4. अब्राहम लोओ: ते परमेश्वरअ: करार

बाढ़ रअ: इसु दिन तयोमते दुनिया रे ढेइर होड़ो को तयु: तन ताइ केना ओड़ो: इनकु हडो गी परमेश्वरअ: आद् नि: इनिया बिरोध रेको पाप केदा। इनकु सोबेन मियद गी भाषा को जगर तन ताइकेना, ऐना मेनते इनकु मिसाते मिद तअ: रेको जमा जना ओड़ो: मियद नगर बबाइ को एटेज केदा।चिलका परमेश्वर इनकु के हुकुम ओम लेद कोअ: एना रअ: मोताबिक गोटा दुनिया रे कको पेरे जना।

इनकु इसु पुरअ: पेटेद को ताइकेना ओड़ो: इनकु के चिलका जीवन जिदेन चाही, नेयअ: रअ: बारे रे इनकु परमेश्वरअ: हुकुम मनातिङ कको सनङ ताइना। नेतअ: जकेद चि मियद नेलकन मीनार के बबाइ को एटेज केदा जे स्वर्ग तअ: जकेद सेटेरा। परमेश्वर नेल केद कोअ: चि अगर निकु मिसाते बुरा कामी कोके को रिका कते रेदो इनकु इसु पाप कामी को रिका दड़िअ:।

ऐना मेनते परमेश्वर इनकुअ: भाषा के ढेइर एटअ:-एटअ: भाषा कोरे बदली केदा ओड़ो: इनकु के गोटा दिसुम रे पसराव तद कोअ:। जे नगर के इनकु बबाइ को एटेज लअ: ऐना बाबेल कजि जना, नेयअ: रअ: अर्थ तनअ: “गड़बड़ी”।

ढेइर साल रअ: तयोमते परमेश्वर अब्राम नुतुम मियद होड़ो लोओ: जगर केदा। परमेश्वर इनि: के कजियजा, “अमअ: देश ओड़ो: परिवार के बगी केते एन देश ते सेनोमे, जे अञङ अमके देखावमा। अञङ अमके आशीष ओमामइङ ओड़ो: अमे ते मियद मरंग जाति बाइयाइङ। अञङ अम: नुतुम के मरंग गेंया। जे होड़ोको अमके आशीष को ओमामा, अञङ इनकु के आशीष ओमा कोअञङ। ओड़ो: जे अमके सरपाव मेयाको इनकु के अञङ सरपाव कोअञङ। दिसुम रेन सोबेन जाति रेन होड़ो को अमअ:ते आशीष को नमेअ:।”

ने लेका अब्राम परमेश्वरअ: हुकुम अयुम केदा। इनि: अयअ: घरनी सारै के इदि किजअ:, अयअ: सोबेन दासी कोके ओड़ो: अयअ: सोबेन सम्पति केयो इदि केदा ओड़ो: एन देश ते मतलब कनान देश ते सेनो जना। जे परमेश्वर इनि: के देखाव लिजअ:।

जब अब्राम कनान देश सेटेर जनाय दो परमेश्वर इनि: के कजियजा:, “अम अमअ: चाइरो पअ: नेलेमे। अञङ अमके ने सोबेन देश ओमामञङ। ओड़ो: अमअ: वंशज को सोबेन इमतंग लाइन नेयअ: रे अधिकार को दोहोया।” एनेद अब्राम एन देश रे बसाव जना।

मलिकिसिदक नुतुम रेन मियद कोड़ा होड़ो ताइन केना, जे सोबेन कोअते ऊँचा परमेश्वरअ: पुरोहित ताइ केना। मुसिङ हुलङ अब्राम लड़ाई केते हिजु ताइना दो इनि: ओड़ो: अब्राम किन नपम जना, मलिकिसिदक अब्राम के आशीष ओमाजाए आद् कजियजाए, “सोबेन कोअते ऊँचा परमेश्वर जे स्वर्ग आद् ओते दिसुम रेन मालिक तनी, इनि: अमके आशीष ओमामकाए।” एनेद अब्रामो लड़ाई रे जीतावकन सोबेन जिनिस रअ: दसवाँ भाग मलिकिसिदक के ओमा जाए।

ढेइर साल बिताब जना, मेनदो नअ: जकेद अब्राम आद् सारै यअ: होन कको होबा लेना। परमेश्वर अब्राम लोओ: जगर केदा ओड़ो: हडो करार केदा चि इनिअ: मियद होन कोड़ा होबावगअ:। ओड़ो: चिलका सिरमा रे इपिल को मेना कोअ: एनका गी अमअ: ढेइर वंशज को ताइना। अब्राम परमेश्वरअ: करार रे बिश्वास केदा। परमेश्वर घोषणा केदा चि अब्राम मियद धर्मी होड़ो ताइन केना। चियाची इनि: परमेश्वरअ: करार रे बिश्वास लअ:।

एनेद परमेश्वर अब्राम लोओ: मियद करार थोल केदा। साधारण रूप ते मियद करार बरिया दल रअ: थला रे नि: इनि: लाइन कामी कोके रिका रअ: मियद समझौता तना। मगर ने मामला रे परमेश्वर अब्राम लोओ: ते ने करार के इमतंग थोल लअ: जे इमतंग अब्राम दुड़ुम कन ताइनय। मेनदो इनि: इमतंगओं परमेश्वर के अयुम दड़ि ताइकेनाए। परमेश्वर कजि केदा, “अञङ अमअ: होड़मोय ते जनम केअते अमके खुद अमअ: होन कोड़ा ओमामञङ। अञङ अमअ: वंशज कोके ने कनान देश ओमा कोअञङ।” मेनदो नअ:व अब्रामअ: जेतय होन कको ताइ केना।