37. यीशु लाजर ला मौरुन्दै हौर माज का जिऊन्दौ कौरदौस।

लाजर नाव रौ एक मानुष थयौ। हौतिन रौ दुई बौएना थै हौतैन रौ नाव मरियम सि मार्था थयौ। हौतैनै सेब यीशु रै निछौल कौन्या थै। एक दयार, कुनै ता यीशु ला बौलुन्दौ कि लाजर बादौ दुखी थयौ। जैतरै यीशु ऐ हौई शुनौ तै हौतिनै बौलुन्दौ, “हौई ब्याज लाजर रौ मौत सि खत्म निफीरा। हौजरौ बजाए, हौई मानुषा ला परमात्मा रौ आदर कौरमै तैईए प्रेरित कौरैस।”

यीशु आपरौ कौन्या सि प्रेम कौरदौ थयौ, पौर जिन्चै होसौ थयौ हौतिनचै हौतिनै दुई दयार सेग पौखुन्दौ। हौसौ दुई दयार पिछु, हौतिनै आपरौ चेला हौर ला बौलुन्दौ, “आच्छौ, वापिस यहूदिया प्रदेश नाशुंगै।” चेला हौरिए जवाब दैऊन्दौ, “पौर हे गुरु, ईम्बरी एकछिब्या पहलै हौतिनचै रै मानुषा तांऊला मारी बैजनौ चाएन थै!” यीशु ऐ बौलुन्दौ, “तामोर रौ कौनैस लाजर सुतीन्दै स, आई हांऊ हौतिन ला ऊज्यामै सु।”

यीशु रौ चेला हौरीए जवाब दैऊन्दौ, “हे प्रभु, आगर लाजर सुतैन स, तै हौसौ ठीक फिरैस।” तै यीशु ऐ हौतैन ला साफ बौलुन्दौ, “लाजर मौरुन्दौ स। हांऊ खुसी ऐ सु कि हांऊ हौतिनचै नैथैव, ताकि तोमोरी मु गाश विश्वास कौरी बौलसौ।”

जैतरै यीशु लाजर रौ दैशी कै पोछौ तै लाजर ला मौरी पहले का ऐ चार दयार फिरी थयौ। मार्था यीशु ला बैठिमै ला बाए आछुन्दी आई बौलुन्दौ, “हे प्रभु, आगर तू ईन्चै हुन्दौ ता मैरौ बाई नौमौरदौ थयौ। पौर हांऊ विश्वास कौरदी सु कि जि बि तू परमात्मा का मांगसै हौसौ तांऊला दैस।”

यीशु ऐ जवाब दैऊन्दौ, “पुनरुत्थान सि जिन्दगी हांऊ सु। जुन बि मु गाश विश्वास कौरदौस आगर हौसौ मौरता बि तै बि ज्युवैस। जुन बि मु गाश विश्वास कौरदौस हौसौ कादुई नौमौरदौ। कि तू हौज गाश विश्वास कौरदी सैहा?” मार्था ऐ जवाब दैऊन्दौ, “हे प्रभु, आं हांऊ तांऊगाश विश्वास कौरदी सु कि तू परमात्मा रौ छैल्डु मसीह सै।”

तै मरियम आछुन्दी। हौतैसै यीशु रौ चरण कै नाशी बौलुन्दौ, “हे प्रभु, आगर तू ईन्चै हुन्दौ ता मैरौ बाई नौमौरदौ थयौ।” यीशु ऐ हौतैस ला पुछून्दौ, “तोमोरिए लाजर ला किन्चै जागुन्दौ स?” हौतैनोरिए हौतिन ला बौलुन्दौ, “कब्र कै। आ आई शाव।” तै यीशु रौएन थयौ।

हौसौ कब्र थयौ जिल्ला जान्टी ला कोति एक गुफा जुरयाई थयौ जिजरौ दवार गाश एक जान्टी ला जागुन्दौ थयौ। जैतरै यीशु कब्र गाछै पोछौ तै हौतिनै हौतैन ला बौलुन्दौ, “जान्टी ला हटायाव।” पौर मार्था ऐ बौलुन्दौ, “हौनला मौरिन्दै चार दयार फिरिन्दैस। हौजका मारे गान्द आछैस।”

यीशु ऐ मार्था ला जवाब दैऊन्दौ, “कि मैईऐ तोमोर ला नौबौली थयौवा कि आगर तोमोरी मु गाश विश्वास कौरसौ तै परमात्मा रौ शक्ति ला दैखसौ?” हौतिर रौ तैईए हौतैनोरिए जान्टी ला हटायाऊन्दौ।

तै यीशु ऐ आगाश स्वर्ग बिलै शाई बौलुन्दौ, “हे पिता, मैरौ शुनमै तैईए हांऊ तैरौ धन्यवाद कौरसु। हांऊ जान्दौ सु कि तू सौदा मैरौ शुन्दौ सै, पौर मैईऐ हौई ईन्चै ऊजौ हौई सेब मानुषा रौ मौदद कौरमै तैईऐ बौलुन्दौ ताकि हौनोरी विश्वास कौरसा कि तैईऐ माना बैजुन्दौ स।” तै यीशु ऐ बेदुन्दौ, “हे लाजर, बाए निकिल!”

तै लाजर बाए आछुन्दौ! हौसौ ईम्बरी बि कफन कै बाटल्यावी थयौ। यीशु ऐ हौतैन ला बौलुन्दौ, “हौई कफन ला गारमै ला हौतिन रौ मौदद कौरौ आई हौतिन ला आजाद कौरौ।” हौई चमत्कार रौ कारण ऐ बादौ यहूदी हौरिऐ यीशु गाश विश्वास कौरुन्दौ।

पौर यहूदी हौर रौ धार्मिक अगुवा हौरी यीशु का ईर्ष्या कौरैन थै, हौतिर रौ तैईए हौतैनै योजना जुरयामै तैईए एक सात कौठा फिरुन्दै कि कैव यीशु सि लाजर ला मारी बैजुगै।