39. यीशु गाश बौडौ सभा कै मुकदमा चौलदौ स।

ऐ हौई आदौ राच रौ बेला थयौ। हौसौ सैना हौरिऐ यीशु ला महायाजक रौ घौरै आनुदौ, क्यु बौलता हौसौ यीशु का सवाल कौरनौ चाएन थयौ। पतरस दूर का हौतैन रौ पिच्छा कौरैन थयौ। जैतरै सैना हौरिऐ यीशु ला घौरै आनुदौ, तै पतरस बाए रुकुई आपु आग ताईएन थयौ।

घौर बितै, यहूदी नेता हौरिऐ यीशु गाश पेशी चालाऊन्दौ। हौतैनै यीशु रौ खिलाफ जाली बातै हौर ला बौलमै तैईऐ बादौ जाली गवाह हौरी ला गिनुई आछुन्दै। बल्कि, हौतैन रौ बातै एक आईक का सहमत नाई थै, हौतिर रौ तैईऐ यहूदी नेता हौरी हौई साबित कौरी नौबौलुन्दै कि हौसौ कुने बातै रौ दोषी थयौ। यीशु ऐ केछे नौबौलुन्दौ।

पिछांए का, महायाजक ऐ सीधा यीशु बिलै शाई बौलुन्दौ, “हामोर ला बौल कि की तू ऐ जिऊन्दौ परमात्मा रौ छैल्डु मसीह सै?”

यीशु ऐ बौलुन्दौ, “आं हांऊ सु, आई तोमोरी माना परमात्मा सि बैशी आई स्वर्ग का आछैन बि दैखसौ।” महायाजक ऐ आपरौ गाच्छौ चिरुन्दौ क्यु बौलता जि यीशु ऐ बौलुन्दौ महायाजक हौसौ बातै गाश वाल रोशै थयौ। हौसो आईक अगुवा हौर गाश टोखाऊन्दौ, “हामोर ला हौई बौलमै तैईऐ कुन आईक गवाह रौ जरुरत नाई कि हौई मानुष ऐ की खौटी स! तोमोरिए आपुए हौतिन ला हौई बौलनौ शुनी स कि हौसौ परमात्मा रौ छैल्डु स। हौतिन रौ बारै कै तोमोर रौ कि फैसला स?”

सेब यहूदी अगुवा हौरीऐ महायाजक ला जवाब दैऊन्दौ, “हौसौ मौरनौ रौ लायक स!” तै हौतैनोरिऐ यीशु रौ आँखी हौर गाश पाटी बानुन्दौ, हौतिन गाश थूकून्दौ, हौतिन ला लौसुन्दौ, आई हौतिन रौ मजाक ऊडायाऊन्दौ।

आई पतरस, जैतरै हौसौ घौरै का बाए पौखी थयौ। तै एक दासी देन ऐ हौतिन ला दैखी। हौतैसै हौतिन ला बौलुन्दौ, “तू बि यीशु सि थयौवा!” पतरस ऐ मना कौरुन्दौ। पिछांए का, एक आईक देन ऐ हौईऐ बातै ला बौलुन्दौ, आई पतरस ऐ फिरी मना कौरुन्दौ। आखिर कै , एक्या मानुषा ऐ बौलुन्दौ, “हामोरी जान्दै सि कि तू यीशु सि थयौ क्यु बौलता तुमदुई गलील रै सौ।”

तै पतरस ऐ बौलुन्दौ, “आगर हांऊ हौई मानुष ला जान्दौ सु तै परमात्मा माना श्राप दैन्नौ चान्दौ!” हौतरे पतरस रौ हौयौ शपथ खाई पिछु, हौतरै पोशौ कुखरी बाशुन्दौ। यीशु ऐ पिछांए शुरुई परतस ला शाऊन्दौ।

पतरस हौतिनचै का ठुरुन्दौ आई वाल रुनुन्दौ। हौतरै, यीशु ला पानौ बैजदौ स्या यहूदा ऐ शाव कि यहूदी नेता हौरी ऐ यीशु ला मृत्युदंड दैऊन्दौ स। यहूदा बादौ दु:खी फिरुन्दौ आई नाशीन्दै आप ला मारी बैजुन्दौ।

ऐ हौसौ देश रौ राज्यपाल पिलातुस थयौ। हौसौ रोम रौ तैईए काम खौटदौ थयौ। यहूदी अगुवा हौरी यीशु ला हौतिन गाछै गिनुई आछुन्दै। हौतैनै पिलातुस यीशु ला मृत्युदंड दैई हौतिन ला मारी बैजता चाएन थै। तै पिलातुस ऐ यीशु ला पूछून्दौ, “कि तू यहूदी हौर रौ राजा सैहा?”

यीशु ऐ जवाब दैऊन्दौ, “तैईऐ सौचौए बौलुन्दौ स। पौर मैरौ राज्य ईन्चै पृथ्वी रौ नाही। आगर हुन्दौ ता मैरौ दास हौरी मैरौ तैईए युध्द कौरदै थै। हांऊ पृथ्वी गाश परमात्मा रौ बारे कै हकीकत बौलमै तैईऐ आछी सु। हर एक मानुष जुन हकीकत का बैदान कौरदौ स हौसौ मैरौ शुनदौ स।” पिलातुस ऐ बौलुन्दौ, “तै हकीकत कि स?”

यीशु सि बातावी पिछु, पिलातुस ऐ बाए भीड गाछै नाशी बौलुन्दौ, “हांऊ हौयौ केछे कारण नापायान्दौ कि हौई मानुष मारी बैजनौ लायक हौएस।” पौर यहूदी नेता हौरीऐ आई भीड ऐ जिंगाई बौलुन्दौ, “हौनला क्रूस गाश चढायाव!” पिलातुस ऐ जवाब दैऊन्दौ, “हौई केछे गलत कौरनौ रौ दोषी नाही।” पौर हौतैनै आई बि जोरै जिंगाएन थै। तै पिलातुस ऐ त्रौन बैरै बौलुन्दौ, “हौई दोषी नाही!”

पिलातुस डौरुन्दौ कि हौसौ भीड दंगा शुरु कौरैस, हौतिर रौ तैईऐ हौसौ आपरौ सैना हौर रौ जरिया ऐ यीशु ला क्रूस गाश चढायामै तैईऐ मौन्याऊन्दौ। रोमी सैना हौरिऐ यीशु ला कोडे ल्याऊन्दौ, आई हौतिन ला राजसी गाछौ लायाऊन्दौ, आई हौतिन रौ मुटकांग गाश काँडौ ऐ जुरयाऊन्दौ मुकुट जागुन्दौ। तै हौतैनै हौई बौलीन्दै हौतिन रौ मजाक उडायाएन थै, “शाव, यहूदी हौर रौ राजा!”