46. पौलुस मसीही विश्वासी फिरदौ स

शाऊल नाव सा एक मानुष थयौ जुनै यीशु गाश विश्वास नौकौरदौ थयौ। जैतरै हौसौ जवान थयौ, हौतरै हौतिनै स्तिफनुस ला मारदैसा मानुष हौर रौ गाछौ रौ निगरानी कौरउन्दौ थयौ। पिछांए का, हौतिनै विश्वासी हौर ला सतायाऊन्दौ थयौ। हौतिनै यरुशलैम कै घौरे घौरै नाशी दैन सी पुशां दुईए ला गिरफ्तार कौरी जैलखाना कै बेजुन्दौ थयौ। तै महायाजक ऐ शाऊल ला दमिश्क नगर कै नाशमै ला इजाजत दैई। हौतिनै हौतिनचै रौ मसीही हौर ला गिरफ्तार कौरमै आई हौतेन ला वापस यरुशलेम गिनुईं आनमै ला शाऊल ला बौलुन्दौ।

तै शाऊल ए दमिश्क नाशमै रौ यात्रा शुरु कौरुन्दौ। हौसौ नगर कै पौछनौ का ऊतुरी आंगमाए, हौतिन रौ चारौ बिलै आसमान का एक जिलमिल प्यांशौ चौमकुन्दौ, आई हौसौ माटी गास लौटुन्दौ। शाऊल ए कासलाता हौई बौलेन शुनुदौ, “या शाऊल! या शाऊल! तू माना क्यु सतायाएन सै?” शाऊल ए पुछुन्दौ, “हे प्रभु, तू कुन सै?” यीशु ए हौतिनला जवाब दैऊन्दौ, “हाँऊ यीशु सु! तू माना सतायाएन सै!”

जैतरै शाऊल ऊजिऔ तै हौसौ शाई नौबौलदौ थयौ। हौतिन रौ कौन्या हौतिनला दमिश्क हौतिन ला दश्मिक गिनुई नाशी थै। शाऊल ए त्रौन दयार सैग कैछै भी खाऊन्दौ पिऊन्दौ नाई थयौ।

दमिश्क नगर कै यीशु रौ हनन्याह नाव सा एक चेला थयौ। परमात्मा ए हौतिन ला बौलुन्दौ, “हौसौ घौरे नाश जिनचै शाऊल थाकिन्दैस। आपरौ हाथ ला हौतिन गाश जाग ताकि हौसौ फिरी शाई बौलैस।” पौर हनन्याह ए बौलुन्दौ, हे प्रभु, मैईए शुनुदौस कि हौई मानुष ए विश्वासी हौर ला क्यौ सतायाऊन्दौस।” परमात्मा ऐ हौतिन ला जवाब दैऊन्दौ, “नाश! मैईंए हौतिन ला यहुदी हौर ला आई आईक्या जाति हौर रौ मानुषा हौर ला मैरै नाव रौ घोषणा कौरमै तैईए चुनायाईस। हौसौ मैरै नाव रौ तैईए बादौ कौष्ट सैन कौरेस।

तै हनन्याह शाऊल गाछै नाशुन्दौ, आपरौ हाथ हौर ला हौतिन गाश जागुन्दौ, आई बौलुन्दौ, “यीशु ऐ जुन इन्चै आछदी बैरै बात कै ताऊँगाश प्रकट फिरी थयौ, माना ताऊँगाछै बैजुन्दौस ताकि तु फिरी शाई बौलसै, आई ताऊं गाश पवित्र आत्मा आछैस।” हौतरे शाऊल फिरी शामै सक्षम फिरुन्दौ, आई हनन्‍याह ए हौतिन ला बपतिस्मा दैऊन्दौ। तै शाऊल ए खाऊ खाई आई फिरी तरौताजा फिरुन्दौ।

