31. यीशु दाअ: रे सेसेना

पाँच हजार होड़ो कोके जोमेअ: ओम केद रअ: तयोमते, यीशु अयअ: चेला कोके डोंगा रे रकब लाइ कजियाद कोअ:। इनि: इनकु के झीलेते हन पखा सेन लाइ कजियद कोअ:, मगर इनि: हुडिङ देरी लाइ एनता रेगी रुकाव जना। चेला को सेनो: जनाको ओड़ो: यीशु भीड़ के बिदा केदा चि इनकु अकोअ: ओड़ा को सेनो: कअ। एना रअ: तयोमते यीशु बिनती लाइ मियद पर्वत रे रकब जना। एनता रे इनि: एसकर गी ताइकेना ओड़ो: इनि: ढेइर नुबा: जकेद बिनती केदा।

इमतंग चेला को अकोअ: डोंगा के चलाव केअते सेनो: तन ताइनको, मगर होयो इनकुअ: सनमंग पअ: ते इसु जोर ते हिजु ताइना। इसु नुबा: जन रेओ इनकु झील रअ: थला रेगी को ताइकेना।

इमतंग यीशु बिनती छबा लअ: ओड़ो: अयअ: चेला कोतअ: रुवाड़ ताइना। इनि: डोंगा पअ: सेन लाइ दाअ: चेतन रे सेसेन ताइना।

एनेद चेला को इनि: केको नेल किजअ:। इनकु इसु को बोरो जना चियाची इनकु सोचाव ताइकेना को चि इनि: जन बोंगा तनी। यीशु सरी ताइनाए चि इनकु बोरो कनाको, एनामेनते इनि: इनकु के हकाव केअते कजियाद कोअ:, “अलपे बोरोया, अञङ गी तनीङ!”

एनेद पतरस यीशु के कजियजअ:, “हे प्रभु अगर नी अमगी तानमे रेदो अञङ के दाअ: रे सेन केअते अमअ: तअ: हिजु लाइ हुकुम ओमाञङ में।”यीशु पतरस के कजियजअ:, “हिजुम!”

एनाते पतरस डोंगा ते अड़गु जना ओड़ो: यीशु तअ: सेन लाइ दाअ: चेतन रे सेसेन एटेज केदा। मगर हुडिङ संगीन सेन केअते इनि: अयअ: मेद के यीशु तअ: ते हटाव केदा ओड़ो: लहरा कोके नेनेलय लगाव जना ओड़ो: तेज होयो कोके महसूस एटेज केदा।

एनेद पतरस बोरो जना ओड़ो: दाअ: रे डुबुजो ताइना। इनि: गुल केदा, “हे प्रभु अञङ के बचावीङ में।”यीशु इमतंग गी ती: जिलिङ केअते इनि: के बचाव किजअ:। एनेद यीशु पतरस के कजियजअ, “अमअ: बिश्वास हुडिङ गीअ:! अमके सुरक्षा दोहो लाइ अम अञङअ: चेतन रे चिनअ: लाइ कम भरोसा केदा?”

एनेद यीशु ओड़ो: पतरस डोंगा रेकिन रकब जना, ओड़ो: इमतंग गी तेज होयो रोकव जना। दाअ: शांत जना। चेला को ताजुब जना को ओड़ो: यीशु गअ: अयार रे मुकड़ी को टेकाव तदा। इनकु इनिअ: आराधना केदा को ओड़ो: इनि: केको कजियजअ:, “सरती गी अम परमेश्वर गअ: होन कोड़ा तानमें।”