रौ कनारे थयौ। हौसौ मानुषहौर रौ एक बादौ बौडौ भीड ला ज्ञान दैन थयौ। हौतिन ला शुनमै ला हौतैग बादौ मानुषा आछी कि यीशु कै हौतैन सी बाताईमै तैईंए जागा ए नौबौचुन्दौ। हौतिज रौ तैईंए हौसौ पानी कै खड़ा किस्ती गास नाशुन्दौ। हौतिनचै हौसौ बैशुन्दौ आई मानुषा ला ज्ञान दैऊन्दौ।

यीशु ऐ हौतैन ला हौई कौथा शुनायाऊन्दौ, “एक किसान बिऊ बौमै तैईंए बाए निकलुन्दौ। जैतरै हौसौ हाथै बिऊ हौर ला बैजैन थै तै एक्या बिऊ बातकै शौरून्दौ। पौर पंछीहौरी ऐ आछी हौसौ सेब बिऊ हौर ला खाई बैजुन्दौ।”

“आईक्या बिऊ शाकरै स्या माटी गाश शौरुन्दौ जिन्चै माटी कताई गाटो थैव। शाकरै स्या माटी गाश शौरुन्दौ बिऊ वाल हासाल ए राजुन्दौ, पौर हौतैन रौ जीलहौरी माटी रौ गैराई कै नाशमै सक्षम नैथै। ज्यौ दीयुस निकलौ आई झाव फिरौ तै हौसौ पौधाहौरी शुकी मौरुन्दै।”

“आई आईक्या बिऊ जाखरा माज शौरुन्दै। हौसौ बिऊहौरी ऐ बौरजनौ शुरु कौरुन्दौ, पौर काँड़ौहौरी ऐ हौतिज ला टैमाऊन्दौ। तै हौतिज रौ तैईंए जाखरा कै शौरुन्दौ बीऊ का निकलुन्दौ पौधा माज का एक कै भी फौसौल नालागुन्दौ।

“आईक्या बिऊ बौलौ माटी गाश शौरुन्दौ। हौसौ बिऊ बौरजुन्दौ आई जैतैग बिऊ बौई थैव हौतिज माज का एक्या ए 30, 60 आई हौनचे सैग कि एक्या ए 100 गुणा फौसल पैदा कौरुन्दौ। जुन भी परमात्मा रौ पिछांए हांडनौ चाएनस, हौसौ हौई बातै गाश ध्यान दैईयौ जि हाऊँ बौलेन सु!”

हौई कौथा ऐ चेलाहौर ला उलझन कै बैजुन्दौ। तै हौतिज रौ तैईए यीशु ए बौलुन्दौ, “हौसौ बिऊ परमात्मा रौ वचन स। हौसौ बात एक हौयौ मानुष स जुन परमात्मा रौ वचन ता शुनदौस, पौर हौतिज ला नौसौमजिन्दौ स। तै शैतान हौतिन गाछै का वचन चोरी निदौस। मतलब शैतान हौतिन ला वचन सौमझिनौ का दूर जागदौस।

हौसौ शाकरै स्या माटी हौयौ मानुष स जुन परमात्मा रौ वचन ला शुनदौस आई खुशीए हौतिज ला स्वीकार कौरदौ स। पौर कठिन वक्त आछदौ स, या जैतरै औरिक्या मानुषा हौतिन ला सतायान्दै स, तै हौसौ परमात्मा का दूर नाशदौ स। मतलब हौसौ परमात्मा गाश विश्वास कौरनौ शौठयान्दौ स।”

“हौसौ काँडौ स्या माटी हौयौ मानुष स जुन परमात्मा रौ वचन ला शुनदौस। पौर हौसौ बादौ बातै हौर रौ बारै कै फिकर कौरनौ शुरू कौरदौ स, आई हौसौ बादौ धन कमायानौ रौ कोशिश कौरदौ स, आई हौसौ बादौ चीज हौर ला पायानौ रौ कोशिश कौरदौ स। एक्छिब्या पिछु, ऐ हौसौ परमात्मा ला प्रेम कौरमै ला सक्षम नाईं। तै हौतिज रौ तैईंए जि हौतिनै परमात्मा रौ वचन का शिखुई थैव हौसौ हौतिन ला परमात्मा ला खुश कौरमै सक्षम नौकौरदौ स। हौसौ गेऊँ रौ डालहौर रौ समान स जुन कैछै फसल पैदा नौकौरदौ स।”

“पौर बौलौ माटी हौसौ मानुष स जुन परमात्मा रौ वचन ला शुनदौस, हौतिज गाश विश्वास कौरदौस, आई फौसल पैदा कौरदौस।”