45. सितफनुस सि फिलिप्पुस

पहला मसीही अगुवाहौर माज सितफनुस नाव रौ एक मानुष थयौ। सेब मानुषा हौतिन रौ आदर कौरदै थै। पवित्र आत्मा ऐ हौतिन ला बादौ सामर्थ आई बुध्दि दैऊन्दौ थयौ। सितफनुस ऐ बादौ चमत्कार कौरुन्दौ थयौ। जैतरै हौतिनै यीशु गाश विश्वास कौरनौ रौ बारे कै हौतैन ला शिक्षा दैऊन्दौ तै बादौ मानुषा ऐ हौतिन गाश विश्वास कौरुन्दौ।

एक दयार, सितफनुस यीशु रौ बारे कै शिक्षा दैन थयौ, आई एक्या हौयौ यहूदी आछुन्दै जुनै यीशु गाश विश्वास नौकौरुन्दौ थयौ आई हौतिन सि वाद-विवाद कौरनौ शुरु कौरुन्दौ। हौतैनै वाल रोशै थै, हौतिर रौ तैईऐ हौतैनै धार्मिक अगुवाहौर गाछै नाशुन्दै आई हौतिन रौ बारे कै जाली बौलुन्दौ। हौतैनोरिऐ बौलुन्दौ, “हामोरी ऐ सितफनुस ला मूसा सि परमात्मा रौ बारै कै मारै बातै बौलनौ शुनुन्दौस!” हौतिर रौ तैईऐ धार्मिक अगुवाहौरी ऐ सितफनुस ला गिरफ्तार कौरुन्दौ आई हौतिन ला महायाजक आई यहूदीहौर रौ आईक्या अगुवाहौर रौ सामने गिनुई आछुन्दै। आईक्या जाली गवाह बि आछुन्दै आई हौतैनोरिऐ सितफनुस रौ बारै कै जाली बौलुन्दौ।

महायाजक ऐ सितफनुस ला पुछुन्दौ, “कि हौई मानुषा तैरौ बारे कै दिमांग बौलैन साया?” सितफनुस ऐ महायाजक ला जवाब दैमै तैईऐ बादौ बातैहौर ला बौलनौ शुरु कौरुन्दौ। हौतिनै बौलुन्दौ कि अब्राहम रौ बेला का यीशु रौ बेला सेग परमात्मा ऐ इस्राएल रौ मानुषा रौ तैईऐ बादौ अनोखा काम कौरुन्दौस। पौर मानुषा ऐ सौदा परमात्मा रौ हुकुम नौमौन्याई थयौ। सितफनुस ऐ बौलुन्दौ, “तोमोरी परमात्मा रौ खिलाफ हठीलाहौरी आई बलवा कौरदै स्या सौ। तोमोरी ऐ सौदा पवित्र आत्मा ला अस्वीकार कौरुन्दौ, जैव कि तामोर रौ पूर्वजहौरी ऐ सौदा पवित्र आत्मा ला अस्वीकार कौरुन्दौ थयौ आई सौदा हौतिन रौ भविष्यजान्दै स्या हौर ला मारी बैजुन्दौ थयौ। पौर जि हौतैनोरिऐ कौरुन्दौ थयौ हौतिज रौ तुलना कै तोमोरी ऐ आई बि मारे कौरुन्दौस! तोमोरी ऐ मसीह ला मारी बैजुन्दौ!”

जैतरै हौसौ धार्मिक अगुवाहौरी ऐ हौई शुनौ, तै हौतैनोरी हौतेग रोशै थै कि हौतैनोरिऐ आपरौ कानहौर ला बौन्द कौरुन्दौ आई जोरै काद ऐ झिंगाऊन्दै। हौतैनोरिऐ सितफनुस ला गिशिन्दै नगर का बाए निऊन्दौ आई हौतिन ला मारी बैजमै तैईऐ हौतिन ला जान्टी ऐ ल्याऊन्दौ।

जैतरै सितफनुस मौरैन थयौ, हौतिनै पुकारयाऊन्दौ, “हे यीशु, मैरौ आत्मा ला ग्रहण कौर!” तै हौसौ आपरौ जानोहौर गाश लौटुन्दौ आई फिरी पुकारयाऊन्दौ, “हे प्रभु, हौई पाप हौतैन गाश नैभैजै।” तै हौसौ मौरुन्दौ।

हौतादु, यरुशलेम थाक्दै स्या बादौ मानुषा ऐ यीशु रौ चेलाहौर ला तांग कौरनौ शुरु कौरुन्दौ, हौतिर रौ तैईऐ विश्वासी मानुषा आईक जागाहौर कै ठुरुन्दै। पौर हौजरौ बावजूद बि, जिन्चै बि हौतैनै नाशुन्दै हौतैनोरिऐ यीशु रौ बारै कै प्रचार कौरुन्दौ।

