38. यीशु ला पानौ बैजदै।

सौदा बौरौश, यहूदी हौरी फसह रौ तिवार मौन्यान्दै थै। हौई हौजरौ बारे कै एक तिवार थयौ कि बादौ रा बौरौश पहलै परमात्मा ऐ हौतैन रौ पूर्वज हौर ला मिस्र रौ गुलामी का छुडायाऊन्दौ थयौ। लगभग त्रौन बौरौश पिछु यीशु ऐ सेबे मानुषा ला प्रचार कौरनौ आई शिक्षा दैन्नौ शुरु कौरुन्दौ। यीशु ऐ आपरौ चेला हौर ला बौलुन्दौ कि हौसौ हौतैन सि यरुशलेम फसह रौ तिवार ला मौन्यानौ चाएन स, आई हौई बि कि हौतिन ला हौतिनचै मारी बैजसा।

यीशु रौ चेला हौर माज एक यहूदा नाव रौ मानुष थयौ। यहूदा प्रेरित हौर रौ रुपया रौ थैली जागदौ स्या प्रभारी थयौ, पौर सौदा यहूदा हौसौ थैली का रुपया गारदौ थयौ। यीशु सि चेला हौरी यरुशलेम पोछी पिछु यहूदा यहूदी नेता हौर गाछै नाशुन्दौ। हौतिनै रुपया रौ बौदला कै हौतैनै ला यीशु ला पामै ला प्रस्ताव जागुन्दौ। हौसौ जान्दौ थयौ कि यहूदी नेता हौरी नौमौन्यान्दै थै कि यीशु ऐ मसीह थयौ। हौसौ जान्दौ थयौ कि हौतैनै यीशु ला मारी बैजनौ चाएन थै।

महायाजक रौ बौलनौ गाश यहूदी नेता हौरिए यीशु ला हौतैन रौ जरिया ऐ पामै तैईए यहूदा ला बिशौ दौश चाँदी रौ सिक्का दैऊन्दौ। हौई हौत्यौए फिरुन्दौ जैव कि भविष्य जान्दौ स्या ऐ बौली थयौ कि फिरैस। यहुदा मौन्याऊन्दौ आई रुपया गिनुई नाशुन्दौ। हौसौ यीशु ला पानौ कै हौतैन रौ मौदद कौरमै तैईए मोका रौ तलाश कौरैन थयौ।

यरुशलेम कै, यीशु ऐ आपरौ चेला हौर सि फसह रौ तिवार मौन्याऊन्दौ। फसह रौ भोज रि बैरै, यीशु ऐ रौटी ला हाथ कै चुन्गी आई आशीष मागी खानयाऊन्दौ। हौतिनै बौलुन्दौ, “हौई पाव आई खाव। हौई मैरौ डे स जि हांऊ तोमोर ला दैन सु। हौजला मैरौ याद कै कौरयो।” तै हौयौए, यीशु ऐ बौलुन्दौ कि हौसौ हौतैन रौ तैईए मौरैस, मौतलब हौतैन रौ तैईए हौसौ आपरौ डे ला बलि चढायाएस।

तै यीशु ऐ एक दाखरस रौ गलास मांगुन्दौ आई बौलुन्दौ, “हौजला जुटौ। हौई नौऊवो समझौता रौ मैरौ खून स जि कि हांऊ ऊटयासु ताकि परमात्मा तोमोर रौ पाप हौर ला माफ कौरैस। हर बैरै हौजला जुटदी बैरै मैरौ याद कै हौजला कौरौ जि हांऊ ईम्बरी कौरैन सु।”

तै यीशु ऐ आपरौ चेला हौर ला बौलुन्दौ, “तोमोरी माज का एक मानुष माना पानौ भैजैस।” चेला हौरी हैरान फिरुन्दै, आई पुछैन थै कि कुन हौयौ काम खौटैस। यीशु ऐ बौलुन्दौ, “माना पानौ भैजदौ स्या मानुष हौसौ स जासला हांऊ हौई रौटी रौ टुकडा दिसु।” तै हौतिनै हौसौ रौटी यहूदा इस्करियोती ला दैऊन्दौ।

हौसौ रौटी ला पाई पिछु, यहूदा कै शैतान बौसुन्दौ। यहूदा निकलीन्दै यीशु ला पामै तैईए यहूदी नेता हौर रौ मौदद कौरमै ला नाशुन्दौ। हौई राच रौ बेला थयौ।

