32. यीशु दुष्टात्मा ते पेरे कन होड़ो के ओड़ो: मियद बेमार महिला के ठीक किआ:

यीशु ओड़ो: इनिअ: चेला को अकोअ: डोंगा रे रकब केअते हन पअ: को सेनो: जना जेतअ: रे गिरासेनी होड़ो को तयु ताइना। इनकु एन ठयाद सेटेर केअते डोंगा ते अड़गु जनाको।

एनता रे मियद होड़ो ताइकेना जे निजअ: रे दुष्टात्मा ताइकेना।

एन होड़ो इमीन पेड़ेजन ताइकेना चि जेताएओ इनि: के सम्बड़ाव कको दड़ियाइ ताइना। ढेइर बेर होड़ो को इनिअ: ती: ओड़ो: काटा कोके सिकड़ी तेओ को थोल लअ: मगर इनि: एना केओ टोटअ: ताइनाए।

एन होड़ो मसड़ा चेतन कोरे तयु ताइना। ने होड़ो गोटा सिंगी ओड़ो: गोटा अयुब गूल ताइनाए। इनि: लिजअ: कोयो काए तुसिङयेन ताइना ओड़ो: अजे तेगी खुद दीरी कोएते चोटेन ताइना।

चिलका गी ने होड़ो यीशु के नेल किजअ: दो इनि: नीर केअते यीशु तअ: हिजु लेना ओड़ो: इनिअ: अयार रे मुकड़ी टेकाव केदा। एनेद यीशु एन होड़ोवअ: बितर रेन जे दुष्टात्मा ताइकेना, इनि: के कजियजअ:, “ने होड़ोए ते बाहर ओडोङ केनोम।”

एन दुष्टात्मा जोर ते गुल केदा, “हे यीशु परम प्रधान परमेश्वरअ: होन कोड़ा, अमके अञङअ: लोओते चिकन कमि मेनअ:? दया केअते अञङ के अलोम सताविञअ:!” एनेद यीशु एन दुष्टात्मा के कुली किजअ:, “अमअ: चिनअ: नुतुम?” इनि कजि केदा, “अञङअ: नुतुम सेना तना, चियाची अले इसु थिम्बा मेना लेअ:।”( रोमी सेना रे ढेइर हजार सैनिक कोअ: मियद झुण्ड मियद “सेना” तयु ताइना।)

एन दुष्टात्मा को यीशु केको अरची किजअ:, “दया केअते अले के ने ठयादेते एटअ: तअ: अलोम कुल लेअ:!” एनता नड़े रेगी मियद बुरु रे सुकरी कोअ: मियद झुण्ड को अतिङ ताइना। एनामेनते एन दुष्टात्मा को यीशु केको अरची किजअ:, “दया केअते अले के एन सुकरी कोअ: रे कुल तलेम!” यीशु कजि केदा, “ठीक गीअ:, इनकुअ: रे सेनो: केनोपे!”

एनाते एन दुष्टात्मा को एन होड़ोए ते ओडोङ केअते एन सुकरी कोअ: रेको बोलो जना। एन सुकरी को नीर केअते मियद तिंगु कन सेरेंग जेंते नीर अड़गु केद झील रेको बोलो डुबुज गोज जना। एन झुण्ड रे लगभग 2000 सुकरी को ताइकेना।

एनता रे एन सुकरी कोके गुपी ताइकेन होड़ो को ताइकेना। जे नअ: को होबा लेना एना को नेल केद चि इनकु नगर ते नीर केदा को। यीशु जे रिका लअ: एना सोबनअ: होड़ो कोके उदुबद कोअ: को। एन नगर रेन होड़ो को ओडोङ जना को ओड़ो: एन होड़ो केको नेल किजअ:, जे निजअ: रे दुष्टात्मा ताइकेना। इनि: शान्ति ते, लिजअ: तुसिङ कन ओड़ो: मियद साधारण होड़ो लेका दुबा कन व्यवहार ताइना।

एन होड़ो को इसु बोरोकन को ताइकेना ओड़ो: यीशु के सेनो: लाइ को कजियजअ:। एनामेनते यीशु डोंगा रे रकब जना। एन होड़ो जे निजअ: रे दुष्टात्मा ताइकेना। इनि: यीशु लोओते सेनो: लाइ अरची किजअ:।

मगर यीशु इनि: के कजियजअ:,“कहा गी। अञङ सनङ तनञङ चि अम ओड़ा सेन केअते सोबेर कोके उदुबकोम चि परमेश्वर अमअ: लाइ चिनअ:चिका कदा। इनकु के उदुबकोम चि चिलका परमेश्वर अमअ: रे दया लअ:।”

एनामेनते एन होड़ो सेनो: जना ओड़ो: सोबेन कोके ने बारे रे उदुबद कोअ: जे यीशु इनि: लाइ रिका लअ:। इनिअ: कहनी के अयुम वाला सोबेन होड़ो को ताजुब जनाको।

यीशु झीलेते ने पअ: रुवाड़ जना। इनिअ: एनता सेटेर जन रअ: तयोमते, मियद मरंग भीड़ इनि: तअ: रे जमा जना ओड़ो: होड़ो को इनि: के धकाई ताइकेना को। एन भीड़ रे मियद कुड़ी ताइकेना, इनि: बारह सालेते परदल रअ: बेमार ते दुकु ताइकेना। इनि: अयअ: सोबेन टका को बैध कोअ: रे लगाव छबा लअ: चि इनकु इनि: केको ठीक ताइकअ, मगर इनिअ: बेमार हडो गी बढ़ाव जना।

इनि: अयुम लअ: चि यीशु ढेइर बेमार तन होड़ो कोके ठीक लेद कोअ: ओड़ो: इनि: सोचाव केदा, “अञङ पक्का गी, अगर यीशु गअ: लिजअ: के भइर रइङ जुटिद तारे दो, अञङ ठीक केनो गञङ!” एनामेनते इनि: यीशु गअ: दोया पअ: ते हिजु लेना, ओड़ो: इनिअ: लिजअ: के जुटिद तदा। चिलका इनि: लिजअ: के जुटिद केदा, एनका गी परदल बेमार ठीक जना।

इमतंग गी यीशु सरी जना चि इनि: जेते पेड़ेज ओडोङ कना एनामेनते इनि: दोया पअ: मुआड़ केअते कुली केद कोअ:,“अञङ के ओकोय जुटिद केदिङअ:?”चेला को जबाब को ओमा जअ:, “नेतअ: रे इमिन थिम्बा होड़ो को अमअ: चाइरो पअ: रे भीड़ लगाव कनाको ओड़ो: अमके धकाम तनाको। दो अम चिनअ: कुली तनम चि अञङ के ओकोय जुटिद केदिङअ:?”

एन कुड़ी यीशु गअ: अयार रे थरथराव तन ओड़ो: इसु बोरोकन अयअ: मुकड़ी के टेकाव केअते दुब जना। एनेद इनि: उदुब किजअ: चि इनि: चिनअ: रिका कदा ओड़ो: नेआव गी चि ठीक जना। यीशु इनि: के कजियजअ:, “अमअ: बिश्वास अमके ठीक केद मअ:। शान्ति ते सेनो: केनोम।”