फिलिप्पुस नाव रौ यीशु रौ एक विश्वासी थयौ। जैव कि आईक्या बादौ विश्वासीहौरी ऐ कौरुन्दौ थयौ हौसौ बि यरुशलेम का ठुरुन्दौ। हौसौ सामरिया रौ इलाका कै नाशुन्दौ। हौतिनचै हौतिनै मानुषा माज यीशु रौ बारै कै प्रचार कौरुन्दौ। बादौ मानुषा ऐ हौतिन गाश विश्वास कौरुन्दौ आई उध्दार पायाऊन्दौ। एक दयार, फिलिप्पुस गाछै परमात्मा बिलै का एक स्वर्गदूत आछुन्दौ आई हौतिन ला जांगलै नाशमै तैईऐ, आई एक सौलौक गाश हान्डमै ला बौलुन्दौ। फिलिप्पुस हौतिनचै नाशुन्दौ। जैतरै फिलिप्पुस हौसौ सौलौक गाश हान्डैन थयौ, तै हौतिनै एक मानुष ला आपरौ रथ कै नाशनौ दैखुन्दौ। हौई मानुष कूश देश रौ एक खास आफसौर थयौ। पवित्र आत्मा ऐ फिलिप्पुस ला बौलुन्दौ कि नाशिन्दै हौसौ मानुष सि साथ-साथ हान्डै।

हौतिर रौ तैईऐ फिलिप्पुस रथ गाछै नाशुन्दौ। हौतिनै शुनौ कि हौसौ कूशी परमात्मा रौ वचन ला शिखैन थयौ। जुन यशायाह भविष्यजान्दौ स्या ऐ लिखुन्दौ थयौ हौसौ हौतिज ला शिखैन थयौ। हौसौ शिखैन थयौ, “हौतैनै हौतिन ला मारनौ बैरै रौ काथा नैन थै, आई जैव एक गाबलु शान्त थाक्दौस, हौतिनै बि एक लब्ज नौबौलुन्दौ। हौतैनोरिऐ हौतिन सि मारै बर्ताव कौरुन्दौ आई हौतिन रौ आदर नौकौरुन्दौ। हौतैनोरिऐ हौतिन ला मारी बैजुन्दौ।”

फिलिप्पुस ऐ हौसौ कूशी आफ्सौर ला पुछुन्दौ, “जि तु शिखैन सै कि तु हौतिज ला सौमजीन्दौ बि सैहा?” हौसौ कूशी ऐ जवाब दैऊन्दौ, “ना। जैतरै सेग कुन हौजला माना नसमझायाएस, हौतरै सेग हांऊ हौजला सौमझुई नौबौलदौ। मैहरबानी कौरी मुगाछै आछी बैश आई माना सौमजाय। यशायाह हौई आपरौ बारै कै लिखैन थयौ या कुन आईक रौ?”

फिलिप्पुस रथ गाश नाशी बैशुन्दौ। तै हौतिनै हौसौ कूशी आफ्सौर ला हौसौ बौलुन्दौ जि यशायाह ऐ यीशु रौ बारै कै लिखुन्दौ थयौ। फिलिप्पुस ऐ परमात्मा रौ वचन रौ बादौ आईक्या भागहौर रौ बि चर्चा कौरुन्दौ। हौई तरीका ऐ, हौतिनै हौसौ मानुष ला यीशु रौ बारै कै बौलौ काचा सुनायाऊन्दौ।

फिलिप्पुस सि हौसौ कूशी हान्डेन पानी गाछै आछुन्दै। हौसौ कूशी ऐ बौलुन्दौ, “शाव! ईन्चै पानी स! कि हांऊ बपतिस्मा मागी बौलसुवा?” आई हौतिनै सारथी ला रथ रुक्यामै ला बौलुन्दौ।

हौतिर रौ तैईऐ हौतैनै पानी कै नाशुन्दै, आई फिलिप्पुस ऐ हौसौ कूशी ला बपतिस्मा दैऊन्दौ। जैतरै हौतैनै पानी का बाए आछुन्दै, तै पवित्र आत्मा अचानक ऐ फिलिप्पुस ला चुंगीन्दै कुन आईक जागा कै निऊन्दौ। हौतिन्चै फिलिप्पुस ऐ मानुषा ला यीशु रौ बारै कै बौलनौ जारी जागुन्दौ।

हौसौ कूशी आफ्सौर आपरौ घौरै रौ यात्रा गाश आंगमाऐ बौढयुन्दौ। हौसौ खुश थयौ कि हौसौ ऐ यीशु ला जान्दौ थयौ।