36. रूप बदलीयोओ:

मुसिङ हुलङ यीशु अयअ: तीन चेला कोके पतरस, याकूब ओड़ो: यूहन्ना के अयअ: लोओ: इदि केद कोअ:। (ने यूहन्ना नुतुम चेला एन होड़ो काए ताइकेना ओकोनी यीशु के बपतिस्मा ओम लिजअ:।) इनकु बिनती लाइ मियद सलंगी बुरु रेको रकब जना।

जब यीशु बिनती ताइनाए दो इनिअ: चेहरा सिंगी लेका पुण्डी जना। इनिअ: लिजअ: मारसल लेका पुण्डी जना, चिलका ओते दिसुम रे जाए जेताय को पुण्डी दड़िअ: एनाए तेओ थिम्बा पुण्डी।

एनेद मूसा ओड़ो: एलिय्याह भविष्यवक्ता किन नेल जना। ने होड़ो किन ने ओते दिसुम रे ने समयए ते चिमिन साल सिदा रेकिन तयु ताइना। इनकिन यीशु लोओ: इनिअ: गोजो रअ: बारे रेकिन बकड़ ताइना, चियाची इनि: सेकड़ा गी यरूशलेम शहर रे गोए केनोगाए।

जब मूसा ओड़ो: एलिय्याह यीशु लोओ: किन बकड़ ताइना, इमतंग पतरस यीशु के कजियजअ:, “अबु लाइ नेतअ: रे तयु बुगिन मेनअ:। अबु तीन ठु मंडप बु बाइअ:, मियद अम लाइ, मियद मूसा लाइ ओड़ो: मियद एलिय्याह लाइ।” मगर पतरस काए सरी ताइना चि इनि: चिनअ: कजि तनाए।

जब पतरस बकड़ ताइनाए दो मियद चमकाव रिमिल लतार हिजु केअते इनकु के दलोब तद कोअ:। एनेद इनकु एन रिमिलेते मियद आवाज के हिजु तन को अयुम केदा। इनि: कजि केदा, “नी अञङअ: होन कोड़ा तनी, नी के अञङ दुलाड़ेञङ। अञङ नीजेते रासिका मेनाञङअ:। इनिअ: अयुमेपे।” एन तीनो झन चेला को बोरो जना को ओड़ो: ओते रेको बुरुम जना।

एनेद यीशु इनकु के जुटिद केद कोअ: ओड़ो: कजि केदा, “अलपे बोरोयअ: बिरिद केनोपे।” जब इनकु चाइरो पअ: को नेल केदा, दो यीशु के बगि केअते अको लोओ हडो जेताय केओ कको नेल केद कोअ:।

यीशु ओड़ो: एन तीनो चेला को एन बुरुएते लतार को अड़गु जना। एनेद यीशु इनकु के कजियद कोअ:, “नअ: नेतअ: रे जे नअ: को होबा लेना, एना रअ: बारे रे जेताय केओ अलपे उदुबकोअ:। अञङ सेकड़ा गी गोजोगञङ ओड़ो: हडो जीद केनोगञङ। एना रअ: तयोमते अपे होड़ो कोके उदुब दड़िअ: कोअ:पे।”