हौतरै का, शाऊल ऐ दमिश्क कै थाकदै स्या यहूदीहौर ला प्रचार कौरनौ शुरु कौरुन्दौ। हौतिनै बौलुन्दौ, “यीशु ए परमात्मा रौ छेलडुस!” यहूदी रौ मानुषा हैरान थयै, क्यु बौलता शाऊल ए ता विश्वासी हौर ला मारी बैजनौ रौ कौशिश कौरुन्दौ थयौ, पौर ऐ हौतिनै यीशु गाश विश्वास कौरुन्दौ थयौ। शाऊल ऐ यहूदी हौर सी वाद-विवाद कौरुन्दौ। हौतिनै दैखाई कि यीशु ए मसीह स।

बादौ दयार पिछु, यहूदी हौरिए शाऊल ला मारी बैजनौ सुन्चुई। हौतैनोरिए हौतिन ला मारी बैजमै ला नगर रौ फाटक गाश मानुषा बैजुन्दौ। ताकि हौतिन रौ निगरानी कौरेस पौर शाऊल ए हौतेन रौ सोच रौ बारे ऐ शुनी आई हौतिन रौ कौनेस हौरिए हौतिन ला बौची निकिलमै ला मदद कौरुन्दौ। एक राच हौतेनोरिए हौतिन ला छाटो कै बैशाई नगर रौ दवाल ऐ तोल गारुन्दौ। दमिश्क का बौची निकलौनौ का पिछु शाऊल ऐ यीशु रौ बारै कै प्रचार कौरनौ जारी जागुन्दौ।

शाऊल प्रेरित हौर ला बैठिमै तैईए यरुशलेम नाशुन्दौ,पौर हौतैनोरी हौतिनका डौरदै थै।तै बरनबास नाव स्या एक विश्वासी शाऊल ला प्रेरितहौर गाछै गिनुई आछुन्दौ। हौतिनै हौतिनला बौलुन्दौ कि शाऊल ऐ क्यौ हिमौत ऐ दमिश्क कै प्रचार कौरुन्दौ थयौ। हौतिजका पिछु, प्रेरित हौरी ऐ शाऊल ला स्वीकार कौरुन्दौ।

एक्या विश्वासी जुन यरुशलेम रौ कौष्ट ऐ ठुरावी थै हौतैनै दूर अंताकिया नगर कै नाशी थै आई यीशु रौ बारै कै प्रचार कौरदै थै। अंताकिया कै थाकदै मानुषा बौदी बाग यहूदी नाईथै, पौर पैली बार हौतेन माज का बादौ मानुषा विश्वासी फिरुन्दै। बरनबास सी शाऊल हौसौ नौऊवौ विश्वासी ला यीशु रौ बारै कै आई बौदी सिखयामै रौ तैईंए हौतिनचै नाशुन्दै आई कलिसिया हौरी ला मजबूत कौरुन्दौ। यीशु गाश विश्वास कौरदै स्या पैली बैरै अंताकिया कै ए “मसीही” कहलायाऊन्दै।

एक दयार, अंताकिया रौ मसीही मानुषा उपवास सी प्रार्थना कौरेन थै। पवित्र आत्माए हौतैन ला बौलुन्दौ, “ मैरौ तैईए बरनबास सी शाऊल ला हौसौ काम कौरमै ला आलग कौरौ जि काम कौरमै ला मैईए हौतेन ला बैदिस।” तै हौतिज रौ तैईंए अंताकिया रौ कलिसिया ऐ बरनबास सी शाऊल रौ तैईए प्रार्थना कौरी आई हौतेन गाश आपरौ हाथ ला जागुन्दौ। तै हौतनौरिए हौतैन ला आईक्या बादौ जागा हौर गाश यीशु रौ बारे कै शुभ संदेश रौ प्रचार कौरमै रौ तैईंए बैजुन्दौ। बरनबास सी शाऊल ए आलाग आलाग जातिहौर रौ मानुषा ला ज्ञान दैऊन्दौ आई बादौ मानुषाहौरिए यीशु गाश विश्वास कौरुन्दौ।