36. यीशु रौ रु बौदल्यानौ

एक दयार, यीशु ऐ आपरौ त्रौन चेला हौरी, पतरस, याकूब आई यूहन्ना ला आपसी साथ निऊन्दौ। (हौई यूहन्ना नाव रौ चेला हौसौए मानुष नुवां जुनै यीशु ला बपतिस्मा दैई थयौ।) हौतैनै प्रार्थना कौरमै ला एक ऊशटौ पौर्बत गाश नाशुन्दै।

जैतरै यीशु प्रार्थना कौरैन थयौ तै हौतिन रौ मुह दयुस सि बराबौर प्यांशौ फिरुन्दौ। हौतिन रौ गाछौ प्यांशौ सि बराबौर शुकलौ फिरुन्दौ, जैव पृथ्वी गाश कुन कौरी बौलैस हौतिज का बि बौदी शुकलौ।

तै मूसा सि एलिय्याह भविष्य जान्दै स्या प्रकट फिरुन्दै। हौई मानुषा हौई धरती गाश इमबरी का बादौ रा बौरौश पहलै थाकदै थै। हौतैनोरिए यीशु सि हौतिन रौ मौत रौ बारे कै बातै बातावी, क्यु बौलता हौसौ हासाल ऐ यरुशलेम कै मौरैस।

जैतरै मूसा सि एलिय्याह यीशु सि बातै बाताएन थै तै पतरस ऐ यीशु ला बौलुन्दौ, “तामोर ला इन्चै हुनौ बौलौस। तामोरी त्रौन मंडप हौरी ला जुरयाऊगै, एक तांऊला, एक मूसा ला, आई एक एलिय्याह ला।” पौर पतरस नाजान्दौ थयौ कि हौसौ की खौटैन स।

जैतरै पतरस बातै बाताएन थयौ, तै एक चमकदार झुं तोल आछी हौतैन गाश छायायुन्दौ। फिरी हौतैनोरिए झुं का एक काद आछनौ शुनुन्दौ। हौतिनै बौलुन्दौ, “हौई मैरौ छैल्डु स जासका हांऊ बैधान कौरदौ सु। हांऊ हौतिन का खुश सु। हौतिन रौ शुनौ।” हौसौ त्रौने चेला हौरी डौरुन्दै आई धरती गाश लेटायुन्दै।

तै यीशु ऐ हौतैन ला छुंगुन्दौ आई बौलुन्दौ, “नौडौरयौ। ऊज्यौ।” जैतरै हौतैनोरिए चारे बिलै शाव, तै जुन बि हौतिनचै थयौ हौसौ ऐखो यीशु थयौ।

यीशु सि हौसौ त्रौने चेला हौरी हौसौ पहाड का वापिस तोल आछुन्दै। तै यीशु ऐ हौतैन ला बौलुन्दौ। “ईमबरी जि इन्चै फिरुन्दौ हौतिज रौ बातै कास ला ऐ नौबौल्यौ। हांऊ हासाल ऐ मौरसु आई फिरी जिऊन्दौ फिरसु। हौतिज पिछु, तोमोरी मानुषा ला बौली बौलसौ।”