खाऊ खाई पिछु, यीशु सि हौतिन रौ चेला हौरी जैतून पौर्बत बिलै नाशुन्दै। यीशु ऐ बौलुन्दौ, “तोमोरी सेबे आज राच माना शौठयासौ। कयु बौलता हौई प्रवित्रशास्त्र कै लिखुन्दौस, “हांऊ पालैस ला लौससु आई सेब बैरै हौरी ठुराईसा।”

पतरस ऐ जवाब दैऊन्दौ, “बेशक बाकी सेब तांऊला शौठयासा, हांऊ नौशौठयांऊ!” तै यीशु ऐ पतरस ला बौलुन्दौ, “शैतान तोमोरी सेब ला निनौ चाएन स, पौर हे पतरस, मैईए तैरौ तैईए प्रार्थना कौरुन्दौ स कि तैरौ विश्वास खत्म निफिरनौ चान्दौ। तै बि, आज रौ राच, कुखरी बाशनौ का पहलै तू त्रौन बैरै इंकार कौरसै कि तू माना जान्मै नाजान्दौ सै।”

पतरस ऐ तै यीशु ला बौलुन्दौ, “बेशक हांऊ मौरसु, हांऊ कादुई तांऊना इंकार नौकौरुं!” बाकी सेब चेला हौरिऐ बि हौईऐ बौलुन्दौ।

तै यीशु आपरौ चेला हौरी सि गतसमनी नाव रौ जागा कै नाशुन्दौ। यीशु ऐ आपरौ चेला हौर ला प्रार्थना कौरमै ला बौलुन्दौ ताकि शैतान हौतैन रौ परिक्षा नौ कौरा। तै यीशु आपु प्रार्थना कौरमै ला नाशुन्दौ।

यीशु ऐ त्रौन बैरै प्रार्थना कौरुन्दौ, “हे मैरौ बा, आगर जुरैता मेहर कौरी हौई दुख रौ प्याला पीमैला निदिए। पौर आगर मानुषा रौ पाप माफ कौरमै तैईए कुन आईक बात नाई, तै तैरौ ऐ इच्छा पुरा फिरनौ चान्दौ।” यीशु बादौ परेशान थयौ आई हौतिन रौ दुसती खून रौ बूँद रौ बराबर धरती गास चुरैन थयौ। हौतिन ला सामर्थ दैमै तैईए परमात्मा ऐ एक स्वर्गदूत ला बैजुन्दौ।

हर बैरै प्रार्थना कौरी पिछु, यीशु आपरौ चेला हौर गाछै वापिस आछुन्दौ, पौर हौतैनै सुतिन्दै थै। जैतरै यीशु त्रौन बैरै वापिस आछुन्दौ तै यीशु ऐ बौलुन्दौ, “ऊज्यौ! माना पान्दै स्या इन्चै आछीसा।”

यहूदी अगुवाहौरी, सैनाहौरी, आई एक भारी भीड सी यहुदा आछुन्दौ। हौतैनोरी डांगरौ हौरी आई बैरगा हौर सि थै। यहूदा ऐ यीशु गाछै आच्छी हौतिन ला बौलुन्दौ, “हे गुरु, नमस्कार,” आई हौतिन ला फापु दैऊन्दौ। हौतिनै पाकरयानौ मानुष ला यहूदी अगुवा हौर ला दैखामै तैईऐ हौयौ कौरी थयौ। तै यीशु ऐ बौलुन्दौ, “हे यहूदा, कि तू कयारौ पाई माना पाकरयान सैहा?”

जैतरै हौसौ सैना हौरी यीशु ला पाएन थै, तै पतरस ऐ आपरौ डांगरौ गारुन्दौ आई महायाजक रौ एक सेवक रौ कान काटुन्दौ। यीशु ऐ बौलुन्दौ, “डांगरौ ला दूर कौर! हांऊ आपरौ बा का माना बौचामै तैईऐ स्वर्गदूत हौर रौ एक सैना रौ तैईऐ प्रार्थना कौरी बौलदौ। पौर हांऊ आपरौ बा रौ बातै मौन्यामै सु।” तै यीशु ऐ हौसौ मानुष रौ कान ला ठीक कौरुन्दौ। तै सेब चेला हौरी ठुरुन्दै।