43. कलीसिया रौ शुरुआत फिरदौ स!

यीशु रौ स्वर्ग वापिस नाशी पिछु, चेलाहौरी यरुशलेम कै ऐ रुक्युन्दै जैव कि यीशु ऐ हौतैन ला कौरमै ला हुकुम दैऊन्दौ थयौ। हौतिनचै रै विश्वासी मानुषा लगातार कौठा प्रार्थना कौरमै तैईऐ कौठा फिरैन थाकदै थै।

हर बौरौश, फसह रौ तिवार का 50 दयारौ पिछु, यहूदी मानुषा पिन्तेकुस्त नाव रौ एक महत्वपूर्ण दयारौ ला मौनायान्दै थै। पिन्तेकुस्त हौसौ बेला थयौ जैतरै यहूदी मानुषा गेहूँ रौ कटाई ला मौन्यान्दै थै। पुरा संसार का यहूदी मानुषा पिन्तेकुस्त रौ दयारौ ला कौठा मौनायामै तैईऐ यरुशलेम कै आछी थै। हौतादु बौरौश, पिन्तेकुस्त मौन्यानौ रौ बेला यीशु रौ स्वर्ग कै नाशनौ का लगभग एक सप्ताह का पिछु आछी थयौ।

जैतरै सेब विश्वासी मानुषा एक साथ कौठा थै, तै जुन घौरै हौतैनै थै अचानक ऐ हौसौ तेज बागुर रौ काद ऐ भौरयुन्दौ। तै आग रौ लपटहौर रौ जैव दैखनौ स्या किता सेब विश्वासी हौर रौ मुटकांग हौर गाश प्रकट फिरुन्दौ। हौतैनै सेब गाश पवित्र आत्मा आछुन्दौ आई हौतैनोरिऐ आईक भाषाहौर कै परमात्मा रौ स्तुति कौरुन्दौ। हौई हौसौ भाषाहौरी थयौ जिल्ला बौलमै तैईऐ हौतैनोरी ला पवित्र आत्मा ऐ सक्षम कौरुन्दौ थयौ।

जैतरै यरुशलेम कै थाकदै स्या मानुषा ऐ हौसौ काद ला शुनुन्दौ, तै हौतैनै भीड रौ रु कै हौई शामै तैईऐ कौठा आछुन्दै कि की फिरैन थयौ। हौतैनोरिऐ विश्वासीहौर ला परमात्मा ऐ कौरुन्दौ बौडौ-बौडौ कामहौर रौ घोषणा कौरनौ शुनुन्दौ। हौतैनै हैरान थै क्यु बौलता हौतैनै हौसौ कामहौर ला आपरौ ऐ भाषाहौर कै शुनैन थै।

हौतैन माज का एक्या मानषा ऐ बौलुन्दौ कि हौसौ चेलाहौरी नशा कै थै। पौर पतरस ऊजौ फिरुन्दौ आई हौतैन ला बौलुन्दौ, “मैरौ बातै शुनौ! हौई मानुषा नशा कै नुंवा! हौजरौ बजाए, जि तोमोरी शाएन सौ हौसौ हौसौए स जुन योएल भविष्यजान्दौ स्या ऐ बौलुन्दौ थयौ कि फिरैस: परमात्मा ऐ बौलुन्दौ, ‘आखिर रौ दयारौ कै, हांऊ आपरौ आत्मा तौमौर गाश बैजसु।’”

“हे इस्राएली मानुषा, यीशु एक हौयौ मानुष थयौ जुनै हौई दैखामै तैईऐ कि हौसौ कुन थयौ बादौ अनोखा काम कौरी थयौ। हौतिनै परमात्मा रौ सामर्थ ऐ बादौ अदभुत कामहौरी ला कौरी थयौ। तोमोरी हौई जान्दै सौ, क्यु बौलता तोमोरी ऐ हौई कामहौर ला दैखी स। पौर तोमोरी ऐ हौतिन ला क्रूस गाश चढायाऊन्दौ!”

“यीशु मौरुन्दौ पौर परमात्मा ऐ हौतिन ला मौरुन्दै हौर माज का जिऊन्दौ कौरुन्दौ। हौजै हौसौ बातै ला पुरा कौरुन्दौ जिल्ला एक भविष्यजान्दौ स्या ऐ लिखुन्दौ थयौ: ‘तू आपरौ पवित्र मानुष ला कब्र कै किजमै नैदैन्दौ।’ तामोरी गवाही सि कि परमात्मा ऐ यीशु ला फिरी जिऊन्दौ कौरुन्दौ।”

“परमात्मा बा ऐ ऐ यीशु ला आपरौ जाखनौ बिलै बैशाई हौतिन ला आदर दैऊन्दौ स। आई यीशु ऐ तामोर रौ तैईऐ पवित्र आत्मा भैजुन्दौ स जैव कि हौतिनै वायदा कौरुन्दौ थयौ कि हौसौ भैजैस। पवित्र आत्मा ऐ हौसौ कामहौर ला फिरमै दैनस जिल्ला तोमोरी शाएन आई शुनैन सौ।”

“तोमोरी ऐ हौसौ मानुष, यीशु ला क्रूस गाश चढायाई मारुन्दौ। पौर पाका ऐ जानौ कि परमात्मा ऐ यीशु ला सेब चीजहौर गाश प्रभु सि मसीह दुईऐ मान्याऊन्दौ स!”

पतरस रौ शुनदै स्या मानुषा हौतिनै बौलुन्दौ बातैहौर का बितै सेग हिलुन्दै थै। हौतिर रौ तैईऐ हौतैनोरिऐ पतरस सि चेलाहौर का पुछुन्दौ, “हे भाईहौरी, हामोर ला कि कौरनौ चान्दौ?”

पतरस ऐ हौतैन ला जवाब दैऊन्दौ, “तोमोर माज का सेबे आपरौ पापहौर रौ तैईऐ पश्चाताप कौरौ ताकि परमात्मा तोमोर रौ पापहौर ला माफ कौरैस, आई यीशु मसीह रौ नाव का बपतिस्मा मांगौ। तै हौसौ तोमोर ला वरदान रौ रु कै पवित्र आत्मा बि दैस।”

पतरस ऐ जि बौलुन्दौ हौतिज गाश लगभग 3,000 मानुषा ऐ विश्वास कौरुन्दौ आई यीशु रौ चेलाहौरी फिरुन्दै। हौतैनोरिऐ बपतिस्मा मांगुन्दौ आई यरुशलेम रौ कलिसिया रौ हिस्सा फिरुन्दै।

जैतरै प्रेरितहौरी ऐ हौतैन ला शिक्षाहौरी दैऊन्दौ तै विश्वासीहौरी ऐ लगातार शुनुन्दौ। हौतैनै अक्सर बैठिन्दै थै आई कौठा खाऊ खान्दै थै, आई हौतैनोरिऐ अक्सर एक आईक रौ तैईऐ प्रार्थना कौरुन्दौ। हौतैनोरिऐ कौठा फिरी परमात्मा रौ आराधना कौरुन्दौ आई जि बि हौतैन गाछै थयौ हौतैनोरिऐ आपु माज बान्ठयुन्दै। नगर रौ हर एक मानुष हौतैन रौ तैईऐ बौलौ सोच जागदौ थयौ। हर दयार, बादौ का बादौ मानुषा विश्वासी फिरैन थाकुन्दै।